បន្ទាយមានជ័យ ៖ នៅព្រឹក ថ្ងៃទី១៣ ខែកុម្ភៈ ឆ្នាំ២០១៩នេះ ម្ចាស់ដី បានធ្វើការព្រមានថា នឹងចាត់វិធានការផ្លូវច្បាប់លើបុគ្គលចូលរំលោភយកដីធ្លីរបស់គាត់ នៅចំណុចបឹង៧៥ ភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
លោក លី អ៊ុតនី ជាម្ចាស់ដី ដែលបានទិញពីសាមីខ្លួន ចំណែកដីរបបពីអតីតទាហានឧទ្ទាមខ្មែរក្រហមវរៈ៦៧៣ នៃកងពលធំលេខ២១ ពីមុន ខ្មែរក្រហមសមាហរណកម្ម គឺជាកងពលធំលេខ៤៥០ រណសិរ្សសមរភូមិស៊ីសូផុនខាងត្បូង តំបន់ម៉ាឡៃ បច្ចុប្បន្ន ស្ថិតនៅភូមិអូរអំពិល ឃុំទួលពង្រស្រុកម៉ាឡៃ ដីនោះ ស្ថិតនៅជាប់នឹងដីរបបវរៈ៦៧២ ដែលលោកបានទិញអស់រួចហើយ និងអតីតដីរបបកងពលនោះ នៅម្តុំបឹងក្របៅ ហើយនៅដើមឆ្នាំ២០១៩ នេះ លោកក៏បានទិញបន្តចំណែករបបដីពលទាហានវរៈ៦៧២ គឺដីរបបវរៈ៦៧២ និងវរៈ៦៧៣ មានទំហំ១០៦ហិកតា ហើយត្រូវបែងចែកដល់ពលទាហាន និងគ្រួសារចំនួន១០៦គ្រួសារ។
ក្នុងនោះវរៈ៦៧២ បាន៥២ហិកតា និងវរៈ៦៧៣ បាន៥៤ហិកតា ការទទួលបាន និងបែងចែករបបនេះ ដោយយោងកំណត់ហេតុ ស្ដីពីការព្រមព្រៀងបញ្ចប់ទំនាស់ដីធ្លីរវាងអតីតទាហានឧទ្ទាមខ្មែរក្រហមវរសេនាតូចលេខ ៦៧២(D672 និងវរសេនាតូចលេខ៦៧៣(D673) កងពលធំលេខ២១ ឬF21 មុនឆ្នាំ១៩៩៦ គឺជាកងពលធំលេខ៤៥០ រណសិរ្សនៃសមរភូមិស៊ីសូផុនខាងត្បូង ជាមួយក្រុមហ៊ុនលី អ៊ុតនី នៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ចុះថ្ងៃទី២២ ខែមេសា ឆ្នាំ២០១៥ នៅសាលាស្រុកម៉ាឡៃ។
ជាងនេះទៅទៀត ការសម្រុះសម្រួលដោះស្រាយទំនាស់ដីធ្លីនេះ ក៏យោងតាមលិខិតសេចក្ដីជូនដំណឹងលេខ១៥៥៣ស ជ ណ ចុះថ្ងៃទី២៤ ខែធ្នូ ឆ្នាំ២០១២ របស់ទីស្ដីការគណៈរដ្ឋមន្ត្រីផងដែរ។
ក្នុងកិច្ចព្រមព្រៀងនោះ តំណាងវរៈ៦៧២ គឺ លោកព្រំ វណ្ណះ និង លោក មិន ធីជា តំណាងវរៈ ៦៧៣ គឺ លោក ឃៀង ហ៊ុល និង លោក ភោគ គឹមជា ហើយមានលោកវរសេនីយ៍ ព្រាប សារុន អតីតបញ្ជាការរងកងពលធំលេខ២១(D21) និងជាមេពីលើវរៈទាំង២ និងបច្ចុប្បន្ន ជារងបញ្ជាការកងពលតូចថ្មើរជើងលេខ៥១ ជាសាក្សី និងតំណាងក្រុមហ៊ុន គឺ លោក លី អ៊ុតនី ពោលគឺភាគីទាំង២ ក៏ឯកភាពគ្នារួចមកហើយ លើកំណត់ហេតុ ស្តីពីការប្រគល់ ទទួលដីទំហំ១០១ហិកតា៧៨អា ជូនអតីតគ្រួសារយោធិនអង្គភាពវរៈសេនាតូចលេខ៦៧២ និងវរៈ៦៧៣ ពិតប្រាកដ ដើម្បីកាន់កាប់ជាកម្មសិទ្ធិស្របច្បាប់នៅត្រង់បឹង៧៥ ភូមិអូរអំពិលឃុំទួលពង្រស្រុកម៉ាឡៃ ចុះថ្ងៃទី៥ ខែសីហា ឆ្នាំ២០១៤ ផងដែរ។
ពីនោះមក ភាគីទំនាស់ទាំង២ បានស្រុះស្រួលគ្នា ប៉ុន្តែដោយចំណែកដីក្នុង១គ្រួសារៗ មានតែ១ហិកតា អតីតគ្រួសារយោធិន នៃវរៈ៦៧២ គឺសាមីខ្លួន១គ្រួសារៗ ក៏ស្នើ និងយល់ព្រមលក់ដីចំណែក នៃរបបខ្លួនទាំង៥២គ្រួសារ ស្មើទំហំ៥២ហិកតា ឲ្យ លោក លី អ៊ុតនី។
ចំណែកសាមីខ្លួនគ្រួសារយោធិនវរៈ៦៧៣ ចំនួន២៩គ្រួសារ ស្មើនឹងដីទំហំ២៩ហិកតា លើ៥៤គ្រួសារស្មើនឹង៥៤ហិកតា ក៏ព្រមលក់ដីរបបរបស់ខ្លួនឲ្យ លោក លី អ៊ុតនីដែរ ភាគីទាំង២ ក៏បានព្រមព្រៀងជាលាយលក្ខណ៍អក្សរ ផ្ដិតមេដៃ សាក្សី និងប្រគល់ទទួលលុយតាមតម្លៃដីដែលឯកភាពហើយដែរ។
ប៉ុន្តែក្រុមការងារ លោក លី អ៊ុតនី បានប្រាប់អ្នកយកព័ត៌មានឲ្យដឹងថា ចលនារបស់លោកវរសេនីយ៍ព្រាប សារុន រងបញ្ជាការកងពលតូចថ្មើរជើងលេខ៥១ អតីតរងបញ្ជាការកងពលធំលេខ២១ ម៉ាឡៃ និងបក្ខពួក បានញុះញង់ឲ្យអតីតគ្រួសារយោធិនខាងលើ និងមនុស្សផ្សេងទៀត ប្រើគ្រឿងចក្រចូលទៅរំលោភយកដី នៃចំណែករបបដីដែលព្រមព្រៀងលក់ដូរទៅហើយនោះ ដោយខុសច្បាប់ កាលពីដើមខែកុម្ភៈ ឆ្នាំ២០១៩នេះ។
ក្រុមការងារបានព្រមានថា បើសកម្មភាពរំលោភបំពាននោះមិនព្រមដកថយ និងបញ្ឈប់ដោយគ្មានលក្ខខ័ណ្ឌទេនោះ លោក លី អ៊ុតនី នឹងចាត់ការតាមវិធានការច្បាប់យ៉ាងតឹងរ៉ឹងបំផុត។
ជាមួយគ្នានោះ លោកក៏ឲ្យអាជ្ញាធរភូមិ ឃុំ ស្រុក ខេត្ត និងសមត្ថកិច្ចជំនាញពាក់ព័ន្ធ អន្តរាគមន៍ដោះស្រាយបាតុភាពនេះជាបន្ទាន់ ព្រោះសកម្មភាពនេះបង្កខូចសណ្ដាប់ធ្នាប់ សន្តិសុខសង្គម និងភាពអានាធិបតេយ្យដែលផ្គើននឹងលិខិតសេចក្ដីជូនដំណឹងលេខ១៥៥៣ ស ជ ណ ចុះថ្ងៃទី២៤ ខែធ្នូ ឆ្នាំ២០១២ របស់ទីស្ដីការគណៈរដ្ឋមន្ត្រី ក៏បំពាននឹងកំណត់ហេតុ ស្តីពីការព្រមព្រៀងបញ្ចប់ទំនាស់ដីធ្លីរវាងអតីតទាហានឧទ្ទាមខ្មែរក្រហមវរសេនាតូចលេខ៦៧២(D672 និងវរសេនាតូចលេខ៦៧៣(D673) ជាមួយក្រុមហ៊ុន លី អ៊ុតនី នៅភូមិអូរអំពិល ឃុំទួលពង្រ ស្រុកម៉ាឡៃ ខេត្តបន្ទាយមានជ័យ ចុះថ្ងៃទី២២ ខែមេសា ឆ្នាំ២០១៥ និងកំណត់ហេតុ ស្តីពីការប្រគល់ ទទួលដីទំហំ១០១ ហិកតា៧៨អា ជូនអតីតគ្រួសារយោធិនអង្គភាពវរៈសេនាតូចលេខ៦៧២ និងវរៈ៦៧៣ ពិតប្រាកដ ដើម្បីកាន់កាប់ជាកម្មសិទ្ធិស្របច្បាប់នៅត្រង់បឹង៧៥ ភូមិអូរអំពិលឃុំទួលពង្រ ស្រុកម៉ាឡៃ ចុះថ្ងៃទី៥ ខែសីហា ឆ្នាំ២០១៤ ផងដែរ។
លោក អែម សុខា អភិបាលស្រុកម៉ាឡៃប្រាប់អ្នកយកព័ត៌មានឲ្យដឹងថា បាតុភាពអនាធិបតេយ្យនេះ ក៏ជាឥទ្ធិពលដែលរាលដាលពីកន្លែងមានដីទំនាស់ផ្សេងទៀត ក្នុងស្រុកម៉ាឡៃ ក៏ដូចជានៅខេត្តផ្សេងទៀត។ ប៉ុន្តែលោកអះអាងថា អាជ្ញាធរ និងជំនាញ នឹងសហការជាមួយស្ថាប័នអយ្យការអមសាលាដំបូងខេត្តបន្ទាយមានជ័យ ចាត់វិធានការផ្លូវច្បាប់លើចលនាទៅរំលោភយកដី លោក លី អ៊ុតនី នៅភូមិអូរអំពិល ក៏ដូចជា នៅភូមិផ្សេងទៀត ក្នុងឃុំទួលពង្រ និងឃុំតាគង់ នៅថ្ងៃខាងមុខនេះ៕
Source: Kampuchea Thmey Daily
0 Comments