ស្ទឹងត្រែង ៖ ក្មេងស្រីម្នាក់ អាយុទើបតែ៥ឆ្នាំ បានស្លាប់ភ្លាមៗ ចំថ្ងៃ នៃសេចក្ដីស្រឡាញ់ ធ្វើឲ្យម្ដាយបានត្រឹមយំសោកស្ដាយ ព្រោះអ្វីៗបានហួសពេលទៅហើយ ដោយសារការធ្វេសប្រហែស និងខ្វះការប្រុងប្រយ័ត្ន ខណៈជិះម៉ូតូ វាក់នឹងរថយន្តបែនដឹកដី ហើយចាប់ហ្វ្រាំងបណ្ដាលឲ្យដួល ធ្វើឲ្យកូនស្រីខ្ទាតចូលទៅក្រោមកង់ឡានកិនបែកក្បាលធ្លាយខួរស្លាប់ភ្លាមៗតែម្ដង និងម្នាក់របួសស្រាល។
ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោងប្រមាណ៥និង៣០នាទី ថ្ងៃទី១៤ កុម្ភៈ ថ្ងៃនៃសេចក្ដីស្រលាញ់ ត្រង់ចំណុចផ្លូវបែកជាបួន ខាងមុខផ្ទះសំណាក់មេគង្គ ក្នុងភូមិរាជានុកូល សង្កាត់ក្រុង/ខេត្តស្ទឹងត្រែង។
សមត្ថកិច្ចចរាចរណ៍ផ្លូវគោកបានឲ្យដឹងថា ជនរងគ្រោះជាក្មេងស្រីដែលត្រូវបាត់បង់ជីវិតនោះមាន១-ឈ្មោះ គ្រី សុឆៃដា ភេទស្រី អាយុ៦ឆ្នាំ (ស្លាប់)។ ២-ឈ្មោះ រៀម សុផល ភេទស្រី អាយុ២០ឆ្នាំរបួសស្រាល និង ២នាក់ទៀត មិនត្រូវបានរងរបួសនោះទេ។ ជនរងគ្រោះទាំងបួននាក់ រស់នៅភូមិគីឡូ៨ សង្កាត់សាមគ្គី ក្រុងស្ទឹងត្រែង។
សមត្ថកិច្ចចរាចរណ៍បានបន្តឲ្យដឹងទៀតថា នៅមុនកើតហេតុនោះ គេបានឃើញរថយន្តបែន ដឹកដីពណ៌ខៀវ ម៉ាកកូរ៉េ២តោនកន្លះ ពាក់ស្លាកលេខ ស៊េរីចាស់៨០៦៨០ ភ ព ៣ បើកបរឆ្លងកាត់ចំណុចផ្លូវខ្វែងជាបួន មុខផ្ទះសំណាក់មេគង្គ ពេលឆ្លងជិតផុតផ្លូវកៅស៊ូ ចូលផ្លូវលំ ក៏មានម៉ូតូម៉ាកហុងដាស៊េរី០៩ ជិះគ្នា៤នាក់ បើកបរក្នុងទិសដៅពីត្បូងមកជើង ជិះវាក់នឹងរថយន្តបែនដឹកដី ជាន់ហ្វ្រាំងប៉ះដៃចង្កូត ធ្វើឲ្យដួលក្មេងស្រីរងគ្រោះបានខ្ទាតចូលក្រោមកង់ឡានខាងក្រោយ កិនបែកក្បាលធ្លាយខួរស្លាប់ភ្លាមៗតែម្តង។ ចំណែកអ្នកបើកបររបួសស្រាល ហើយ២នាក់ទៀត រួចផុតពីគ្រោះថ្នាក់។
ក្រោយកើតហេតុ ត្រូវបានកម្លាំងសមត្ថកិច្ចចុះមកធ្វើការវាស់វែងនាំយករថយន្ត និងម៉ូតូ ទៅកាន់ស្នងការដ្ឋាននគរបាលខេត្ត ដើម្បីចាត់ការតាមនីតិវិធី។ ចំណែកតៃកុងរថយន្ត កំពុងត្រូវបានឃាត់ខ្លួននៅក្នុងស្នងការដ្ឋាននគរបាលខេត្ត។ រីឯសាកសព ត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments