ព្រះសីហនុ ៖ មនុស្សស្រីចំណាស់ម្នាក់ បានស្លាប់ភ្លាមៗនៅកន្លែងកើតហេតុ ខណៈមនុស្សស្រីម្នាក់ទៀតបានរងរបួសធ្ងន់ ហើយបានស្លាប់នៅមន្ទីរពេទ្យ ក្នុងករណីគ្រោះថ្នាក់ចរាចរណ៍ រថយន្តបុកជាមួយម៉ូតូ ក្នុងទិសដៅបញ្ច្រាសគ្នា។
ករណីគ្រោះថ្នាក់ចរាចរណ៍ដ៏គួរឲ្យរន្ធត់នេះបានកើតមានឡើងនៅវេលាម៉ោង១៧និង៣០នាទី ថ្ងៃទី១៤ ខែកុម្ភៈ ឆ្នាំ២០១៩ លើផ្លូវជាតិលេខ៤ ចន្លោះគីឡូម៉ែត្រ ១៨៩-១៩០ ស្ថិតនៅក្នុងភូមិព្រៃនប់២ ឃុំព្រៃនប់ ស្រុកព្រៃនប់ ខេត្តព្រះសីហនុ។
សមត្ថកិច្ចបានឲ្យដឹងថា គ្រោះថ្នាក់នេះបង្កឡើងដោយរថយន្ត១គ្រឿង ម៉ាក HINO ពណ៌ ក្រហម ពាក់ស្លាកលេខភ្នំពេញ៣A-២២២៣ បើកបរដោយ ឈ្មោះ ជឿន សាមឌី ភេទប្រុស អាយុ២២ឆ្នាំ មុខរបរ អ្នកបើកបររថយន្ត មានទីលំនៅភូមិអង្គក្លើ ឃុំត្បែង ស្រុកកណ្ដាលស្ទឹង ខេត្តកណ្ដាល ទិសដៅពីភ្នំពេញ ឆ្ពោះមកខេត្តព្រះសីហនុ លុះដល់ចំណុចខាងលើ បានបុកនឹងម៉ូតូ០១គ្រឿង ម៉ាក WAVE ពណ៌ក្រហម គ្មានស្លាកលេខ បើកបរដោយ ឈ្មោះ ថាច់ ញឹង ភេទស្រី អាយុ៦៨ឆ្នាំ មុខរបរនៅផ្ទះ មានអ្នករួមដំណើរម្នាក់ ឈ្មោះ ថាច់ សៀន ភេទស្រី អាយុ៦៥ឆ្នាំ មុខរបរនៅផ្ទះ អ្នកទាំងពីរមានទីលំនៅភូមិបែកក្រុង ឃុំព្រៃនប់ ស្រុកព្រៃនប់ ខេត្តព្រះសីហនុ។
សមត្ថកិច្ចបានឲ្យដឹងទៀតថា ស្ត្រីរងគ្រោះទាំង២នាក់នេះ ម្នាក់ដែលស្លាប់នៅកន្លែងកើតហេតុ ដៃ ជើង និងដងខ្លួន ត្រូវរថយន្តកិនបែកខ្ទេច ហើយអ្នកបើកម៉ូតូ និងអ្នកជិះ មិនពាក់មួកសុវត្ថិភាពទេ។
សមត្ថកិច្ចបានឲ្យដឹងទៀតថា ក្រោយកើតហេតុ អ្នកបើករថយន្តបង្ក ត្រូវបានប្រជាពលរដ្ឋសហការគ្នាចាប់ឃាត់ខ្លួនបានប្រគល់ឲ្យសមត្ថកិច្ចផងដែរ។
សមត្ថកិច្ចបានបន្តឲ្យដឹងទៀតថា សពស្ត្រីទាំង២នាក់នេះ មាន ៖
១-ឈ្មោះ ថាច់ ញឹង អ្នកបើកបរម៉ូតូ រងរបួសធ្ងន់ បានបញ្ជូនទៅសង្គ្រោះគ្លីនិកលិគឹមឌី វាលរេញ ក្រោយមកស្លាប់។
២-ឈ្មោះ ថាច់ សៀន អ្នករួមដំណើរលើម៉ូតូ ស្លាប់នៅនឹងកន្លែងកើតហេតុ។
បច្ចុប្បន្ន សាកសពជនរងគ្រោះទាំងពីរ បានប្រគល់ជូនទៅឲ្យក្រុមគ្រួសារយកទៅធ្វើបុណ្យតាមប្រពៃណី។ ចំណែកអ្នកបើកបររថយន្ត ត្រូវបានឃាត់ខ្លួនបញ្ជូនទៅអធិការដ្ឋាននគរបាលស្រុកព្រៃនប់ រួមទាំងវត្ថុតាង៕
Source: Kampuchea Thmey Daily
0 Comments