សៀមរាប ៖ រថយន្តរបស់អតតីរបស់បងធំទី២គឺលោកនួនជា ក្នុងអំឡុងឆ្នាំ១៩៧៥ដែលពេលនេះបានបាត់បង់រូបឆោមស្ទើតែមើលលែងស្គាល់ទៅហើយនោះគឺឥឡូវរថយន្តនេះបានមកដល់ដៃអ្នកអភិរក្សបឹងពារាំងនៅទឹកដីអង្គរទៅហើយនោះ។តើអាចនឹងក្លាយជារបស់បេតិកភណ្ឌ បានទេ?
រថយន្តនេះថ្វីត្បិត មានអាយុកាល៤៤ឆ្នាំ ហើយបានបាត់បង់រូបឆោម និងមិនអាចដំណើរការបានស្រួលដូចដើម ពិសេសទៅទៀត វាក៏នៅមិនទាន់ក្លាយទៅជារបស់បេតិកភណ្ឌក៏ពិតមែន ប៉ុន្តែវានៅតែដិតដាមក្នុងអារម្មណ៍កែវភ្នែក របស់ថៅកែសណ្ឋាគារលំដាប់ផ្កាយ៥ នៅខេត្តសៀមរាប និងបុរសក្រៅប្រទេសម្នាក់ទៀតនៅឡើយ។
រថយន្តនេះម៉ាកFORD GRANADA ផលិតនៅសហរដ្ឋអាមេរិក ក្នុងឆ្នាំ១៩៧០។ រថយន្តនេះត្រូវបានអះអាងថា ពីដើមឡើយមានពណ៌ក្រហមក្រម៉ៅ(ឈាមជ្រូក)បច្ចុប្បន្នពណ៌ខ្មៅ។ មុនពេលមកលាក់ខ្លួននៅទឹកដីខេត្តសៀមរាប ក៏បានឆ្លងកាត់ការគ្រប់គ្រងថែរក្សា ម្ចាស់ពី២ទៅ៣នាក់រួចមកហើយដែរ។
សូមស្តាប់ការបរិយាយ ពីការវិវឌ្ឍន៍របស់រថយន្តខាងលើ អំពីព្រះតេជគុណ ព្រះនាមតាត មហាទី ព្រះចៅអធិការវត្តព្រះឥន្ទកោសារ។ ព្រះអង្គបានឲ្យដឹងថា រថយន្តខាងលើនេះពីដើមឡើយជាកម្មសិទ្ធរបស់លោក នួន ជា។ នៅពេលបន្ទាប់រថយន្តនេះ ក៏ក្លាយទៅជារបស់សម្តេចជា ស៊ីម ប្រើប្រាស់រហូត។ លុះអំឡុងពេលជាង១០ឆ្នាំមុន កូនសិស្សរបស់ព្រះអង្គ បានយកមកប្រគល់ឲ្យព្រះអង្គថែរក្សា និងសម្រាប់បើកជូនរាល់ពេលសម្តេចសង្ឃទេព វង្ស និមន្តមកសៀមរាបម្តងម្កាល។ លុះក្រោយមកដោយរថយន្តមានសភាពទ្រុឌទ្រោម ព្រះអង្គក៏បានគ្របទុកនៅក្នុងវត្តខាងលើ។ ជាមួយគ្នានោះក៏មានថៅកែសណ្ឋាគារធំៗនៅសៀមរាប មកសុំប្តូរ យករថយន្តនេះទៅជួសជុលសម្រាប់ដឹកភ្ញៀវប្រចាំសណ្ឋាគារ ដោយទិញរថយន្តថ្មីផ្សេង ថ្វាយព្រះអង្គវិញ ត្បិតរថយន្តនេះ ជារបស់ដែលកម្រ។ ប៉ុន្តែព្រះអង្គមិនព្រមដូរទេគឺរក្សាទុករហូតមក។
ព្រះចៅអធិការបន្តថា ក្នុងថ្ងៃមួយក៏បានជួបលោកគង់ មង្គល ប្រធានសហគមន៍បឹងពារាំង ហើយដឹងថា ជាក្មួយសម្តេចសង្ឃទេព វង្ស ព្រះអង្គក៏បានប្រគល់រថយន្តនេះ ដើម្បីយកទៅជួសជុលថែរក្សានិងសម្រាប់ជូនដំណើរពេលសម្តេចសង្ឃ និមន្តមកសៀមរាបម្តងម្កាល។
លោកគង់ មង្គល ប្រធានសហគមន៍បឹងពារាំង ក៏បានឲ្យដឹងដែរថា ក្រោយពេលទទួលរថយន្តនេះ លោកក៏បានយកទៅកាន់យានដ្ឋានមួយ ដើម្បីរៀបចំជួសជុលឲ្យក្លាយទៅជារថយន្តថ្មីនិងដូចដើមវិញ។ រថយន្តនេះត្រូវប្តូរម៉ាស៊ីនថ្មី និងបាញ់ថ្នាំថ្មី ឲ្យត្រូវពណ៌ដូចដើមវិញ(ក្រហមក្រម៉ៅ)។ លោកថា អាចចំណាយទឹកប្រាក់ពី៥ទៅ៦ពាន់ដុល្លារ។
លោកគង់ មង្គល បញ្ជាក់ថា មុនពេលរូបលោកយករថយន្តនេះចូលក្នុងយានដ្ឋាន ក៏ស្រាប់តែមានជនបរទេសម្នាក់ តាមរយៈមគ្គុទេសន៍ មកសុំទិញដោយឲ្យតម្លៃ៤ម៉ឺនដុល្លារអាមេរិក។ ប៉ុន្តែលោកសម្រេចថា មិនអាចលក់បានឡើយ គឺរក្សាទុកឲ្យក្លាយជារបស់បេតិកភណ្ឌ។ លោកបញ្ជាក់ថា បើគិតអំពីតម្លៃដែលគេសុំទិញ វាពិតជាថ្លៃណាស់ ពីព្រោះរថយន្តចាស់អស់ទៅហើយ ម្យ៉ាងវិញទៀត បើយើងចង់លក់ឲ្យអ្នកទិញជិះ គឺគ្មាននរណាទិញនោះទេ។ ប៉ុន្តែវាជារបស់ដែលស្ទើរតែគ្មាន នៅក្នុងប្រទេសកម្ពុជា ចឹងទេសុំរក្សាទុកឲ្យក្លាយជារបស់បេតិកភណ្ឌចុះ។
ចំណែកម្ចាស់យានដ្ឋាន ដែលសុំមិនបង្ហាញទីតាំងនិងឈ្មោះ ក៏បានបញ្ជាក់ថា លោកនឹងរៀបចំឲ្យរួចរាល់ជាស្ថាពរ ក្នុងរយៈពេលជាង១ខែ។ រថយន្តនេះនឹងត្រូវប្តូរដាក់ម៉ាស៊ីនចាស់ចេញ មកដាក់ម៉ាស៊ីន ថ្មីវិញ ហើយរៀបប្រព័ន្ធភ្លើងជាថ្មីទាំងអស់។ ចំណែកថ្នាំ ក៏ត្រូវបាញ់ពណ៌ដើមវិញផងដែរ។ ធ្វើយ៉ាងណាឲ្យមើលពីខាងក្រៅ ដូចដើមវិញទាំងអស់។
តាមសម្តី ក្រុមមិត្តភក្តិ និងមន្ត្រីសមាជិកសហគមន៍បឹងពារាំង បានបង្ហាញពីភាពកោតសរសើរ អំពីជំហរដែលប្រធានសហមគន៍រូបនេះ មិនត្រូវការលុយ ហើយព្យាយាមរក្សារបស់ដែលកម្រឲ្យនៅគង់វង្ស ដោយមិនឲ្យធ្លាក់ទៅក្នុងដៃអ្នកដទៃនោះឡើយ៕
Source: Kampuchea Thmey Daily
0 Comments