ភ្នំពេញ ៖ ក្រសួងសុខាភិបាលគ្រោងនឹងបង្កើតមជ្ឈមណ្ឌលចាក់ថ្នាំបង្ការជំងឺឆ្កែឆ្កួតមួយកន្លែងទៀតនៅខេត្តកំពង់ចាមដើម្បីជួយសម្រួលដល់ប្រជាពលរដ្ឋរស់នៅខេត្តភាគឥសាន្តទៅទទួលវ៉ាក់សាំងការពារជំងឺនេះបានគ្រប់ៗគ្នា។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាលបានមានប្រសាសន៍ថាការបង្កើតមជ្ឈមណ្ឌលចាក់ថ្នាំបង្ការជំងឺឆ្កែឆ្កួតនៅខេត្តកំពង់ចាមនេះគឺក្រសួងសុខាភិបាលបានធ្វើការពិភាក្សាជាមួយវិទ្យាស្ថានប៉ាស្ទ័ររួចរាល់ហើយ ដើម្បីបង្កលក្ខណៈងាយស្រួលដល់ប្រជាពលរដ្ឋដែលរស់នៅខេត្តមណ្ឌលគីរី រតនគីរី ក្រចេះនិងខេត្តស្ទឹងត្រែងទៅទទួលវ៉ាក់សាំងនេះដោយមិនចាំបាច់ធ្វើដំណើរមកទីក្រុងភ្នំពេញដូចមុនទៀតឡើយ។
គំរោងបង្កើតមជ្ឈមណ្ឌលថ្មីនេះ បន្ទាប់ពីមានប្រជាពលរដ្ឋរាប់ពាន់នាក់បានសម្រុកមកចាក់ថ្នាំបង្ការជំងឺឆ្កែឆ្កួតនៅវិទ្យាស្ថានប៉ាស្ទ័រយ៉ាងច្រើនកកកុញបន្ទាប់ពីមានករណីក្មេងស្រីម្នាក់អាយុ១១ឆ្នាំធ្លាប់មានប្រវត្តិត្រូវសត្វឆ្មាខ្វាចកាលពីខែធ្នូឆ្នាំ២០១៨កន្លងទៅហើយបានទទួលមរណភាពកាលពីពេលថ្មីៗនេះ។
លោកស្រីវេជ្ជបណ្ឌិតបានពន្យល់ថា នៅពេលដែលសត្វឆ្មាខ្វាចឬឆ្កែខាំទៅលើមនុស្សណាម្នាក់មិនមែនមានន័យថា មានឆ្លងជំងឺឆ្កែឆ្កួតទាំងអស់នោះទេ លុះត្រាតែសត្វឆ្មា ឬ ឆ្កែនោះមានជំងឺនិងមានសភាពខុសប្លែកពីធម្មតាដូចជាភ្នែកឡើងក្រហម មានហៀរទឹកមាត់ ទម្លាក់កន្ទុយ ចេះតែដើរខាំគេឯង ហើយស្នាមដែលខាំនោះមានដំដៅធំជ្រៅជាដើម។
លោកស្រីវេជ្ជបណ្ឌិតបានបន្តថា ប៉ុន្តែបើឆ្កែឬឆ្មានោះមិនមានជំងឺពេលខាំឬខ្វាចក៏មិនមានឆ្លងជំងឺឆ្កែឆ្កួតដែរ តែត្រូវមកចាក់ថ្នាំការពារជំងឺឆ្កែឆ្កួតនិងជំងឺតេតាណូសនៅវិទ្យាស្ថានប៉ាស្ទ័រ រីឯអ្នករស់នៅខេត្តខេត្តប៉ៃលិន,បន្ទាយមានជ័យ,សៀមរាបនិងពោធិ៍សាត់ត្រូវទៅចាក់ថ្នាំបង្ការការពារជំងឺនេះនៅមជ្ឈមណ្ឌលចាក់វ៉ាក់សាំងជំងឺឆ្កែឆ្កួតដែលស្ថិតនៅក្នុងមន្ទីរពេទ្យបង្អែកខេត្តបាត់ដំបង។
ជាមួយគ្នានេះដែរ លោកស្រីរដ្ឋលេខាធិការបានស្នើសុំដល់អ្នកដែលមិនទាន់ឆ្កែខាំឬឆ្មាខ្វាចនិងអ្នកដែលមានឆ្កែឬឆ្មាខ្វាចយូរថ្ងៃហើយមិនមានចេញរោគសញ្ញាហានិភ័យឬគ្រាន់តែឆ្កែរត់បុកដែលមិនមានមុតរបួសអ្វីនោះត្រូវរង់ចាំបន្តិចដោយទុកឱកាសឲ្យអ្នកដែលមានហានិភ័យខ្ពស់ដូចជាអ្នកដែលត្រូវសត្វឆ្មាខ្វាចឬឆ្កែខាំមានចេញរោគសញ្ញាហានិភ័យ ស្ត្រីមានផ្ទៃពោះនិងអ្នកដែលត្រូវចាក់ទៅតាមកាលកំណត់ដូសនៃវ៉ាក់សាំងដើម្បីចៀសវាងកុំឲ្យមានរង់ចាំកកកុញនៅវិទ្យាស្ថានប៉ាស្ទ័រ។
ចំណែកវិទ្យាស្ថានប៉ាស្ទ័របានចេញសេចក្តីជួនដំណឹងមួយសូមអភ័យទោសដល់សាធារណជនដែលរង់ចាំយូរក្នុងការមកទទួលការចាក់វ៉ាក់សាំងនេះហើយវិទ្យាស្ថានកំពុងតែព្យាយាមឲ្យបានល្អបំផុតសម្រាប់អ្នកគ្រប់គ្នានិងសូមផ្តល់អាទិភាពដល់អ្នកដែលអញ្ជើញមកចាក់លើកទី២និងទី៣និងអ្នកដែលមានរបួសដោយឆ្កែខាំធ្ងន់ធ្ងរ កុមារ ព្រះសង្ឃ មនុស្សចាស់និងស្ត្រីមានផ្ទៃពោះ។
លោកវេជ្ជបណ្ឌិត លី សុវត្ថិ អនុប្រធានវិទ្យាស្ថានប៉ាស្ទ័រកម្ពុជាធ្លាប់បានឲ្យដឹងថាមេរោគជំងឺឆ្កែឆ្កួត ចម្លងទៅមនុស្សតាមរយ:ទឹកមាត់ពេលសត្វទាំងនោះខាំលើមនុស្សហើយជំងឺនេះមិនទាន់មានថ្នាំព្យាបាលទេប៉ុន្តែមានថ្នាំចាក់បង្ការយ៉ាងមានប្រសិទ្ធភាពបំផុតក្រោយពីសត្វខាំភ្លាមៗ។
លោកវេជ្ជបណ្ឌិតបានបន្តថាពេលឆ្កែខាំត្រូវលាង និង ដុសសម្អាតរបួសភ្លាមៗជាមួយសាប៊ូ និង ទឹករយៈពេល ១៥ នាទី ហាមដាក់ម្ទេសឬទឹកផ្លែឈើនៅលើរបួស កុំបិទរបួសជាមួយក្រណាត់ឬបង់រុំនិងកុំដេររបួសត្រូវបញ្ជូនអ្នកជំងឺទៅគ្រឹះស្ថានសុខាភិបាលឲ្យបានឆាប់តាមដែលអាចធ្វើបានសម្រាប់ការព្យាបាលនិងការចាក់វ៉ាក់សាំងបន្ថែម។
តាមការបញ្ជាក់របស់វិទ្យាស្ថានប៉ាស្ទ័របានឲ្យដឹងថា ឆ្នាំ២០១៨មានជនរងគ្រោះដោយសត្វខាំដែលភាគច្រើនសត្វឆ្កែនិងឆ្មាចំនួន២៦០៦៦នាក់ ដែលចំនួននេះមានការកើនឡើងលើសពីឆ្នាំ២០១៧ដែលមានត្រឹមតែ២២៤២១នាក់ប៉ុណ្ណោះ។
តាមការប៉ាន់ស្មានរបស់វិទ្យាស្ថានប៉ាស្ទ័រកម្ពុជានៅឆ្នាំ២០០៧បានបង្ហាញថា កម្ពុជាមានអ្នកស្លាប់ដោយសារជំងឺឆ្កែឆ្កួតប្រមាណ៨០០នាក់ក្នុងមួយឆ្នាំៗ៕
Source: Kampuchea Thmey Daily
0 Comments