បាត់ដំបង ៖ ក្រោយពីកម្ពុជាថ្មី បានចុះផ្សាយអត្ថបទ១ ដែលដាក់ចំណងជើងថា «បែកធ្លាយរឿងមេគយច្រកទ្វារអន្តរជាតិដូងក្នុងស្រុកកំរៀងខេត្តបាត់ដំបងកេងប្រវ័ញ្ចថវិការដ្ឋតាមរយៈទំនិញគេចពន្ធឬបង់ពន្ធមិនគ្រប់»នោះ, លោកឡេង.សុខ ដែលជាអតីតអនុការិយាល័យទទួលបន្ទុកប្រមូលថវិកាចូលរដ្ឋ បានប្រតិកម្មថា ការចុះផ្សាយនេះ មិនពិតដូចប្រភព ដែលចេញពីផ្ទៃក្នុងរបស់លោកមួលបង្កាច់នោះឡើយ ពោលគេធ្វើឡើងក្នុងគោលបំណងចង់បានអំណាចពីលោកតែប៉ុណ្ណោះ លោកមិនបានប្រព្រឹត្តដូចការចោទប្រកាន់នោះទេ។
លោកឡេង .សុខ បានបញ្ជាក់ នៅរសៀលថ្ងៃទី១៨ ខែកុម្ភៈ ឆ្នាំ២០១៩នេះថា រឿងរ៉ាវ ដែលកម្ពុជាថ្មីចុះផ្សាយ កាលពីប៉ុន្មានម៉ោងមុននេះ វាជារឿងមន្ត្រីនៅបម្រើការជាមួយលោក បានកាច់កុងមួលបង្កាច់បែបទំនាស់ផ្ទៃក្នុងតែប៉ុណ្ណោះ។
លោកថាចំពោះរូបលោកផ្ទាល់មិនបានប្រព្រឹត្តបែបនេះទេ ផ្ទុយទៅវិញអ្នកដែលបកអាក្រាតលោកទៅវិញទេគឺជាអ្នកលោភលន់ចង់បានអំណាច ដោយលោកនិយាយចំៗឈ្មោះមន្ត្រីនោះតែម្ដង។ លោកបន្តថា ហេតុអី បានមន្ត្រីរូបនោះ ចងកម្មពៀរឈ្នានីសជាមួយលោកទៀត បើលោកបានផ្លាស់ពីកន្លែងចាស់ទៅហើយកាលពីពាក់កណ្តាលខែ១២ ឆ្នាំ២០១៨មកម្ល៉េះ គឺដូរទៅខេត្តកំពង់ធំ។
លោកបន្តថា មន្ត្រីរូបនោះមានការឈ្នានីសលោកតាំងពីលោកនៅកាន់តំណែងចាស់មកម្ល៉េះដោយសារតែមន្ត្រីរូបនោះចង់បានតំណែងស្ដីទីពេក ទើបអ្វីក៏ហ៊ាននិយាយមួលបង្កាច់លោកដែរ។ ករណីនេះ បើទោះជា លោកឡេង.សុខបានប្រាប់ឈ្មោះមន្ត្រីនោះចំៗក៏ដោយចុះ តែកម្ពុជាថ្មីពុំយកឈ្មោះមន្ត្រីនោះដាក់ក្នុងអត្ថបទឆ្លើយបំភ្លឺឡើយ ដោយរក្សាសិទ្ធិបុគ្គល១រយៈសិនព្រោះភ្លាមៗកម្ពុជាថ្មីមិនអាចស្វែងរកលេខទូរស័ព្ទមន្ត្រីរូបនោះបាននៅឡើយ៕
Source: Kampuchea Thmey Daily
0 Comments