ភ្នំពេញ ៖ លោកស្រី ម៉ាណ ណាវី អ្នកតំណាងរាស្ត្រមណ្ឌលភ្នំពេញ និងតំណាងលោក អូស្មាន ហាស្សាន់ ទេសរដ្ឋមន្ដ្រី ទទួលបន្ទុកបេសកកម្មពិសេស បានជួបសំណេះសំណាល ផ្តល់ដំបូន្មាន ដល់ក្មួយៗ កុមារា កុមារី ជាសិស្សានុសិស្សខ្មែរឥស្លាមក្រីក្រ ដែលកំពុងសិក្សា៧០នាក់ ដោយបាននាំយកនូវអំណោយសម្បុរសធម៌ ជាកាតាបស្ពាយ សៀវភៅ ប៊ិចខ្មៅដៃ និងសម្ភារៈសិក្សា ជាច្រើនទៀត ផ្ដល់ជូន ក្មួយៗ ដើម្បីបានសិក្សាដែលកំពុង ត្រូវការ និងមានការខ្វះខាត។
ពិធីចែកអំណោយនេះ បានប្រព្រឹត្តទៅកាលពីថ្ងៃសុក្រ ១១កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១៥ ខែកុម្ភៈ ឆ្នាំ២០១៩ ស្ថិតនៅសាលាបឋមសិក្សាច្រាំងចំរេះ២ ខណ្ឌឫស្សីកែវ រាជធានីភ្នំពេញ។
លោកស្រី ម៉ាណ ណាវី បានផ្តាំផ្ញើដល់ប្អូនៗកុមារា កុមារី ជាសិស្សានុសិស្ស ទាំងអស់ត្រូវខិតខំប្រឹងរៀនសូត្រ ដើម្បីអនាគតរបស់ខ្លួន គ្រួសារ និងសង្គមជាតិ។
ព្រោះក្មួយៗ ជាទំពាំស្នងឫស្សី បើប្អូនៗខិតខំសិក្សារៀនសូត្រ នោះប្អូនៗ ទទួលបាន ភាពជាអ្នកដឹកនាំ និងទទួលបានអនាគត ល្អទៅថ្ងៃមុខជាក់ជាមិនខាន។
លោកស្រីបន្តថា បច្ចុប្បន្ន ប្រទេសជាតិ មានសុខសន្ដិភាព ពេញលេញ ប្រជាពលរដ្ឋមាសិទ្ធិសេរីភាពប្រកបមុខរបរ ដោយ មិនរើសអើង ការរស់នៅក្រោមដំបូលសន្ដិភាព មិនប្រកាន់ ពូជសាសន៍ ភាសាពណ៌ សម្បុរ អ្វីឡើយ។ នេះ ដោយសារក្រោមការដឹកនាំរបស់សម្តេចតេជោ ហ៊ុនសែន នាយករដ្ឋមន្ត្រីប្រទេសជាតិ មានការរីកចម្រើនឥតឈប់ឈរ ដែលសង្គមយើងកាន់តែត្រូវការធនធានមនុស្ស ដើម្បីបំពេញសេចក្តីត្រូវការក្នុងសម័យកាលសកលភាវូបនីយកម្ម។ ដូចនេះគឺជាឱកាសដ៏មានតម្លៃសម្រាប់ប្អូនៗ ទាំងអស់គ្នាដែលជាទំពាំងស្នងឫស្សី ត្រូវចាប់ផ្តើមកសាងខ្លួនពីពេលនេះតទៅ ជាពិសេសការពង្រឹងសមត្ថភាព ខិតខំរៀនសូត្រ ចេះមានទំនាក់ទំនងសាមគ្គី ភាពជាមួយអ្នកនៅជុំវិញខ្លួន ជាមួយមិត្តភក្តិរួមថ្នាក់ រួមសាលា រួមសហគមន៍ ត្រូវធ្វើជាសិស្សល្អ កូនល្អ សិស្សគំរូ ស្តាប់ដំបូន្មានលោកគ្រូ អ្នកគ្រូ និងមាតាបិតា ។ កត្តាសំខាន់ៗទាំងអស់នេះដែលសង្គមជាតិកំពុងត្រូវការមិនអាចខ្វះបាន៕
Source: Kampuchea Thmey Daily
0 Comments