ភ្នំពេញ ៖ លោក សាស្ត្រាចារ្យ ម៉ម ប៊ុហេង រដ្ឋមន្ត្រីក្រសួងសុខាភិបាលបានអំពាវនាវឲ្យប្រជាពលរដ្ឋពិសេសកុមារនិងមនុស្សវ័យចំណាស់ ត្រូវពិសារទឹក ស្អាតឲ្យបានច្រើន គ្របទុកដាក់ចំណីអាហារឲ្យបានត្រឹមត្រូវ សំអាតសម្ភារៈប្រើប្រាស់ឲ្យបានស្អាតនិងឧស្សាហ៍លាងដៃនឹងសាប៊ូដើម្បីការពារការឆ្លងជំងឺដង្កាត់ផ្សេងៗពិសេសជំងឺរាករូស រាកមួល ឬ អាសន្នរោគ។
ជាមួយគ្នានេះដែរ លោករដ្ឋមន្ត្រីបានណែនាំដល់ប្រជាពលរដ្ឋត្រូវរក្សាខ្លួនឲ្យត្រជាក់ ជ្រកក្រោមម្លប់ឲ្យបានច្រើន ជៀសវាងនៅក្រោមថ្ងៃផ្ទាល់ ស្លៀកពាក់សំលៀកបំពាក់ ស្តើង ស្រាល និងមានពណ៌ភ្លឺ ងូតទឹកត្រជាក់ ឬទឹកធម្មតាឲ្យបានញឹកញាប់ ត្រូវផឹកទឹកឲ្យលើសពីពេលធម្មតា ជៀសវាងពិសារស្រានិងទឹកដែលមានកំហាប់ស្ករខ្ពស់។
ការអំពាវនាវនេះបានធ្វើឡើងបន្ទាប់ពីក្រសួងធនធានទឹកនិងឧតុនិយមបានប្រកាសថា នៅរដូវប្រាំងនេះអាកាសធាតុអាចក្តៅខ្លាំងខុសពីធម្មតា ដោយមានសីតុណ្ហភាពអតិបរមាចាប់៤០រហូតទៅ៤២អង្សា ដែលធ្វើឲ្យប្រជាពលរដ្ឋរស់នៅតំបន់ជនបទមួយចំនួនប្រឈមនឹងការខ្វះទឹកប្រើប្រាស់ដោយសារប្រភពទឹករីងស្ងួត។
លោកសាស្ត្រាចារ្យម៉ម ប៊ុនហេង បានមានប្រសាសន៍ថា នៅពេលដែលអាកាសធាតុក្តៅខ្លាំងងាយធ្វើឲ្យប្រជាពលរដ្ឋមានកើតជំងឺមួយចំនួនដូចជាជំងឺរលាកស្បែកដោយសារកំដៅថ្ងៃ ឈឺភ្នែក ផ្តាសាយ រាករូស ជំងឺសើស្បែក ជំងឺគ្រុនឈាមនិងជំងឺផ្លូវដង្ហើម រមូលក្រពើ វិវត្តន៍ទៅជាជំងឺអស់កម្លាំងល្ហិតល្ហៃ និងការដួលសន្លប់ដែលធ្វើឲ្យអ្នកជំងឺមានអាការៈបែកញើសខ្លាំង ខ្សោយកម្លាំង ខ្លួនត្រជាក់ ស្លេកស្លាំង ជីពចរដើរញាប់ ឬ ក្អួតចង្អោរផងដែរ។
លោក រដ្ឋមន្ត្រីបានបន្តថា បើមានបញ្ហាសុខភាពដែលបណ្តាលឲ្យមានរាក ក្អួត ក្តៅខ្លួន និងសន្លប់ត្រូវប្រញាប់បញ្ជូនអ្នកជំងឺទៅកាន់មណ្ឌលសុខភាព ឬ មន្ទីរពេទ្យដែលនៅជិតផ្ទះបំផុតដើម្បីឲ្យគ្រូពេទ្យពិនិត្យនិងព្យាបាលជំងឺឲ្យបានទាន់ពេលវេលា។
ចំណែកនាយកដ្ឋានប្រយុទ្ធនឹងជំងឺឆ្លង បានចេញសេចក្តីណែនាំមួយដល់សាធារណជនចូលរួមបង្ការសុខភាពនៅក្នុងអំឡុងពេលអាកាសធាតុក្តៅផងដែរក្នុងនោះរួមមាន១. ពិសារទឹកឲ្យបានច្រើនដោយបង្កើនការទទួលទានជាតិទឹកឆ្អិនឲ្យបានច្រើននិងញឹកញាប់តាមដែលអាចធ្វើទៅបាន ដោយមិនត្រូវរង់ចាំរហូតដល់ស្រេកទឹកទេ។ កុំពិសាវត្ថុរាវដែលមានជាតិអាល់កុល ឬ ជាតិស្ករច្រើនពេក ពីព្រោះសារធាតុទាំងនេះបង្កឲ្យអ្នកកាន់តែបាត់បង់ជាតិទឹកច្រើន។ ជៀសវាងកុំពិសាភេសជ្ជៈត្រជាក់ខ្លាំងពីព្រោះវាអាចបណ្តាលឲ្យរមូលក្រពះ។
២. ការបែកញើសច្រើនហូរចេញអំបិលនិងសារធាតុរ៉ែចេញពីរាងកាយរបស់អ្នកដែលត្រូវតែបង្គ្រប់វិញ។ ប្រសិនបើអ្នក ហាត់ប្រាណចូរពិសារទឹកភេសជ្ជៈឬទឹកមានជាតិរ៉ែឲ្យបានពីរទៅបួនកែវរៀងរាល់១ម៉ោងម្តង មិនត្រូវពិសារជាតិអាល់កុលឡើយ។
៣. ស្លៀកពាក់សំលៀកបំពាក់ស្តើងៗ ឬមានពណ៌ស្រាលនិងស្លៀកពាក់រលុង និងលាបឡេការពារកម្តៅថ្ងៃ បើអាវធ្វើទៅបាន។ ការរលាកស្បែកដោយសារពន្លឺព្រះអាទិត្យប៉ះពាល់ដល់រាងកាយនិងធ្វើឲ្យរាងកាយបាត់បង់ជាតិទឹក។ វាក៏បណ្តាលឲ្យស្បែកមានការឈឺចាប់និងខូចស្បែកផងដែរ។ ប្រសិនបើអ្នក ចេញក្រៅចូរការពារខ្លួនអ្នកពីព្រះអាទិត្យដោយពាក់មួកធំទូលាយ និង វ៉ែនតាការពារ។ ស្លៀកពាក់ឲ្យទារកនិងកុមារខោអាវស្តើង ពណ៌ស្រាល រលុង គ្របក្បាល និងបាំងថ្ងៃឲ្យម្លប់ ដោយមួកឬឆ័ត្រ។ ហាមទុកទារកកុមារចោលនៅក្នុងឡានដែលចត។
៤. ប្រសិនបើអ្នកត្រូវចេញទៅខាងក្រៅផ្ទះ យកល្អគួរទៅនៅពេលព្រឹកនិងពេលល្ងាចបើអាចធ្វើទៅបាន។ សូមព្យាយាមសម្រាកឲ្យបានញឹកញាប់នៅកន្លែងម្លប់ដូច្នេះ រាងកាយរបស់លោកអ្នកនឹងមានឱកាសមានកម្លាំងឡើងវិញ។
៥. ប្រសិនបើលោកអ្នកទើបហាត់ប្រាណដំបូង ឬហាត់ប្រាណនៅក្នុងបរិយាកាសក្តៅ អ្នកត្រូវចាប់ផ្តើមសកម្មភាពហាត់ប្រាណដោយយឺតៗ បន្ទាប់មកបង្កើនល្បឿនបន្តិចម្តងៗ ដើម្បីជៀសវាងការប្រឹងប្រែងធ្វើទាំងក្តៅដែលបណ្តាលឲ្យបេះដូងរបស់លោកអ្នកលោតញាប់ និងដង្ហក់ហត់ ត្រូវបញ្ឈប់សកម្មភាពទាំងនោះភ្លាមបើមានកើតឡើង រួចចូលទៅក្នុងតំបន់ត្រជាក់ ឬ យ៉ាងហោចណាស់ចូលទៅក្នុងម្លប់ហើយសម្រាក ពីព្រោះវាបណ្តាលឲ្យលោកអ្នក ខ្សោយឬដួលសន្លប់បាន។
៦. ជៀសវាងអាហារក្តៅៗ និងជៀសវាងពិសារអាហារច្រើនពេក ពីព្រោះ វាបង្កើនកម្តៅដល់រាងកាយរបស់ លោកអ្នកនិង៧. កាត់បន្ថយការប៉ះនឹងកម្តៅព្រះអាទិត្យផ្ទះ ជាពិសេសក្នុងកំឡុងពេលថ្ងៃនិងនៅកន្លែងដែលប្រឈមនិងកំដៅខ្លាំងដូចជានៅមាត់ទន្លេឬសមុទ្រជាដើម។
នាយកដ្ឋានបានណែនាំដល់បងប្អូនប្រជាពលរដ្ឋអនុវត្តវិធានការបន្ថែមដូចខាងក្រោម ដើម្បីជៀសផុតពីជំងឺរាក ក្អួត ក្តៅខ្លួនដូចជាលាងសំអាតបន្លែ ផ្លែឈើឲ្យបានស្អាតមុនបរិភោគ សំអាតសម្ភារៈប្រើសម្រាប់ចម្អិនម្ហូបអាហារឲ្យបានត្រឹមត្រូវ ចម្អិនអាហារឲ្យបានឆ្អិនល្អ ជាពិសេស សាច់ សត្វស្លាប ស៊ុត និងអាហារសមុទ្រនិងទុកដាក់ចំណីអាហារឆៅ និងឆ្អិនដាច់ដោយឡែកពីគ្នា។
កុំរក្សាទុកអាហារក្នុងកំដៅធម្មតាលើសពី២ម៉ោង មិនត្រូវរក្សាទុកអាហារជាច្រើនថ្ងៃទេ ទោះជាស្ថិតក្នុងកម្រិតសីតុណ្ហភាពសុវត្ថិភាពក៏ដោយ។ បើរក្សាទុកអាហារក្នុងប្រព័ន្ធត្រជាក់គឺត្រូវឲ្យនៅក្រោមសីតុណ្ហភាព៥អង្សាសេ តែបើរក្សាទុកអាហារក្នុងប្រព័ន្ធកំដៅ គឺត្រូវឲ្យលើសពីសីតុណ្ហភាព៦០អង្សាសេ កុំប្រើប្រាស់ចំណីអាហារហួសកាលកំណត់ ត្រូវប្រកាន់អនាម័យជាប់ជានិច្ច ដូចជាៈ លាងដៃជាមួយសាប៊ូនិងទឹក ក្រោយពេលចេញពីបង្គន់ មុនពេលរៀបចំអាហារ មុនពេលបញ្ចុកកូន និងមុនពេលពិសារអាហារ។
ចំណែកលោកវេជ្ជបណ្ឌិត សាម សុផាន់ ប្រធានអង្គការគណៈកម្មាធិការសុខភាពកម្ពុជាបានគាំទ្រទាំងស្រុងចំពោះការអំពាវនាវនេះ តែលោកស្នើឲ្យបុគ្គលិកនៅតាមមណ្ឌលសុខ ឬ មន្ទីរពេទ្យជាតិនិងបង្អែកនានាជួយផ្សព្វផ្សាយបន្តដល់ប្រជាពលរដ្ឋនៅពេលមកទទួលសេវាដើម្បីឲ្យពួកគាត់បានយល់ដឹងនិងចេះពីរបៀបការពារខ្លួននិងថែទាំសុខភាពពេលអាកាសធាតុក្តៅខ្លាំងនេះដើម្បីបញ្ចៀសពីការឆ្លងជំងឺផ្សេងៗ៕
Source: Kampuchea Thmey Daily
0 Comments