ភ្នំពេញ ៖ លោក លឹម គានហោ រដ្ឋមន្ត្រីក្រសួងធនធានទឹក បានណែនាំឲ្យលោកប្រធានមន្ទីរ បន្តផ្សព្វផ្សាយខ្លឹមសារសារាចរណែនាំរបស់រាជរដ្ឋាភិបាល ស្តីពីការចាត់វិធានការថែរក្សាទឹកទុក ឲ្យបានកាន់តែទូលំទូលាយថែមទៀត ដើម្បីជាផលប្រយោជន៍រួមសម្រាប់ទាំងអស់គ្នា។
ការណែនាំធ្វើឡើង កាលពីថ្ងៃទី២៣ កុម្ភៈ នេះនាឱកាសដែលលោកអញ្ជើញចុះពិនិត្យ មើលស្ថានភាពទឹកនៅទំនប់អាងទឹកត្រពាំងថ្ម ដែលស្ថិតក្នុងស្ថានភាពរីងគោកដែលពុំធ្លាប់ជួបប្រទះនាពេលកន្លងមក។
តាមការរាយការណ៍ពីលោកប្រធានមន្ទីរធនធានទឹក និងឧតុនិយមខេត្តបន្ទាយមានជ័យ បានឲ្យដឹងថា បើទោះជាមានការប្រជុំផ្សព្វផ្សាយអំពីសារាចរណែនាំស្តីពីការចាត់វិធានការថែរក្សាទឹកទុក ដោយមានការចូលរួមពីអាជ្ញាធរឃុំ ស្រុក ខេត្ត និងប្រជាពលរដ្ឋ នាពេលកន្លងមកយ៉ាងណាក៏ដោយ ក៏បច្ចុប្បន្នប្រជាកសិករបានបន្តធ្វើស្រូវប្រាំងលើកទី២ លើផ្ទៃដីចំនួនជាង ៧០០០ហិតតា ដែលអាចនឹងមានផលប៉ះពាល់មួយភាគធំនាពេលខាងមុខ។
ក្រសួង បានឲ្យដឹងថា ស្ថិតក្នុងស្ថានភាពបែបនេះ លោក រដ្ឋមន្ត្រីបានប្រគល់ភារកិច្ចជូនលោក ចាន់ យុត្ថា រដ្ឋលេខាធិការក្រសួងដឹកនាំការធ្វើប្រឡាយប្រវែង ៦គីឡូម៉ែត្រ ដែលរហូតមកដល់ពេលនេះ សម្រេចបានប្រវែង២គីឡូម៉ែត្រ រួចហើយ ដើម្បីយកទឹកពីស្ទឹងស្រែងក្នុងខេត្តឧត្តរមានជ័យ បញ្ចូលមកទំនប់អាងទឹកត្រពាំងថ្ម សម្រាប់ដោះស្រាយបញ្ហាប្រឈមដែលបាននឹងកំពុងជួបប្រទះបច្ចុប្បន្ន។
ទន្ទឹមនឹងនោះ លោក រដ្ឋមន្ត្រី ក៏បានណែនាំឲ្យលោកប្រធានមន្ទីរ បន្តផ្សព្វផ្សាយខ្លឹមសារសារាចរណែនាំរបស់រាជរដ្ឋាភិបាល ស្តីពីការចាត់វិធានការថែរក្សាទឹកទុក ឲ្យបានកាន់តែទូលំទូលាយថែមទៀត ដើម្បីជាផលប្រយោជន៍រួមសម្រាប់ទាំងអស់គ្នា និងដោយឡែកសម្រាប់ប្រជាពលរដ្ឋដែលជាអ្នកអាស្រ័យផលពីទំនប់អាងទឹកត្រពាំងថ្ម។ សូមជម្រាបថា ទំនប់អាងទឹកត្រពាំងថ្ម គឺជាប្រភពទឹកសំខាន់ សម្រាប់បម្រើការស្រោចស្រព ការប្រើប្រាស់ប្រចាំថ្ងៃ និងជាកន្លែងប្រមូលផ្តុំសត្វក្រៀល៕
Source: Kampuchea Thmey Daily
0 Comments