ថ្នាក់ដឹកនាំយុវជនគណបក្សប្រជាជនកម្ពុជាទូទាំងប្រទេសជួបប្រជុំគ្នា ដើម្បីផ្សព្វផ្សាយពីវឌ្ឍនភាព វិស័យសេដ្ឋកិច្ច និងការវិវត្តន៍នៃសភាពការណ៍សង្គមបច្ចុប្បន្ន

ភ្នំពេញ ៖ នៅព្រឹកថ្ងៃអាទិត្យ ទី២៤ ខែកុម្ភៈ ឆ្នាំ២០១៩នេះ ថ្នាក់ដឹកនាំយុវជនគណបក្សប្រជាជនកម្ពុជាទូទាំងប្រទេសចំនួន២៣០០នាក់ បានជួបប្រជុំគ្នា ដើម្បីផ្សព្វផ្សាយពីវឌ្ឍនភាព វិស័យសេដ្ឋកិច្ចជាតិ និងការវិវត្តន៍នៃសភាពការណ៍សង្គមបច្ចុប្បន្ន ដែលពិធីជួបជុំថ្នាក់ដឹកនាំយុវជននេះ បានធ្វើឡើងនៅមជ្ឈមណ្ឌលពិព័រណ៍ពាណិជ្ជកម្មកោះពេជ្រ ក្រោមអធិបតីភាពលោកជំទាវកិត្តិសង្គហបណ្ឌិត ម៉ែន សំអន ប្រធានគណៈចលនាមហាជន គណៈកម្មាធិការកណ្ដាលគណបក្សប្រជាជនកម្ពុជា និងមានការចូលរួមពីថ្នាក់ដឹកនាំយុវជនជាច្រើនរូបទៀត។

ការជួបជុំថ្នាក់ដឹកនាំយុវជនរបស់គណបក្សប្រជាជនកម្ពុជានាព្រឹកនេះ ធ្វើឡើងក្នុងគោលបំណង ទី១. ដើម្បីផ្សព្វផ្សាយពីវឌ្ឍនភាពវិស័យសេដ្ឋកិច្ចជាតិ និងការវិវត្តន៍ នៃសភាពការណ៍សង្គមបច្ចុប្បន្ន ដែលពាក់ព័ន្ធទៅនឹងសន្តិសុខ នយោបាយ និងការការពារជាតិ និងទី២. ដើម្បីបង្ហាញពីការត្រៀមខ្លួនរបស់ថ្នាក់ដឹកនាំយុវជនសមាជិក សមាជិកា គណបក្សប្រជាជនកម្ពុជា ក្នុងការគាំទ្រការអនុវត្តកំណែទម្រង់នានារបស់រាជរដ្ឋាភិបាល និងការប្ដេជ្ញាបន្តប្រឹងប្រែងចូលរួមចំណែកអភិវឌ្ឍសង្គមជាតិ ការពារសន្តិភាព អធិបតេយ្យភាព ក្នុងស្មារតីឯករាជ្យជាតិ នៅគ្រប់កាលៈទេសៈ។

មានប្រសាសន៍នៅក្នុងពិធីនោះ លោកជំទាវកិត្តិសង្គហបណ្ឌិត ម៉ែន សំអន បានលើកឡើងថា ស្ថានភាពនយោបាយនៅពេលបច្ចុប្បន្ននេះ មានការវិវត្តគួរឱ្យកត់សម្គាល់ ពិសេសការសម្រេចរបស់គណៈកម្មការអឺរ៉ុបលើការចាប់ផ្តើមនីតិវិធីនៃការព្យួរ EBA (គ្រប់មុខទំនិញលើក លែងតែអាវុធ) ការបំភ្លៃព័ត៌មានអំពីការបោះទីតាំងទ័ពបរទេសក្នុងទឹកដីកម្ពុជា បញ្ហានិន្នាការនយោបាយសកល និងការបំផុសបញ្ហាមួយចំនួនក្នុងប្រទេស ក្នុងបំណងធ្វើឱ្យប៉ះពាល់សតិ អារម្មណ៍មហាជន ពិសេសយុវជននៅប្រទេសកម្ពុជាតែម្តង។

លោកជំទាវបន្តថា សម្តេចអគ្គមហាសេនាបតីតេជោ ហ៊ុន សែន ធ្លាប់បានបញ្ជាក់ហើយថា «មិនត្រូវយកអធិបតេយ្យភាពរបស់យើង ទៅដោះដូរជាមួយជំនួយណាមួយនោះឡើយ» «ត្រូវរស់ដោយអុកស៊ីសែនខ្លួនឯង ដោយមិនត្រូវពឹងនូវខ្យល់ដែលគេបញ្ចូលឱ្យយើងនោះទេ» «ទោះមាន ឬគ្មាន EBA វាក៏មិនធ្វើឱ្យយើងស្លាប់ តែវាក៏មិនធ្វើឱ្យយើងក្លាយជាអ្នកមានបានដែរ»។

តាមលោកជំទាវ ម៉ែន សំអន ចំពោះបញ្ហា EBA នេះ គណៈកម្មការអឺរ៉ុបបានកំណត់រយៈពេល ១៨ខែ ក្នុងដំណើរការពិនិត្យលើការព្យួរ ឬមិនព្យួរ EBA ហើយក៏ពុំទាន់ឈានដល់ការព្យួរ EBA ភ្លាមៗនោះដែរ។ ការទទួល EBA នេះគឺសំដៅលើប្រទេសដែលមានការអភិវឌ្ឍតិចតួចប៉ុណ្ណោះ។ យើងមិនទុកឱ្យបញ្ហា EBA ក្លាយទៅជា ឧបសគ្គនៃការទំនាក់ទំនងរវាងរដ្ឋ និងរដ្ឋ សហគមន៍ និងសហគមន៍នោះទេ៕