ភ្នំពេញ ៖ អតីតសង្ឃទីប្រឹក្សា ហោ សុខុន ព្រះចៅអធិការវត្តច្បារអំពៅ បានលាចាកសិក្ខាបទហើយ កាលពីយប់ថ្ងៃទី១៣ ខែកុម្ភៈ ឆ្នាំ២០១៩ ហើយតាមមន្ត្រីសង្ឃបានអះអាងថា ហោ សុខន បានសឹកដោយខ្លួនឯង គ្មានអ្នកណាបង្ខិតបង្ខំទេ ចំណែកការនាំទៅកាន់វត្តបទុមវតី គ្រាន់តែនាំទៅ ដើម្បីឲ្យស្តាប់សេចក្តីប្រកាសរបស់គណៈសង្ឃ ក្នុងការបញ្ចប់តួនាទីតែប៉ុណ្ណោះ។
ព្រះញាណវង្ស ឃឹម សន មេគណរាជធានីភ្នំពេញ និងជាព្រះគ្រូសូត្រស្តាំវត្តបទុមវតី បានមានសង្ឃដីកាប្រាប់កម្ពុជាថ្មី កាលពីព្រឹកថ្ងៃទី១៤ ខែកុម្ភៈ ថា “ករណីដែលអាត្មាហៅមកវត្តបទុបវតីនេះ ដូចជាមកប្រកាសថា នឹងបញ្ចប់តួនាទី ជាលេខាសម្តេចមហាសង្ឃរាជ សង្ឃនាយក និងងារជាព្រះចៅអធិការវត្តច្បារអំពៅ ហ្នឹងមកផ្សាយលិខិតគណៈសង្ឃ ប៉ុន្តែយកមកដល់មិនទាន់បានអានលិខិតហ្នឹងផង លោកប្អូន ហោ សុខុន ហ្នឹងថា សុំលាចាកសិក្ខាបទខ្លួនឯង គាត់សុំលាចាកដោយខ្លួនឯង”។ ព្រះញាណវង្ស ឃឹម សន បញ្ជាក់ថា ក្រោយពីលាចាកសសិក្ខាបទហើយ ហោ សុខុន បានសំរាកនៅក្នុងវត្ត ហើយព្រឹកឡើងគាត់បានទៅថា្វយបង្គំញោមរបស់គាត់នៅខេត្តព្រៃវែង ហើយប្រគេនចង្ហាន់ព្រះសង្ឃនៅទីនោះ។
តាមព្រះញាណវង្ស ឃឹម សន “ករណីដែលគណៈសង្ឃសុំដកងារអីចេញពីចៅអធិការនេះ ពីព្រោះលោកមានផែនការរបស់លោក ធ្លាប់លើកឡើងច្រើនថា សម្តេចសង្ឃខាងលើហ្នឹងធ្វើការមិនល្អក្នុងជួរគណៈសង្ឃអីចឹងណា ហើយថាបើគាត់ឡើងជាអ្នកគ្រប់គ្រងព្រះសង្ឃអីចឹង គាត់នឹងធ្វើឲ្យល្អ ចឹងគណៈសង្ឃ អាត្មាអីហ្នឹងបាននិមន្តលោកមកជួបថា ឲ្យគាត់ជាមន្ត្រីសង្ឃ ជាអនុគណ ជាសាលាគណអី តែគាត់ប្រកែកថា ករុណាមិនចូលទេ យីករុណាចង់នៅក្រៅ នៅក្រៅមានសេរីភាពជាង ចឹងគណៈសង្ឃក៏ទូន្មានថា ឈប់ប៉ះពាល់សម្តេចសង្ឃធំៗទៅ លោកមានព្រះជនច្រើនៗហើយ ធ្លាប់ដាស់តឿនចឹង ហើយថា បើនៅមិនស្តាប់ទេ នឹងដកចេញ ធ្លាប់ប្រាប់ពីមុនមកហើយ”។ ទាក់ទងដល់ការនិយាយរឿងនយោបាយផ្សេងៗ ព្រះញាណវង្ស ឃឹម សន បានបញ្ជាក់ថា គណៈសង្ឃមិនបានគិតដល់រឿងហ្នឹងទេ។
សូមបញ្ជាក់ថា អតីតសង្ឃទីប្រឹក្សា ហោ សុខុន ព្រះចៅអធិការវត្តច្បារអំពៅ បានលាចាកសិក្ខាបទកាលពីយប់ថ្ងៃទី១៣ ខែកុម្ភៈ ឆ្នាំ២០១៩ ហើយតាមប្រភពព័ត៌មានពីពលរដ្ឋនៅវត្តច្បារអំពៅបានឲ្យដឹងថា អតីតសង្ឃ ហោ សុខុន ត្រូវបានសមត្ថកិច្ចមួយក្រុម ដឹកចេញពីវត្តច្បារអំពៅនៅវេលាម៉ោងប្រមាណ៧ និង៣០នាទីយប់ ហើយឆ្ពោះទៅកាន់វត្តបទុមវតី ជាទីដែលសម្តេចព្រះសង្ឃនាយក នន្ទ ង៉េត គង់នៅទីនោះ ហើយក្រោយមក ហោ សុខុន ត្រូវបានគេឃើញ ស្លៀកពាក់ខោអាវជាគ្រហស្ថធម្មតា ឈរនៅខាងមុខកុដិ របស់សម្តេចសង្ឃនាយក។ ចំណែកអ្នកសារព័ត៌មាន បានត្រឹមឈរ និងព្យាយាមថតរូបតាមរបងប៉ុណ្ណោះ មិនត្រូវបានអនុញ្ញាតឲ្យចូលទៅខាងក្នុងឡើយ។
អតីតសង្ឃ ហោ សុខុន ជាមនុស្សចូលចិត្តនិយាយរឿងនយោបាយ តាមបែបស្រមើស្រមៃមិនច្បាស់លាស់ ហើយថ្មីៗនេះ អតីតសង្ឃ ហោ សុខុន បានសរសេរសារមួយបង្ហោះនៅលើផេកហ្វេសប៊ុក ដោយអះអាងថា សម្តេចក្រឡាហោម ស ខេង ជាផ្កាយសំណាងរបស់កម្ពុជា ...ប៉ុន្តែសារនោះត្រូវបានមហាជនអះអាងថា ធ្វើឡើងក្នុងបំណង ដើម្បីបំបែកបំបាក់គណបក្សប្រជាជនកម្ពុជា ហើយបើទោះបីជាមានការសំណូមពរពីថ្នាក់ដឹកនាំធម្មការ ឲ្យឈប់និយាយរឿងនយោបាយក្តី តែអតីតសង្ឃ ហោ សុខុន នៅមិនទទួលយកឡើយ។
ទាក់ទងបញ្ហានេះ តាមប្រភពពីសមត្ថកិច្ចច្បារអំពៅបានឲ្យដឹងថា អតីតចៅអធិការវត្តច្បារអំពៅអន្ទិត ហោ សុខុន មិនបានស្ថិតនៅក្នុងវត្តច្បារអំពៅទៀតទេ ហើយបានធ្វើដំណើរទៅស្រុកកំណើតដោយភាពស្ងៀមស្ងាត់ ហើយបើតាមលោកវរសេនីយ៍ត្រី ទេព បូរ៉ា នាយនគរបាលប៉ុស្តិ៍ច្បារអំពៅទី២បានឲ្យដឹងថា កាលពីព្រលឹមស្រាងៗថ្ងៃទី១៤ ខែកុម្ភៈ អតីតចៅអធិការវត្តច្បារអំពៅ បានជិះរថយន្តមួយគ្រឿងមកចូលវត្តច្បារអំពៅ ហើយនាំយកលោកគ្រូសូត្រស្តាំមួយអង្គ ទៅស្រុកកំណើតជាមួយគ្នា។ ហោ សុខុន មានស្រុកកំណើត នៅក្នុងឃុំព្រៃឈរ ស្រុកកំពង់ត្របែក ខេត្តព្រៃវែង។
ប្រភពព័ត៌មានពីស្រុកកំពង់ត្របែកបានឲ្យដឹងថា អតីតសង្ឃទីប្រឹក្សា ហោ សុខុន ព្រះចៅអធិការវត្តច្បារអំពៅ បានទៅដល់ផ្ទះញោមហើយ ដែលស្ថិតនៅឃុំព្រៃឈរ ស្រុកកំពង់ត្របែក ខេត្តព្រៃវែង ហើយនៅទីនោះ មានសាច់ញាតិ បងប្អូនមកសួរសុខទុក្ខធម្មតា៕
Source: Kampuchea Thmey Daily
0 Comments