ចោរលួច​គាស់​ទូ​ យក​លុយ​អស់ ​នៅ​ពេល​ចៅអធិការ​ ​​និមន្ត​ទៅ​ឆ្ងាយ

កំពង់ចាម ​៖ ​ប្រាក់​កសាង​វត្ត​ និង​ប្រាក់​ផ្ទាល់​ខ្លួន​របស់​លោក​ចៅ​អធិការ​ ត្រូវ​ជនសង្ស័យ ​​​​​ធ្វើ​សកម្មភាព​គាស់​ទូ​លួច​​​អស់ ក្នុង​ខណៈ​ពេល​ដែល​លោក​អធិការ​និមន្ត​ចេញ​ក្រៅ​ ហើយ​សមត្ថកិច្ច ​បាន​និង​កំពុង​ស្រាវជ្រាវ​រក​អត្តសញ្ញាណ​ជនសង្ស័យ ​តែ​មិនទាន់​ទទួល​លទ្ធផល​នៅឡើយ។

ប៉ូលិស​បាន​ឲ្យ​ដឹង​ថា ​នៅ​ថ្ងៃ​ទី​26​ ខែ​កុម្ភៈ ​ឆ្នាំ​2019​ ម៉ោង​06​និង​45​នាទី ប៉ុស្តិ៍​រដ្ឋបាល​ខ្វិត​ធំ បាន​ទទួល​ព័ត៌មាន​ថា​ កាលពី​ថ្ងៃទី​25ខែ​កុម្ភៈ ​ឆ្នាំ​2019 ក្នុង​ចន្លោះ​ពី​ម៉ោង​14​ទៅ​ម៉ោង​18​នាទី មាន​ករណី​លួច គាស់​កាត់​សោ​ចូល​លួច​ទ្រព្យសម្បត្តិ ​នៅ​ក្នុង​វត្ត​ពោធិ​គ្រង ស្ថិត​ក្នុង​ភូមិ​ប្រ​ធាតុ ឃុំ​ខ្វិត​ធំ ស្រុក​ព្រៃ​ឈរ ខេត្ត​កំពង់ចាម។



ប្រភព​ព័ត៌មាន​នៅ​កន្លែង​កើតហេតុ​បាន​ឲ្យ​ដឹង​ថា កាលពី​ថ្ងៃទី​25​ ខែ​កុម្ភៈ ​ឆ្នាំ​2019​ លោកគ្រូ​ ហេង អេង​ធី ព្រះ​ជន្មាយុ​27​​​ ព្រះវស្សា​ជា​ចៅអធិការ​វត្ត​ពោធិ​គ្រង​និមន្ត​ទៅ​វត្ត​ពាម​ក្នុង ស្រុក​កងមាស ហើយ​ឲ្យ​ព្រះសង្ឃ​4​អង្គ​គង់​ចាំ​នៅ​វត្ត​ពោធិ​គ្រង​មាន​ ៖
1.​ព្រះនាម​អន​សម្បត្តិ​ ព្រះ​ជន្មាយុ​19​ព្រះវស្សា
2.​ព្រះនាម ​យុន រ៉ា​វីត ព្រះ​ជន្មាយុ​15​ព្រះវស្សា
3.​ព្រះនាម មឿ​ន ​សុ​វីន ព្រះ​ជន្មាយុ​17​ព្រះវស្សា
4.​ព្រះនាម​អន សំបូរ ព្រះ​ជន្មាយុ​19​ព្រះវស្សា។

ប្រភព​ដដែល​បាន​បន្ត​ថា លុះ​ដល់​វេលា​ម៉ោង​18​ថ្ងៃខែ​ឆ្នាំ​ដដែល​ លោកគ្រូ​ចៅអធិការ​ បាន​និមន្ត​វិល​ត្រឡប់​មកដល់​វត្ត​វិញ ​ឃើញ​នៅ​បន្ទប់​មុខ​មានការ​គាស់​ទ្វារ​ចូល​ទៅ​កាត់ផ្ដាច់​សោ​បន្ទប់​លួច​បាត់​លុយ​អស់​ចំនួន ៖ 9400000 រៀល ​ក្នុងនោះ​លុយ​ផ្ទាល់ខ្លួន​របស់​លោក​គ្រូ​ចំនួន​7.000.000​រៀល និង​លុយ​កសាង​ចំនួន​2.400.000​រៀល។ ក្រៅពីនោះ​មានការ​កាត់ផ្ដាច់​សោ​បន្ទប់​ក្រោយ​ក្នុង​សាលាឆាន់ ​តែ​ពុំ​មាន​ការបាត់បង់​អ្វី​ទេ។

លុះដល់​ម៉ោង​06​និង​45​នាទី​ព្រឹក ថ្ងៃ​ទី​26 ខែ​កុម្ភៈ​ ឆ្នាំ​2019ទើប​លោកគ្រូ​ចៅអធិការ​វត្ត មក​ដាក់​ពាក្យ​បណ្ដឹង និង​សំណូមពរ​សុំ​ឲ្យ​សមត្ថកិច្ច​នគរបាល​យើង ជួយ​ស្រាវជ្រាវ​រក​ជនល្មើស។

ប៉ូលិស​បាន​បន្ត​ថា ​ក្រោយពី​ទទួល​បាន​ព័ត៌មាន​ភ្លាម កម្លាំង​ជំនាញ​ស្រុក និង​ប៉ុស្តិ៍​រដ្ឋបាល​ចុះ​ទៅដល់​កន្លែង​កើតហេតុ បើក​ការ​ស៊ើបអង្កេត ស្រាវជ្រាវ​កសាង​សំណុំរឿង​តាម​នីតិវិធី៕



Source: Kampuchea Thmey Daily