កងកម្លាំងដែលគាំទ្រដោយសហរដ្ឋអាមេរិកបានជម្លៀសរថយន្តផ្ទុកមនុស្សជាង៤០គ្រឿងចេញទឹកដីចុងក្រោយរបស់ក្រុមរដ្ឋឥស្លាមនៅប្រទេសស៊ីរីកាលពីថ្ងៃចន្ទ ខណៈដែលពួកគេព្យាយាមបោសសម្អាតជនស៊ីវិលមុនពេលការវាយលុកចុងក្រោយដើម្បីកម្ចាត់ពួកជីហាដនិយម។
កងកម្លាំងប្រជាធិបតេយ្យស៊ីរី (SDF) បានពន្យឺតការវាយលុករបស់ពួកគេលើចំណុចចុងក្រោយដោយសារតែវត្តមាននៃជនស៊ីវិល។
អ្នកឆ្លើយឆ្លងព័ត៌មាន AFP ម្នាក់បានមើលឃើញរថយន្តធុនធំយ៉ាងហោចណាស់៤៦គ្រឿងដែលផ្ទុកកកកុញទៅដោយបុរស ស្ត្រីនិងកុមារកំពុងធ្វើដំណើរទៅកាន់មូលដ្ឋានរបស់ SDF ដែលស្ថិតនៅចម្ងាយ២០គីឡូម៉ែត្រភាគខាងជើងនៃបន្ទាយរបស់ក្រុមជីហាដនិយម។
រថយន្តមួយគ្រឿងត្រូវណែនតាន់តាប់ទៅដោយស្ត្រីស្លៀកពាក់ខ្មៅនិងបុរសដែលគ្របមុខរបស់ពួកគេ។ អ្នករងរបួសក៏ស្ថិតក្នុងចំណោមអ្នកដែលត្រូវគេជម្លៀសចុងក្រោយបំផុតនេះផងដែរ។
អ្នកប្រយុទ្ធក្រុម IS និងជនស៊ីវិលដែលភាគច្រើនជាសាច់ញាតិនៃពួកជីហាដនិយមមួយនេះត្រូវជាប់នៅខាងក្នុងផ្ទៃដីតិចជាងកន្លះគីឡូម៉ែត្រការ៉េនៅក្នុងភូមិ Baghouz ក្បែរព្រំដែនអ៊ីរ៉ាក់។
SDF ដែលដឹកនាំដោយពួកឃើដបានជម្លៀសមនុស្សប្រុសស្រីនិងកុមារជិត៥,០០០នាក់ចេញពីមូលដ្ឋានក្រុមជីហាដនិយមកាលពីថ្ងៃពុធនិងថ្ងៃសុក្រប៉ុន្តែមិនធ្វើឡើងនៅចុងសប្តាហ៍ទេ។
កាលពីព្រឹកថ្ងៃចន្ទ អ្នកនាំពាក្យរបស់ SDF លោក Mustefa Bali បាននិយាយថា មនុស្សរាប់ពាន់នាក់នៅតែស្ថិតក្នុងទឹកដីរបស់ក្រុម IS ។
លោក Bali បានប្រាប់ AFP ថា “យោងទៅតាមអ្វីដែលយើងបានឮពីអ្នកដែលបានចាកចេញ មានមនុស្សជិត៥,០០០នាក់ទៀតនៅតែស្ថិតនៅខាងក្នុងនោះ”។
មន្ត្រីកិច្ចការបរទេសឃើដលោក Abdel Karim Omar បាននិយាយថា SDF នឹងប្រកាសពីការបញ្ចប់នៃរដ្ឋរបស់ក្រុម IS ក្នុងរយៈពេលប៉ុន្មានថ្ងៃខាងមុខនេះ។ ប៉ុន្តែលោកនិយាយថា “នេះមិនមែនមានន័យថា យើងបានលុបបំបាត់អំពើភេរវកម្មដែលត្រូវតែកម្ចាត់ឲ្យដល់ឫសគល់នោះទេ”៕ AFP
Source: Kampuchea Thmey Daily
0 Comments