ភ្នំពេញ ៖ ការជំរុញនេះ បានធ្វើឡើងនៅក្នុងដំណើរទស្សនកិច្ចផ្លូវការរបស់ឯកឧត្ដមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា នៅសាធារណរដ្ឋប្រជាធិបតេយ្យប្រជាមានិតឡាវ ដើម្បីចូលរួមកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី កម្ពុជា-ឡាវ លើកទី១៣ នៅរដ្ឋធានីវៀងចន្ទន៍ ចាប់ពីថ្ងៃទី២១ ដល់ថ្ងៃទី២២ ខែកុម្ភៈ ឆ្នាំ២០១៩។
សេចក្ដីប្រកាសព័ត៌មានពីក្រសួងការបរទេសបានឲ្យដឹងថា តបតាមការអញ្ជើញរបស់ លោក សា លើមសៃ គុំម៉ាស៊ីត រដ្ឋមន្ត្រីការបរទេស នៃសាធារណរដ្ឋ ប្រជាធិបតេយ្យប្រជាមានិតឡាវ ឯកឧត្តមឧបនាយករដ្ឋមន្ត្រី ប្រាក់ សុខុន បានដឹកនាំគណៈប្រតិភូទៅបំពេញទស្សនកិច្ចផ្លូវការ និងធ្វើជាសហប្រធានកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីកម្ពុជា-ឡាវ លើកទី១៣ នៅរដ្ឋធានីវៀងចន្ទន៍ ប្រទេសឡាវ។
នៅមុនកិច្ចប្រជុំ ឯកឧត្ដមឧបនាយករដ្ឋមន្ត្រី ប្រាក់ សុខុន និងឯកឧត្ដម សាលើមសៃ គុំម៉ាស៊ីត បានជួបប្រជុំទ្វេភាគី ដែលក្នុងនោះ រដ្ឋមន្ត្រីការបរទេសទាំងពីរ បានផ្លាស់ប្ដូរព័ត៌មានស្ដីពីការវិវត្តន៍នយោបាយថ្មីៗនៅក្នុងប្រទេសរៀងៗខ្លួន។
ភាគីទាំងពីរបានពិភាក្សាគ្នាយ៉ាងស្និទ្ធស្នាល លើវិស័យកិច្ចសហប្រតិបត្តិការជាច្រើន ក្នុងឱកាសកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីលើកទី១៣។
ដោយកត់សម្គាល់ឃើញថា ទំហំពាណិជ្ជកម្មរវាងប្រទេសទាំងពីរ បាននិងកំពុងរីកចម្រើន ប៉ុន្តែនៅមានកម្រិតនៅឡើយ ភាគីទាំងពីរបានឯកភាពគ្នាសម្រួលពាណិជ្ជកម្មទ្វេភាគីបន្ថែមទៀត ដើម្បីបង្កើនការអនុវត្តកិច្ចព្រមព្រៀងស្តីពីការជំរុញ និងការការពារវិនិយោគ និងបង្កើតបរិយាកាសអំណោយផលដល់វិនិយោគិន ដើម្បីលើកកម្ពស់លំហូរចេញ-ចូលនៃវិនិយោគរវាងប្រទេសទាំងពីរ។
ចំពោះវិស័យសន្តិសុខ ភាគីទាំងពីរ បានឯកភាពបន្តចែករំលែក និងផ្លាស់ប្ដូរព័ត៌មានពាក់ព័ន្ធនឹងការទប់ស្កាត់ការជួញដូរមនុស្ស និងលើកកម្ពស់កិច្ចសហប្រតិបត្តិការរវាងកងយោធពលខេមរភូមិន្ទកម្ពុជា និងកងទ័ពប្រជាជនឡាវ តាមរយៈការផ្លាស់ប្ដូរទស្សនកិច្ចគ្រប់កម្រិត។
កិច្ចប្រជុំ បានស្វាគមន៍ការរៀបចំបឋម នៃការដឹកជញ្ជូនឆ្លងកាត់ព្រំដែនដោយរថយន្តដឹកអ្នកដំណើររវាងកម្ពុជា និងឡាវ ជាពិសេសរវាងភ្នំពេញ-ប៉ាក់សេ និងសៀមរាប-ប៉ាក់សេ។ ភាគីទាំងពីរ ក៏បានឯកភាពគ្នាពង្រឹងកិច្ចសហប្រតិបត្តិការអាកាសចរណ៍ស៊ីវិល លើផ្នែកសុវត្ថិភាព សន្តិសុខ ការអភិវឌ្ឍផ្លូវអាកាស និងការផ្លាស់ប្ដូរការបណ្ដុះបណ្ដាល និងពិនិត្យលទ្ធភាពបង្កើនការហោះហើរត្រង់បន្ថែមទៀត រវាងប្រទេសទាំងពីរ។
ចំពោះបញ្ហាព្រំដែន ភាគីទាំងពីរក៏បានពិភាក្សាអំពីការដោះស្រាយ និងលើកទឹកចិត្តឲ្យក្រសួងការបរទេស នៃប្រទេសទាំងពីរ បញ្ចប់សេចក្ដីព្រាងបែបបទបច្ចេកទេស (TOR) ឲ្យបានឆាប់ ស្របតាមខ្លឹមសារ នៃលិខិតរួមរបស់នាយករដ្ឋមន្ត្រីទាំងពីរ ចុះថ្ងៃទី៦ ខែកញ្ញា ឆ្នាំ២០១៧ ផ្ញើជូនប្រធានាធិបតីបារាំង។ ភាគីទាំងពីរ ក៏បានឯកភាពលើកកម្ពស់ការយល់ដឹងរបស់ប្រជាជនរបស់ខ្លួន លើឯកសារព្រំដែនដែលត្រូវបានព្រមព្រៀងដោយប្រទេសទាំងពីរ ដើម្បីពង្រឹងកិច្ចសហប្រតិបត្តិការក្នុងការលើកកម្ពស់សកម្មភាពដូចជា អន្តោប្រវេសន៍ខុសច្បាប់ ពាណិជ្ជកម្មខុសច្បាប់ និងការឆ្លងដែនខុសច្បាប់តាមបណ្ដោយព្រំដែន។ កិច្ចប្រជុំ ក៏បានឯកភាពអំពីការបង្កើនកិច្ចសហប្រតិបត្តិការលើវិស័យផ្សេងៗទៀត ដែលក្នុងនោះរួមមាន អប់រំ ព័ត៌មាន កសិកម្ម ទេសចរណ៍ វប្បធម៌ សុខភាពសាធារណៈ ប្រៃសណីយ៍ និងទូរគមនាគមន៍ ច្បាប់ និងកិច្ចសហប្រតិបត្តិការតុលាការ និងកិច្ចសហប្រតិបត្តិការកុងស៊ុល។
ក្រៅពីកិច្ចសហប្រតិបត្តិការទ្វេភាគី ភាគីទាំងពីរបានសម្តែងនូវការប្ដេជ្ញាចិត្តបន្តកិច្ចសហប្រតិបត្តិការក្នុងយន្តការថ្នាក់អនុតំបន់ និងតំបន់ ឆ្ពោះទៅរកសមាហរណកម្ម និងការតភ្ជាប់សេដ្ឋកិច្ចប្រកបដោយចីរភាព និងគ្រប់ជ្រុងជ្រោយ។
នៅពេលបញ្ចប់កិច្ចប្រជុំ ឯកឧត្ដមឧបនាយករដ្ឋមន្ត្រី ប្រាក់ សុខុន និង ឯកឧត្តម សាលើមសៃ គុំម៉ាស៊ីត បានចុះហត្ថលេខាលើកំណត់ហេតុនៃកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីលើកទី១៣ និងបានឯកភាពរៀបចំកិច្ចប្រជុំគណៈកម្មការចម្រុះសម្រាប់កិច្ចសហប្រតិបត្តិការទ្វេភាគីលើកទី១៤ នៅប្រទេសកម្ពុជា នៅឆ្នាំ២០២១។
សូមបញ្ជាក់ថា នៅក្នុងដំណើរទស្សនកិច្ចរបស់ លោក ថោនលន់ ស៊ីសូលីត មកកាន់ប្រទេសកម្ពុជា នៅក្នុងជំនួបជួបពិភាក្សាការងារជាមួយ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នាថ្ងៃទី១ ខែកញ្ញា ឆ្នាំ២០១៧ ប្រមុខរដ្ឋាភិបាល នៃប្រទេសទាំងពីរ (កម្ពុជា-ឡាវ) បានឯកភាពគ្នា៤ចំណុច ដែលក្នុងនោះ ចំណុចទី៤. ភាគីទាំងពីរបានឯកភាពគ្នាធ្វើលិខិតទៅប្រធានាធិបតីបារាំងសុំឲ្យជួយផ្តល់អ្នកជំនាញក្នុងការផ្ទេរផែនទីបារាំងពីខ្នាត១/១០០.០០០មក១/៥០.០០០ និងផ្តល់ឯកសារសំខាន់ៗទាក់ទងទៅនឹងព្រំដែន នៃប្រទេសទាំងពីរកម្ពុជា និងឡាវ។
សម្ដេចតេជោនាយករដ្ឋមន្ត្រី ហ៊ុន សែន បានមានប្រសាសន៍នាពេលនោះដែរថា ប្រទេសទាំងបីនៅឥណ្ឌូចិននេះ សុទ្ធតែស្ថិតក្រោមអាណានិគមនិយមបារាំង ដូចនេះបារាំង ត្រូវមានការទទួលខុសត្រូវជួយដល់កម្ពុជាលើបញ្ហានេះ។
មូលដ្ឋានដែលបារាំងផ្តល់ឲ្យ គឺផែនទីខ្នាត១/១០០.០០០ ប៉ុន្តែការធ្វើខ្សែព្រំដែនវាមិនអាចប្រើប្រាស់នូវខ្នាត១/១០០.០០០ បានទេ ត្រូវប្រើខ្នាត១/៥០.០០០ ដែលជាផែនទីដើមរបស់បារាំង។ ដូច្នេះវិធីដែលល្អបំផុត គឺស្នើសុំអ្នកជំនាញបារាំងមកធ្វើការផ្ទេរផែនទីនេះ និងសុំឲ្យបារាំងផ្តល់ឯកសារបន្ថែមពាក់ព័ន្ធបញ្ហាព្រំដែន រវាងប្រទេសទាំងពីរ៕
Source: Kampuchea Thmey Daily
0 Comments