ភ្នំពេញ ៖ ករណីអនុវត្តដីកាយកដីរដ្ឋទៅឲ្យឧកញ៉ា ក្លាយទៅជាអំពើហិង្សានៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ កាលពីថ្ងៃទី២៤ ខែមករា ឆ្នាំ២០១៩ នោះ ឥឡូវនេះ នាយករដ្ឋមន្ត្រីសម្រេចឲ្យក្រសួងកសិកម្មធ្វើការនិរាករណ៍សេចក្ដីស្នើសុំកាត់ឆ្វៀលដីចេញពីគម្របព្រៃឈើឆ្នាំ២០០២ទាំង១៩មកជាដីរដ្ឋវិញហើយ នេះបើតាមការបញ្ជាក់ពីលោក សុខសុវណ្ណ វឌ្ឍនាសាប៊ុង សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ពីគណបក្សខ្មែរក្រោក។
លោក សុខសុវណ្ណ វឌ្ឍនាសាប៊ុង បានអះអាងកាលពីថ្ងៃទី១៤ ខែកុម្ភៈ ថា យុត្តិធម៌ពិតជាមាន បន្ទាប់ពីសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ រកឃើញតម្រុយថា ករណីសាលាខេត្តព្រះសីហនុអនុវត្តន៍សាលដីកាតុលាការខុសប្រក្រតី រហូតនាំឲ្យមានការប្រើកម្លាំងប្រដាប់អាវុធ និងទាហានសរុប៣០០នាក់ ឈានដល់ថ្នាក់វាយសំពង បាញ់ពលរដ្ឋឲ្យរងគ្រោះនៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ ដើម្បីយកដី “រដ្ឋ” អោយឧកញ៉ា នឹងមន្ត្រីធំនៅពីក្រោយចាំស្រូបផលប្រយោជន៍នោះ ឥលូវនេះសម្ដេចតេជោបានសម្រេចណែនាំឲ្យក្រសួងកសិកម្មធ្វើការនិរាករណ៍សេចក្ដីស្នើសុំឆ្វៀលដីនោះ មកជាដីរដ្ឋវិញហើយ។ បានន័យថា ដីនោះជាដីរដ្ឋ ដែលគេបង្កើតស្ថានការណ៍ជំលោះដីធ្លីឈ្លោះដណ្ដើមដីរដ្ឋ ហើយតុលាការសម្រេច ដោយឈរលើឯកសារគតិយុត្តិមិនប្រក្រតី ក្នុងការកាត់ដីរដ្ឋ ឲ្យឯកជន ដែលដើមបណ្ដឹងមិនមែនជាអាជ្ញាធររដ្ឋ។
លោក សុខសុវណ្ណ វឌ្ឍនាសាប៊ុង ករណីនេះលោកបានតាមដានជិត៤ខែមកហើយ រហូតដល់ពេលអនុវត្តន៍សាលដីកា លោកបានចុះស្រាវជ្រាវផ្ទាល់ ឈានដល់ទទួលបានពន្លឺ តម្រុយ និងភស្តុតាងមួយចំនួន រៀបជារបាយការណ៍២លើក សរុបចំនួន៧ ទំព័រដាក់ជូនរាជរដ្ឋាភិបាល និងជជែកក្នុងអង្គប្រជុំដេញដោលជាមួយក្រសួងមហាផ្ទៃលើករណីនេះ យ៉ាងស្វិតស្វាញបំផុតហើយលោកអបអរចំពោះលទ្ធផលនេះ តែលោកទន្ទឹងរង់ចាំចំពោះការអនុវត្តនច្បាប់បន្ថែមទៀត លើក្រុមបុគ្គលជាប្រព័ន្ធ ដែលអាងអំណាចឃុបឃិតគ្នាយកដីរដ្ឋទាំងនេះ។
លោក សុខសុវណ្ណ វឌ្ឍនាសាប៊ុង ធ្លាប់បានបញ្ជាក់ថា ករណីចុះអនុវត្តន៍សាលដីកានៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ ដែលឈានដល់អំពើហិង្សានេះ ទី១, ករណីនេះមានភាពមិនប្រក្រតីនៅត្រង់ចំណុច ចុះអនុវត្តន៍សាលដីកា យ៉ាងតក់ក្រហល់ ដែលប្រើប្រាស់យោធាបន្ថែម១០០នាក់ ខណៈដែលយោធា មិនមែនជាសមត្ថកិច្ចយុត្តិធម៌ ជាពិសេសនីតិវិធីក្នុងការអនុវត្តន៍សាលដីកាគឺមានភាពមិនទាន់សមស្រប។
ទី២, ជាការអនុវត្តន៍ការងារខុសច្បាប់ជាន់លើខុសច្បាប់ ព្រោះដីនៅចំណុចអនុវត្តសាលដីកានោះជាដីរបស់រដ្ឋឋិតក្នុងគម្របព្រៃឆ្នាំ២០០២ មិនមែនរបស់បុគ្គលណាមួយទេ ករណីនេះ គឺមានបុគ្គលមានអំណាចនៅពីក្រោយ ដើម្បីបង្កើតរូបភាពជំលោះ ឈ្លោះគ្នាដណ្ដើមយកដីរដ្ឋ ដោយយកឯកសារខុសច្បាប់ ជាឯកសារដែលបាននិរាករណ៍រួចគ្មានសុពលភាពលើផ្លូវច្បាប់ទៅប្ដឹង ជាពិសេសតុលាការកាត់ក្ដីបែងចែកដីរដ្ឋទៅឲ្យបុគ្គល ខណៈដែលដើមបណ្ដឹងមិនមែនជាស្ថាប័នរដ្ឋ ហើយករណីនេះបង្ហាញថា សាលាខេត្តចូលរួមអនុវត្តន៍សាលដីកាខុសលើខុស ដោយមិនជួយការពារដីរបស់រដ្ឋ។
ទី៣, ករណីនេះពិតជាមានប៉ះពាល់ដល់ប្រជាពលរដ្ឋឈានដល់ការរងគ្រោះដោយអាវុធ ហើយមានរូបភាពព្រៃផ្សៃ រំលោភសិទ្ធិមនុស្ស ដែលប៉ះពាល់ធ្ងន់ធ្ងរដល់នយោបាយអន្តរជាតិ ដែលបង្កើតរូបភាពស្មុគស្មាញមុនពេលប្រតិភូកម្ពុជាទៅទីក្រុងហ្សឺណេវ ដើម្បីថ្លែងការណ៍ការពារបរទេសចោទលាបពណ៌កម្ពុជាលើបញ្ហាសិទ្ធិមនុស្ស។
ជាលទ្ធផលនៃការស៊ើបអង្កេត ក្រុមការងារគណបក្សខ្មែរក្រោក ដែលជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់បានរកឃើញថា មានពាក់ព័ន្ធមន្ត្រីជាន់ខ្ពស់ថ្នាក់ខេត្ត ដែលថ្លើមធំ វាស់វែងដីរដ្ឋ ជាដីឡូតិ៍ ទិញលក់យ៉ាងអានាធិបតេយ្យបំផុត ខណៈដែលដីនោះនៅជាដីរដ្ឋនៅឡើយ ដោយពុំមានឯកសារគតិយុត្តិណាបង្ហាញជាផ្លូវការ លើការឆ្វៀលផ្ដល់ឲ្យឯកជននោះទេ។
ទាក់ទងបញ្ហានេះដែរ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានមានប្រសាសន៍ កាលពីព្រឹកថ្ងៃទី១៣ ខែកុម្ភៈ ឆ្នាំ២០១៩ នៅក្នុងសន្និបាតត្រួតពិនិត្យការងារឆ្នាំ២០១៨ និងលើកទិសដៅការងារឆ្នាំ២០១៩ របស់ក្រសួងមហាផ្ទៃ ដោយធ្វើការព្រមានចំពោះអាជ្ញាធរខេត្តព្រះសីហនុ ដែលចុះអនុវត្តដីការរបស់តុលាការ ហើយប្រើកម្លាំងយោធា ដែលជារឿងខុសធ្ងន់។ សម្តេចបានអះអាងថា ការអនុវត្តដីកា ដោយប្រើកម្លាំងប៉ូលិស កម្លាំងអាវុធហត្ថ គឺជារឿងត្រឹមត្រូវហើយ តែបើប្រើកម្លាំងយោធា មិនត្រឹមត្រូវទេ ហើយសម្តេចថា បញ្ហានេះ ធ្លាប់បានកើតមាននៅ២ខេត្តហើយ គឺមួយទៀតនៅខេត្តក្រចេះ។
សម្តេចក្រឡាហោមបញ្ជាក់យ៉ាងនេះថា “យើងជាអ្នកអនុវត្តច្បាប់ ត្រូវតែចេះច្បាប់ ហើយបើយើងអ្នកអនុវត្តច្បាប់ មិនចេះច្បាប់ មិនត្រូវទេ ហើយបើយើងអ្នកអនុវត្តច្បាប់ ទៅការពារអ្នកខុស វាមិនមែនជាអ្នកច្បាប់ទេ តែវាជាអ្នកការពារបុគ្គលខុស។ មហាផ្ទៃ គឺនិយាយអំពីច្បាប់ បើមិនបានគិតច្បាប់ជាមុនទេ គឺខុសឥឡូវ ទាហរណ៍ដូចនៅខេត្តព្រះសីហនុ ថ្ងៃមុននេះ ដោះស្រាយរឿងដី ចង់និយាយថា យើងជាអ្នកច្បាប់ រដ្ឋបាលផង ជាអ្នកច្បាប់ផង ត្រូវតែដឹង គាត់យកកម្លាំងអនុវត្តច្បាប់ នគរបាល ប៉េអិមត្រូវហើយ តែគាត់ទៅយកកម្លាំងយោធាខុស ខុសហើយ គេមិនយកកម្លាំងយោធាទៅអនុវត្តដីកាទេ រឿងកើតនៅក្រចេះមួយ នៅខេត្តព្រះសីហនុមួយ ចឹងមានន័យថា យើងរដ្ឋបាលខេត្តប៉ុណ្ណាណី យើងអត់ដឹងច្បាប់ នេះប្រយ័ត្នខេត្តផ្សេងទៀត យកកម្លាំងយោធាទៅអនុវត្តទៀត ខុសទៀត មន្ត្រីអនុវត្តច្បាប់មានតែនគរបាល កងរាជអាវុធហត្ថ និងព្រះរាជអាជ្ញា ហើយរឿងមិនទាន់ចាំបាច់ត្រូវតែធ្វើផង ខ្ញុំនិយាយច្រើនដងហើយ យើងមិនធ្វើខុស តែបើធ្វើខុសច្បាប់ វាកាន់តែខុសទៅទៀត។
សូមបញ្ជាក់ថា កាលពីថ្ងៃទី២៤ ខែមករា ឆ្នាំ២០១៩ មានមានអំពើហិង្សាមួយបានកើតឡើង ខណៈពេលអាជ្ញាធរ និងព្រះរាជអាជ្ញាបានចុះអនុវត្តសាលដីកា លើករណីដីធ្លី នៅភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ ដែលការអនុវត្តពេលនោះ ត្រូវបានមន្ត្រីអះអាងថា មានកម្លាំងយោធាចូលរួមយ៉ាងច្រើនផងដែរ ហើយសកម្មភាពបង្ក្រាបដោយហិង្សា របស់កងកម្លាំងចម្រុះខេត្តព្រះសីហនុ នាពេលនោះ គឺបានកើតឡើងបន្ទាប់ពីក្រុមប្រជាពលរដ្ឋ បានប្រមូលផ្តុំគ្នាតវ៉ាដុតកង់ឡាន គប់ដុំថ្ម និងគប់ដបសាំងទៅលើកម្លាំងសមត្ថកិច្ច ដែលឲ្យចុះទៅអនុវត្តសាលដីការបស់តុលាការកំពូល ក្រោមការបញ្ជាផ្ទាល់អភិបាលរងខេត្ត គឺលោក ផៃ ប៊ុនវណ្ណៈ និងក្រោមការសម្របសម្រួលពីលោកព្រះរាជអាជ្ញារងអមសាលដំបូងខេត្ត គឺលោក ហួត វិចត្រ។
ពាក់ព័ន្ធនឹងគ្រាប់កាំភ្លើងបាញ់ត្រូវមនុស្សនេះ លោក យន្ត មីន អភិបាលខេត្តព្រះសីហនុ បានឆ្លើយដាក់បន្ទុកទៅភាគីទី៣ ដែលមិនដឹងជានរណា និងនៅទីណាពិតប្រាកដ ចំណែកអភិបាលរងរបស់លោកវិញ គឺលោក ផៃ ប៊ុនវណ្ណៈ បានអះអាងថា គ្រាប់កាំភ្លើងនេះបានធ្លាក់ពីលើមេឃ ហើយមកត្រូវមនុស្ស។ ប្រតិបត្តិការរឹបអូសដីរដ្ឋពីរាស្ត្រ យកទៅឲ្យឧកញ៉ា ស៊ីវ គង់ទ្រីវ នេះ អ្នកតាមដានបានសង្កេតឃើញថា គឺលោក សៀង សុខ ព្រះរាជអាជ្ញាសាលាដំបូងខេត្តព្រះសីហនុ ជាអ្នកចេញមុខដឹកនាំកម្លាំងចម្រុះ។
ករណីតវ៉ាបិទផ្លូវ និងប្រឈមមុខដាក់គ្នារវាងប្រជាពលរដ្ឋ និងក្រុមសមត្ថកិច្ចខេត្តព្រះសីហនុនេះ បានកើតឡើងម្តងរួចមកហើយ កាលពីព្រឹកថ្ងៃទី១៧ ខែមករា ឆ្នាំ២០១៩ ដែលពេលនោះប្រជាពលរដ្ឋប្រមាណ២០០នាក់ បានប្រមូលផ្តុំគ្នាតវ៉ាប្រឆាំងមន្ត្រីសុរិយោដីមកពីក្រសួងរៀបចំដែនដី និងមន្ត្រីពាក់ព័ន្ធនៅក្នុងខេត្ត រួមមានមន្ត្រីកងរាជអាវុធ និងនគរបាលខេត្តជាច្រើននាក់ ប្រដាប់ដោយអាវុធគ្រប់ដៃ ដឹកនាំដោយលោក ផៃ ប៊ុនវណ្ណៈ អភិបាលរងខេត្តព្រះសីហនុ បានព្យាយាមវាស់វែដី ដើម្បីធ្វើប្លង់កម្មសិទ្ធិឲ្យទៅលោកស្រីឧកញ៉ា ហុង សួន និងឧកញ៉ា ស៊ីវ គង់ទ្រីវ ដោយសំអាងថា ដីតំបន់ដែលប្រជាពលរដ្ឋកំពុងរស់នៅនេះ គឺជាដីស្ថិតនៅក្នុងប្លង់កម្មសិទ្ធិឯកជន។ នាពេលនោះ ផ្ទះសម្បែងរាប់រយខ្នង សង់ពីឈើ និងសង់ពីបេតុង រួមទាំងរបងព្រំដីធ្វើពីឈើ និងបេតុង រាប់សិបកន្លែង ត្រូវបានអាជ្ញាធរខេត្តព្រះសីហនុ ប្រើគ្រឿងកាយរុញបំផ្លាញចោលរាបដល់ដី ខណៈប្រជាពលរដ្ឋជាម្ចាស់ផ្ទះស្រែកទ្រហោយំទ្រហឹងអឺងកង រីឯអ្នកខ្លះទៀតរត់ចោលភូមិដ្ឋាន ដោយសារខ្លាចអាជ្ញាធរខេត្តចាប់ដាក់គុក។ ប្រជាពលរដ្ឋរងគ្រោះ នៅតំបន់ពយម៉ាចូវ បានអះអាងប្រាប់អ្នកសារព័ត៌មានកាលពីថ្ងៃទី២៩ ខែមករា ឆ្នាំ២០១៩ ថា ពួកគាត់កំពុងរស់នៅលើដីសាធារណៈរបស់រដ្ឋ គឺមិនមែនរស់នៅលើដីកម្មសិទ្ធិបុគ្គលណាម្នាក់ឡើយ ដូច្នេះប្រសិនបើរដ្ឋបាលខេត្តព្រះសីហនុ បន្តបណ្តេញពួកគាត់ដោយហិង្សាម្តងទៀត ដើម្បីយកដីប្រគល់ទៅឲ្យលោកស្រីឧកញ៉ា ហុង សួន ភរិយារបស់លោកឧកញ៉ា ស៊ីវ គង់ទ្រីវ ពួកគាត់មិនព្រមចេញឡើយ ព្រោះគាត់មិនមែនជាគូវិវាទនៅក្នុងសាលដីការបស់តុលាការកំពូលឡើយ ដោយបន្តបោះតង់ស្នាក់នៅជាបន្តទៀត ស្របពេលដីមានទំហំធំៗនៅក្បែរនេះ សុទ្ធសឹងជាកម្មសិទ្ធិរបស់ឈ្មួញមានលុយ និងដីខ្លះជាកម្មសិទ្ធិរបស់មន្ត្រីមានអំណាច អាចបន្តកាន់កាប់បាន ចំណែកពួកគាត់ គឺជាជនរងគ្រោះ។
គួររំលឹកដែរថា ដោយសារអំពើហិង្សាប្រដាប់អាវុធនេះ មន្ត្រីកងរាជអាវុធហត្ថខេត្តព្រះសីហនុម្នាក់ ត្រូវបានបញ្ឈប់ពីការងារ និងបណ្តេញចេញពីក្របខណ្ឌ កងរាជអាវុធហត្ថជាតិ ក្រោយពីគណៈកម្មការចំពោះកិច្ចរកឃើញថា បានប្រើអំពើហិង្សាខុសវិន័យធ្ងន់ធ្ងរ ដោយធាក់ទ្រូងបុរសម្នាក់ ជាអ្នកតវ៉ាជំទាស់នឹងការអនុវត្តសាលដីកាតុលាការកំពូល ដែលសម្រេចផ្តល់ដីទំហំជាង៧០ហិកតា ស្ថិតនៅចំណុចពយម៉ាចូវ ភូមិគគី ឃុំបិតត្រាំង ស្រុកព្រៃនប់ ខេត្តព្រះសីហនុ ឲ្យលោកឧកញ៉ា ស៊ីវ គង់ទ្រីវ ខណៈប្រជាពលរដ្ឋរាប់រយគ្រួសារកំពុងតែរស់នៅ និងអាស្រ័យផល នេះបើតាមការបញ្ជាក់ពីលោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធលើផ្ទៃប្រទេស ហើយគណៈកម្មការចំពោះកិច្ចរបស់កងរាជអាវុធហត្ថលើផ្ទៃប្រទេស មិនទាន់រកឃើញម្ចាស់គ្រាប់កាំងភ្លើង ដែលបានបាញ់ឲ្យបុរសម្នាក់អាយុ២៨ឆ្នាំម្នាក់ រងរបួសធ្ងន់ធ្ងរ ក្នុងប្រតិបត្តិការបណ្តេញប្រជាពលរដ្ឋ នៅក្នុងខេត្តព្រះសីហនុនោះនៅឡើយទេ។
តាមលោកឧត្តមសេនីយ៍ត្រី អេង ហ៊ី អាវុធ៦ដើម ដែលមន្ត្រីកងរាជអាវុធហត្ថខេត្តព្រះសីហនុ យកទៅប្រើតាមបញ្ជាអភិបាលរងខេត្ត នៅក្នុងថ្ងៃបង្ក្រាបការតវ៉ានេះ ត្រូវបានធ្វើកោសល្យវិច័យរួចរាល់ និងរកឃើញថា អ្នកកាន់កាំភ្លើងមិនបានបាញ់ទេ គណៈកម្មការចំពោះកិច្ចនឹងប្រជុំបូកសរុបលទ្ធផលការងាររកឃើញរបស់ខ្លួននៅថ្ងៃទី១៥ ខែកុម្ភៈ ឆ្នាំ២០១៩ ដើម្បីសម្រេចទៅលើទង្វើរបស់មន្ត្រីកងរាជអាវុធហត្ថខេត្តព្រះសីហនុ និងអ្នកទទួលខុសត្រូវចំពោះគ្រាប់កាំភ្លើងបាញ់ត្រូវមនុស្ស៕
Source: Kampuchea Thmey Daily
0 Comments