ភ្នំពេញ ៖ ជនសង្ស័យ២នាក់ ត្រូវបានចាប់ខ្លួនប្រគល់ជូនសមត្ថកិច្ចមូលដ្ឋានបន្ទាប់ពីពួកគេបានធ្វើសកម្មភាពកាច់សោ.កម៉ូតូបានសម្រេច តែជិះរត់គេចខ្លួនបានតែមួយម៉ោងក្រោយ ក៏ត្រូវម្ចាស់តាមទាន់ជិះដេញបុកបណ្តាលឲ្យដួលឃាត់ខ្លួនទាំងអស់គ្នាតែម្តង។
ហេតុការណ៍នេះ បានបង្កការភ្ញាក់ផ្អើលកាលពីវេលាម៉ោង ១០និង២០នាទីព្រឹក ថ្ងៃទី១៣ ខែកុម្ភៈ ឆ្នាំ២០១៩ ដែលស្ថិតនៅចំណុចមុខផ្ទះបោកអ៊ុត តាមបណ្ដោយផ្លូវលេខ១៣០ សង្កាត់ផ្សារចាស់ ខណ្ឌដូនពេញ រាជធានីភ្នំពេញ។
សមត្ថកិច្ចបានប្រាប់ឲ្យដឹងថា ជនសង្ស័យទាំង២នាក់ខាងលើ ទី១-ឈ្មោះ នី ហ៊ួច ភេទប្រុស អាយុ ២៨ឆ្នាំ និងទី២-ឈ្មោះ ពេជ្យ សុវណ្ណ ភេទប្រុស អាយុ ២៥ឆ្នាំ បច្ចុប្បន្នជនសង្ស័យទាំង ២នាក់ខាងលើ មានមុខរបរ និងស្នាក់នៅ មិនពិតប្រាកដ។
ប្រភពព័ត៌មានពីជនរងគ្រោះបានប្រាប់ឲ្យដឹងថា នៅមុនពេលកើតហេតុ ជនរងគ្រោះបានទុកម៉ូតូ មួយគ្រឿង ម៉ាក ស៊ុយសូគីឡែត ពណ៌ក្រហម លាយស ពាក់ស្លាកលេខ ភ្នំពេញ 1GW-8385 នៅមុខផ្ទះបោកអ៊ុត មួយកន្លែង នៅតាមបណ្ដោយផ្លូវលេខ១៣០ រួចក៏ឡើងផ្ទះយកខោអាវប្រហែសជាកន្លះម៉ោង។
ខណៈពេលនោះ ជនរងគ្រោះបានចុះមកក្រោមវិញ ស្រាប់តែបាត់ម៉ូតូមិនឃើញ ក៏ស្រែកផ្អើលឆោឡោ ហើយតាមរកមើលជាច្រើនម៉ោង លុះដល់វេលាម៉ោង ១០ព្រឹក ថ្ងៃដដែល ជនរងគ្រោះបានជិះម៉ូតូដើររកម្តងទៀត ក៏បានប្រទះឃើញជនសង្ស័យ ២នាក់ ជិះម៉ូតូរបស់ខ្លួននៅតាមបណ្ដោយផ្លូវលេខ១០៨ ក្បែរធនាគារ កាណាឌីយ៉ា ភ្លាមៗនោះ ជនរងគ្រោះក៏ជិះសំដៅទៅបំបុកឲ្យជនសង្ស័យទាំង ២នាក់ ដួល និងស្រែកផ្អើលឆោឡោ ភ្លាមៗនោះ ក៏ត្រូវកម្លាំងប្រជាការពារខណ្ឌដូនពេញ ដែលនៅជិតនោះជួយដេញចាប់ ហើយប្រគល់ឲ្យកម្លាំងសមត្ថកិច្ចប៉ុស្តិ៍ផ្សារចាស់ដើម្បីចាត់ការតាមនីតិវិធីច្បាប់តែម្តង៕
Source: Kampuchea Thmey Daily
0 Comments