ជំនួយ​មនុស្សធម៌​ចំនួន​១០០​លាន​ដុល្លារ ​ត្រូវ​បាន​សន្យា​ថា ​នឹង​ជួយ​ដល់​ប្រទេស​វេ​ណេ​ហ្ស៊ូ​អេ​ឡា

មន្ត្រី​កំពូល​របស់​សហរដ្ឋអាមេរិក​បាន​និយាយ​កាលពី​ថ្ងៃ​ព្រហស្បតិ៍​ថា ប្រទេស​ចំនួន​២៥​ បាន​សន្យា​ផ្តល់ជំនួយ​ជា​ទឹកប្រាក់​ចំនួន​១០០​លាន​ដុល្លារ​ដល់​ប្រទេស​វេ​ណេ​ហ្ស៊ូ​អេ​ឡា ​ខណៈ​តុលាការ​ជាន់ខ្ពស់​របស់​ប្រទេស​ ដែល​រងគ្រោះ​ដោយ​វិបត្តិ​មួយ​នេះ ​បាន​កំណត់​គោលដៅ​លើ​នាយក​ប្រតិបត្តិ​ក្រុមហ៊ុន​ប្រេង​ដែល​ត្រូវ​បាន​តែងតាំង​ដោយ​គណបក្សប្រឆាំង។

ប្រទេស​វេ​ណេ​ហ្ស៊ូ​អេ​ឡា​ត្រូវបាន​ញាំញី​ដោយសារ​ការ​ហក់​ឡើង​នៃ​អតិផរណា​និង​កង្វះខាត​ទំនិញ​សំខាន់ៗ​ហើយ​បុរស​ពីរ​នាក់​គឺ​មេដឹកនាំ​គណបក្សប្រឆាំង​លោក Juan Guaido និង​លោក​ប្រធានាធិបតី Nicolas Maduro កំពុង​ប្រជែង​គ្នា​ដើម្បី​គ្រប់គ្រង​ប្រទេស​នេះ​។​

សហរដ្ឋអាមេរិក​ស្ថិតក្នុង​ចំណោម​ប្រទេស​ជាង​៥០​ដែល​បានទទួល​ស្គាល់​លោក Guaido ជា​ប្រធានាធិបតី​បណ្ដោះអាសន្ន​ប៉ុន្តែ​លោក Maduro ដែល​គាំទ្រ​ដោយ​យោធា​របស់​ប្រទេស​ក៏ដូចជា​ប្រទេស​រុស្ស៊ី ចិន​និង​បណ្តា​រដ្ឋ​ផ្សេងៗ​មួយចំនួនទៀត​ផងដែ​រ​នោះបាន​បដិសេធ​ចុះចេញ​ពី​តំណែង​។​

ទីប្រឹក្សា​សន្តិសុខ​ជាតិ​អាមេរិក​លោក John Bolton បានធ្វើ​សេចក្តីប្រកាស​ស្តីពី​ជំនួយ​ដែល​បាន​សន្យា​ជាមួយ​វេ​ណេ​ហ្ស៊ូ​អេ​ឡា​នេះ​បន្ទាប់ពី​សន្និសីទ​របស់​អង្គការ​រដ្ឋ​អាមេរិក (OAS) ស្តីពី​ការជួយ​ប្រទេស​នេះ​។​

លោក Bolton បាន​បង្ហោះ Twitter ថា “​សព្វថ្ងៃ​មាន​ប្រទេស​ចំនួន​២៥​ដែល​រួបរួមគ្នា​ក្នុង​សន្និសីទ​ស្តីពី​ជំនួយ​មនុស្សធម៌​របស់ OAS ដើម្បី​គាំទ្រ​ប្រទេស​វេ​ណេ​ហ្ស៊ូ​អេ​ឡា​។ ពួកគេ​បាន​សន្យា​ផ្តល់ជំនួយ​មនុស្សធម៌​ចំនួន​១០០​លាន​ដុល្លារ​”​។​

យោងតាម​លោក David Smolanchesy អ្នកសម្របសម្រួល​ក្រុមការងារ OAS ស្តីពី​ការធ្វើ​ចំណាកស្រុក​និង​ជនភៀសខ្លួន​មកពី​ប្រទេស​វេ​ណេ​ហ្ស៊ូ​អេ​ឡា​បាន​ឲ្យ​ដឹងថា ថវិកា​នេះ​នឹងត្រូវ​ផ្តល់​ដោយផ្ទាល់​ទៅកាន់​មជ្ឈមណ្ឌល​ប្រមូល​ជំនួយ​ដែល​បង្កើត​ឡើងលើ​ព្រំដែន​ជាប់​ប្រទេស​កូ​ឡុំ​ប៊ី​និង​ប្រេ​ស៊ី​ល​និង​នៅលើ​កោះ Curazao​។​

នៅឯ​ពិធី​បើក​សន្និសីទ​ក្នុង​ទីក្រុង​វ៉ាស៊ីនតោន​នេះ អ្នកតំណាង​របស់លោក Guaido ប្រចាំ​សហរដ្ឋអាមេរិក​ឈ្មោះ Carlos Vecchio បាន​និយាយថា អាទិភាព​គឺ​ដើម្បី​ទទួលបាន​ជំនួយ​ទៅកាន់​ប្រទេស​វេ​ណេ​ហ្ស៊ូ​អេ​ឡា​នៅ​ថ្ងៃទី​២៣​ខែកុម្ភៈ​ដែលមាន​រយៈពេល​មួយខែ​បន្ទាប់ពី​លោក Guaido ប្រកាស​ខ្លួនឯង​ជា​ប្រធានាធិបតី​បណ្ដោះអាសន្ន​របស់​ប្រទេស​នេះ​។​

យោងតាម​អង្គការ​មូលនិធិ​រូបិយវត្ថុ​អន្ដរជាតិ​បាន​ឲ្យ​ដឹងថា ប្រទេស​វេ​ណេ​ហ្ស៊ូ​អេ​ឡា​កំពុង​ប្រឈម​នឹង​វិបត្តិ​សេដ្ឋកិច្ច​ធំ​បំផុត​នៅក្នុង​ប្រវត្តិសាស្ត្រ​សម័យ​ទំនើប​របស់ខ្លួន​ដោយ​អតិផរណា​ត្រូវបាន​គេ​ព្យាករណ៍​ថា​នឹង​កើនឡើង​ដល់​១០​លាន​ភាគរយ​នៅក្នុង​ឆ្នាំនេះ​៕ AFP

​

Source: Kampuchea Thmey Daily