ក្លិបបាល់ទាត់អង្គរថាយហ្គឺរ (Angkor Tiger FC) ដែលមានមូលដ្ឋាននៅខេត្តសៀមរាប និងជាសមាជិកពានរង្វានលីគកំពូលកម្ពុជា បានធ្វើដំណើរទៅបោះជុំរុំហ្វឹកហាត់នៅរាជធានីភ្នំពេញចំនួន១១ថ្ងៃ ព្រមទាំងបានដាក់គោលដៅប្រកួតមិត្តភាពកម្តៅសាច់ដុំចំនួន២លើកមុនពេលរដូវកាលថ្មីឆ្នាំ២០១៩ មកដល់ផងដែរ។
នៅលើវិបសាយផ្លូវការក្លិបដែលមានថៅកែជាជនជាតិជប៉ុនមួយនេះបានបញ្ជាក់ថា ការបោះជុំរុំហ្វឹកហាត់នេះធ្វើឡើងនៅជាយទីក្រុងភ្នំពេញ គិតចាប់តាំងពីថ្ងៃទី២២ ខែកុម្ភៈ និងគ្រោងបញ្ចប់នៅថ្ងៃសៅរ៍ ទី ០២ ខែមិនា ឆ្នាំ២០១៩។ គោលដៅនៃការបោះជុំរុំហ្វឹកហាត់នេះធ្វើឡើងដើម្បីអោយកីឡាករទាំងថ្មី ទាំងចាស់ មានការប្រមូលអារម្មណ៍បានល្អសិក្សាពីគ្នាទៅវិញ ទៅមកឲ្យបានច្រើន យល់ចិត្តគ្នា និងលេងសហការជាក្រុមជាដើម។ លើសពីនេះទៅទៀត លោកគ្រូបង្វឹក Oriol Mohedano មានយុទ្ធសាស្ត្រថ្មីៗបន្ថែមទៀត ចង់អោយកីឡាករទាំងអស់បានយល់ និងអនុវត្ត ត្រៀមលក្ខណៈចូលរួម រដូវកាលថ្មីដែលចាប់ផ្តើមពីខែមីនា តទៅ។
អំឡុងពេលលើកទ័ពមកកាន់រាជធានីភ្នំពេញ ក្លិបអង្គរថាយហ្គឺរ នឹងមានការប្រកួតមិត្តភាពចំនួន ២ប្រកួត ដែលការប្រកួតទី១ នឹងត្រូវជួបប្រកួតជាមួយក្លិបបាល់ទាត់ភ្នំពេញក្រោន នៅថ្ងៃ នៅថ្ងៃសៅរ៍ សប្ដាហ៍នេះលើទីលានកីឡដ្ឋាន RSN។ ចំណែកការប្រកួតទី២ នឹងត្រូវជួបប្រកួតជាមួយ ក្លិបជើងឯកឆ្នាំចាស់ណាហ្គាវើល នៅថ្ងៃសៅរ៍ទី០២ ខែមិនា ឆ្នាំ២០១៩ នៅវេលាម៉ោង ៣និង៣០ នាទី លើទីលានកីឡដ្ឋាន ISF (ផ្កាយសមុទ្រ)។
គួរបញ្ជាក់ថា ក្នុងយុទ្ធនាការប្រកួតមិត្តភាពកម្តៅសាច់ដុំមុនរដូវកាលថ្មីមកដល់នេះក្លិបអង្គរថាយហ្គឺរ បានប្រកួតស្មើជាមួយអគ្គិសនីកម្ពុជា ១-១, ឈ្នះ ក្រសួងការពារ ជាតិ ៤-២, ចាញ់ បឹងកេត ២-៣, ចាញ់ ព្រះខ័នរាជស្វាយរៀង ៣-៩, បន្តចាញ់ ព្រះខ័នរាជស្វាយរៀងក្នុងផ្ទះ ០-២, ចាញ់ វិសាខា ៣-១, ឈ្នះ អគ្គស្នងការដ្ឋាននគរបាលជាតិ ១-០, ឈ្នះ អាស៊ីអឺរ៉ុប ៦-២ និងស្មើជាមួយ សូលទីឡូអង្គរ ០-០៕
Source: Kampuchea Thmey Daily
0 Comments