នាវា​កងទ័ពជើងទឹក​អាមេរិក​ឆ្លងកាត់​ច្រក​សមុទ្រ​តៃវ៉ាន់​ដែល​ជា​ហេតុ​ធ្វើ​ឲ្យ​ចិន​មួម៉ៅ

សហរដ្ឋអាមេរិក​បាន​បញ្ជូន​នាវាចម្បាំង​ពីរ​គ្រឿង​ឆ្លងកាត់​ច្រក​សមុទ្រ​តៃវ៉ាន់​កាលពី​ថ្ងៃ​ចន្ទ​ខណៈពេលដែល​យោធា​អាមេរិក​បាន​បង្កើន​ភាព​ញឹកញាប់​នៃ​ការធ្វើ​ចលនា​តាមរយៈ​ផ្លូវ​ទឹកជា​យុទ្ធសាស្ត្រ​នេះ​បើទោះបីជា​មានការ​ប្រឆាំង​ពី​ប្រទេស​ចិន​ក៏ដោយ។

ការធ្វើដំណើរ​នេះ​អាច​បង្កើន​ភាព​តានតឹង​ជាមួយ​ប្រទេស​ចិន​ប៉ុន្តែ​ទំនងជា​ត្រូវបាន​មើលឃើញ​ដោយ​កោះ​តៃវ៉ាន់​ថា​ជា​សញ្ញា​នៃ​ការគាំទ្រ​ពី​រដ្ឋបាល​របស់លោក ត្រាំ ចំពេល​មានការ​បែកបាក់​គ្នា​កាន់តែខ្លាំង​រវាង​ក្រុង​តៃប៉ិ​និង​ក្រុង​ប៉េកាំង​។​

ការ​ធ្វើដំណើរ​នេះ​បាន​កើតឡើង​ចំ​ពេល ​ដែល​ប្រធានាធិបតី​អាមេរិក​លោក ដូ​ណា​ល់ ត្រាំ បាន​និយាយថា សហរដ្ឋអាមេរិក​និង​ចិន​ជិត​ឈានដល់​កិច្ចព្រមព្រៀង​មួយ​ហើយ​ដើម្បី​បញ្ចប់សង្គ្រាម​ពាណិជ្ជកម្ម​រយៈពេល​ច្រើន​ខែ​ដែល​បាន​ពន្យឺត​កំណើនសេដ្ឋកិច្ច​សកល​និង​បង្អាក់​ទីផ្សារ​។​

ការធ្វើ​នាវាចរ​របស់​កងទ័ព​ជើង​ទឹក​អាមេរិក​តាមរយៈ​ច្រក​សមុទ្រ​តៃវ៉ាន់​ក៏បាន​កើតឡើង​ត្រឹមតែ​ប៉ុន្មាន​ថ្ងៃ​ផងដែរ​មុន​ជំនួប​កំពូល​មួយ​រវាង​លោក ត្រាំ និង​លោក គីម ជុង​អ៊ុន។

កង​នាវាចរ​អាមេរិក​នៅ​តំបន់​ប៉ាស៊ីហ្វិក​បាន​និយាយ​នៅក្នុង​សេចក្តីថ្លែងការណ៍​មួយ​ថា “​ការឆ្លងកាត់​របស់​នា​វា​តាម​ច្រក​សមុទ្រ​តៃវ៉ាន់​បានបង្ហាញ​ពី​ការប្តេជ្ញាចិត្ត​របស់​សហ​រដ្ឋ​អាមេរិក​ចំពោះ​តំបន់​ឥណ្ឌូចិន​ដែលមាន​ភាពសេរី​និង​បើកចំហ”។

សេចក្ដីថ្លែងការណ៍​បាន​និយាយថា នាវា​ទាំងពីរ​គ្រឿង​ត្រូវបាន​គេ​កំណត់​អត្តសញ្ញាណ​ថា​ជា​នាវា​ពិឃាត Stethem និង​នាវាចម្បាំង Cesar Chavez។

ទោះបីជា​យ៉ាងណាក៏ដោយ មិនមាន​ប្រតិកម្ម​ភ្លាមៗ​ពី​ប្រទេស​ចិន​ទេ​ដែល​កាលពីមុន​បានបង្ហាញ​ពី​ការជំទាស់​របស់ខ្លួន​ចំពោះ​លំ​ហាត់​បែបនេះ។

ក្រសួងការពារជាតិ​កោះ​តៃវ៉ាន់​បាន​និយាយ​នៅ​ថ្ងៃ​អង្គា​រថា នាវា​របស់​សហរដ្ឋអាមេរិក​បាន​ចាក​ចេញពី​ច្រក​សមុទ្រ​នេះ​រួចទៅហើយ​បន្ទាប់ពី​ធ្វើដំណើរ​តាមផ្លូវ​មួយ​ឆ្ពោះទៅ​ទិសខាងកើត​។​

កងកម្លាំងប្រដាប់អាវុធ​របស់​កោះ​តៃវ៉ាន់​បាន​ឃ្លាំមើល​ការធ្វើ​នាវាចរណ៍​នេះ​និង​កត់សម្គាល់​ឃើញថា​គ្មានអ្វី​ខុសពី​ធម្មតា​ឡើយ​ដូច្នេះ​គ្មាន​ហេតុផល​ណាមួយ​សម្រាប់​ការជូនដំណឹង​នោះទេ៕ REUTERS

​

Source: Kampuchea Thmey Daily