ក្នុងអំឡុងឆ្នាំ២០១៨ កន្លងទៅនេះ អាជ្ញាធរជាតិអប្សរាបានរកឃើញនិងប្រគល់សម្ភារៈជូនភ្ញៀវទេសចរវិញចំនួន២៤៥ករណី

Cambodia News February 15, 2019

សៀមរាប ៖ ក្នុងឆ្នាំ២០១៨ កន្លងទៅនេះ នាយកដ្ឋានអភិវឌ្ឍន៍ទេសចរណ៍អង្គររបស់អាជ្ញាធរជាតិអប្សរាបានបង្ហាញពីការលើកកម្ពស់គុណភាពសេវាកម្ម ផ្តល់ការយកចិត្តទុកដាក់ និងផ្តល់ទំនុកចិត្តខ្ពស់ដល់ភ្ញៀវទេសចរជាតិ និងអន្តរជាតិក្នុងពេលចូលទស្សនាតំបន់រមណីយដ្ឋានអង្គរ។

ក្នុងនោះដែរ ក្រុមការងារអភិវឌ្ឍន៍ទេសចរណ៍អង្គរបាន សម្រេចនូវសមិទ្ធផលសំខាន់ៗ ដែលមានភាពលេចធ្លោគួរឲ្យកត់សម្គាល់ ដូចជាការងារជួយសង្គ្រោះបឋមដល់ភ្ញៀវទេសចរជាតិនិងអន្តរជាតិដែលទទួលរងគ្រោះថ្នាក់ ឬមានវិប្បការផ្សេងៗ ជាពិសេសគឺការខិតខំស្វែងរកឲ្យឃើញនិងប្រគល់ជូននូវវត្ថុសម្ភារៈដែលភ្ញៀវទេសចរបានជ្រុះនិងភ្លេច សងដល់ម្ចាស់ដើមវិញក្នុងពេលកំពុងទស្សនាប្រាង្គប្រាសាទនានាក្នុងតំបន់រមណីយដ្ឋានអង្គរ។

ទាក់ទងនឹងសកម្មភាពការងារនេះដែរ ក្រុមការងារនាយកដ្ឋានអភិវឌ្ឍន៍ទេសចរណ៍អង្គររបស់អាជ្ញាធរជាតិអប្សរា ក្នុងការងារសហការជាមួយនគរបាលទេសចរណ៍ និងនគរបាលការពារបេតិកភណ្ឌ បានជួយស្វែងរកវត្ថុសម្ភារៈដែលភ្ញៀវបានភ្លេច ឬជ្រុះ បានចំនួន២៧៩ករណី ហើយរកឃើញវិញបានចំនួន ២៤៥ករណី ទន្ទឹមគ្នានោះ ក្រុមការងារក៏បានធ្វើជួយសង្គ្រោះបឋមដល់ភ្ញៀវទេសចរជាតិនិងអន្តរជាតិ ដែលមានគ្រោះថ្នាក់អំឡុងពេលទស្សនាក្នុងតំបន់ប្រាសាទសរុបចំនួន២០៥ករណីផង។

ក្រុមការងារក៏បានធ្វើការណែនាំដល់ភ្ញៀវទេសចរជាតិ និងអន្តរជាតិឲ្យយល់ដឹងពីក្រមប្រតិបត្តិអង្គរមានដូចជា ត្រូវស្លៀកសម្លៀកបំពាក់ឲ្យបានសមរម្យ ហាមប៉ះពាល់រូបចម្លាក់តាមបណ្តាជញ្ជាំងប្រាសាទ ត្រូវរក្សាភាពស្ងៀមស្ងាត់មិនមានឲ្យការស្រែកឡូឡារំខានដល់អ្នកដទៃ ហាមឲ្យស្ករគ្រាប់ ឬថវិកាដល់កុមារ ហាមពិសារបារី ហាមផឹកគ្រឿងស្រវឹង ហាមចោលសំរាមពាសវាលពាសកាល ហាមឡើងលើគំនរថ្ម និងហាមស្ត្រីប៉ះព្រះសង្ឃ និងថតរូបកៀកព្រះសង្ឃ។ អំពើទាំងនេះ គឺជាការចូលរួមអភិរក្សថែរក្សា និងផ្តល់តម្លៃដល់តំបន់រមណីយដ្ឋានអង្គរជាសម្បត្តិបេតិកភណ្ឌពិភពលោក៕