អំឡុង សន្ទរកថាប្រចាំឆ្នាំ របស់លោកប្រធានាធិបតី Trump បានប្រកាសថា ជំនួបកំពូលលើកទី២ របស់លោកជាមួយ លោក Kim Jong un នឹងកើតឡើងនៅថ្ងៃទី ២៧ និង ២៨ ខែកុម្ភៈ ក្នុងប្រទេសវៀតណាម ។ប៉ុន្តែខណៈគណៈកម្មការវាយតម្លៃការគំរាមកំហែងពិភពលោក របស់ទីភ្នាក់ងារស៊ើបការណ៍សំងាត់អាមេរិក បានមើលឃើញថា កូរ៉េខាងជើង ទំនងជានឹងមិនបោះបង់ចោល អាវុធនុយក្លេអ៊ែរ និងសមត្ថភាពផលិតទាំងអស់របស់ខ្លួនទេ ស្របពេលកូរ៉េខាងជើង ស្វែងរកការចរចារំសាយចោលអាវុធនុយក្លេអ៊ែរដោយផ្នែក ដើម្បីទទួលបាន សម្បទានពីសហរដ្ឋអាមេរិក និងអន្តរជាតិ។ ដូច្នេះដើម្បីបង្កើនលទ្ធភាពទទួលបានភាពជោគជ័យ រដ្ឋបាលលោក Trump ចាំបាច់ត្រូវមានផែនការហ្គេមមួយច្បាស់លាស់ដែលទំនងជានឹងអាចទទួលបានការយល់ព្រមពីទីក្រុង ព្យុងយ៉ាង។
ជំនួបកំពូល ដែលបានគ្រោងទុកនេះ កើតមានឡើង ក្រោយទណ្ឌកម្មសំខាន់ៗរបស់សហរដ្ឋអាមេរិក លើកូរ៉េខាងជើង ។រដ្ឋបាលរបស់លោក ត្រាំ បានចេញ វិធានការដាក់ទណ្ឌកម្មចំនួន ១៥៦ លើក ក្នុងពេល ១៦ខែដំបូង ផ្ទុយពីរដ្ឋបាល របស់អតីតប្រធានាធិបតី អូបាម៉ា ដែលបានចេញ ត្រឹមតែ ១៥៤ លើកតែប៉ុណ្ណោះ ក្នុងពេល៨ឆ្នាំ ។
ទីក្រុង Washingtonត្រូវតែធ្វើឲ្យបានច្បាស់លាស់ចំពោះទីក្រុងPyongyang ដែលការធ្វើសម្បទាននានា ជាពិសេសការបន្ធូរបន្ថយទណ្ឌកម្មដោយផ្នែក ធ្វើទៅបានលុះណាតែកូរ៉េខាងជើងបញ្ចប់គ្រប់ឥរិយាបទបង្ករឿង។ មកទល់ពេលនេះ ទីក្រុងវ៉ាស៊ីនតោនបានដាក់ទណ្ឌកម្មលើកូរ៉េខាងជើង មិនត្រឹមតែការអភិវឌ្ឍន៍នុយក្លេអ៊ែររបស់ខ្លួនតែប៉ុណ្ណោះទេ ថែមទាំងលើការរំលោភសិទ្ធិមនុស្ស ការលាងលុយកង្វក់ ប្រភពហិរញ្ញវត្ថុខុសច្បាប់និង សង្គ្រាមបច្ចេកវិទ្យាជាដើម៕
Source: Kampuchea Thmey Daily
0 Comments