ដីសម្បទានសង្គមកិច្ច២,២២២ហិកតា ត្រូវបានចាប់ឆ្នោតធ្វើពិធីប្រគល់ មានផ្ទះ ដី ជូនដល់អតីតយុទ្ធជនក្រីក្រ៣០៩ខ្នង

បន្ទាយមានជ័យ ៖ នៅព្រឹក ថ្ងៃទី២៣ ខែកុម្ភៈ ឆ្នាំ២០១៩នេះ នៅសាលប្រជុំធំសាលាខេត្តបន្ទាយមានជ័យ បានធ្វើពិធីចាប់ឆ្នោត ប្រគល់ផ្ទះ ដី លំនៅដ្ឋាន និង ដីបង្កបង្កើនផលជូនដល់អតីតយុទ្ធជនក្រីក្រចំនួន៣០៩ខ្នង។

ពិធីនេះ មានការចូលរួមពីលោក សួន បវរ អភិបាលខេត្តបន្ទាយមានជ័យ និងជាប្រធានកិត្តិយសសមាគមអតីតយុទ្ធជនកម្ពុជាខេត្ត, លោកឧត្ដមសេនីយ៍ទោ ប្លន់ តារា ប្រធានសមាគមអតីតយុទ្ធជនកម្ពុជាខេត្ត ប្រធានមន្ទីរអង្គភាព និងគ្រួសារអតីតយុទ្ធជនជិត១,០០០នាក់។

ក្នុងកិច្ចប្រជុំនោះ លោក ប្លន់ តារា បានមានប្រសាសន៍ថា កន្លងមករដ្ឋបាលខេត្តបន្ទាយមានជ័យដែលមានដីទំហំ ២,២២២ហិកតា សមាគមអតីតយុទ្ធជនកម្ពុជាខេត្ត បានធ្វើការគ្រប់គ្រង ហើយបានបង្កើតគណៈកម្មការដែលមានសមាសភាពអ្នកពាក់ព័ន្ធចូលរួម និងអនុគណៈកម្មាធិការ៣ស្រុក មានស្រុក ភ្នំស្រុក ស្រុកស្វាយចេក និងស្រុកថ្មពួក ដើម្បីចុះត្រួតពិនិត្យទីតាំងដីសម្បទានសង្គមកិច្ចផ្ទាល់ទាំងអស់បូកសរុបមានចំនួន៩៦៩ហិកតា នៅសល់ដីជាក់ស្ដែង១,២៥៣ហិកតា ក្នុងនោះសមាគមមានគម្រោងសាងសង់ផ្ទះជូនអតីតយុទ្ធជនក្រីក្រចំនួន២០០ខ្នង ដែលជាអំណោយរបស់ លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំង គ្រឿងញៀន ប្រធានក្រុមការងារថ្នាក់កណ្តាល ចុះជួយខេត្តបន្ទាយមានជ័យ និងជាអនុប្រធានសមាគមអតីតយុទ្ធជនកម្ពុជា១៨០ខ្នងនិង៤០ខ្នង ជាអំណោយរបស់ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និង ជាប្រធានសមាគមអតីតយុទ្ធជនកម្ពុជា។

លោកបានបញ្ជាក់ឲ្យដឹងទៀតថា ក្នុងការចាប់ឆ្នោតនោះ អតីតយុទ្ធជន ក្រីក្រ គ្មានដី គ្មានផ្ទះមានចំនួន៣០៩គ្រួសារ ធ្វើការប្រគល់នៅពេលនេះមានផ្ទះ៨០ខ្នង ដែល១គ្រួសារ ទទួលបាន១ខ្នង ដីលំនៅដ្ឋាន ដីកសិកម្មលក្ខណៈគ្រួសារ នៅសល់ជាក់ស្ដែង នៅក្នុងភូមិសាស្ត្រ ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ។

ក្នុងនោះ លោក សួន បវរ បានមានប្រសាសន៍ថា សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កន្លងមក សម្ដេច តែងតែយកចិត្តទុកដាក់ដល់ អតីតយុទ្ធជន ផ្តល់ទាំងគ្រឿងឧបភោគ និងបរិភោគ ថវិកា ពិសេសជួយសាងសង់ផ្ទះឲ្យដល់អតីតយុទ្ធជនមិនដែលដាច់ ព្រោះសំអាងថា អតីតយុទ្ធជន ជាកម្លាំង កន្លងមកទាហាន ពលីជីវិត ក្នុងការពារទឹកដីហានប្តូរជីវិត សាច់ស្រស់ ឈាមស្រស់ ជូនជាតិមាតុភូមិ ហើយប្រទេសមានស្ថិរភាព រហូតមកដល់សព្វថ្ងៃនេះ ក៏ដោយសារតែកងកម្លាំងប្រដាប់អាវុធ អាវុធហត្ថ នគរបាលទាំងអស់ ដែលជាអតីតយុទ្ធជននេះផងដែរ។

ក្នុងនោះ លោក បានធ្វើការកោតសរសើរដល់សមាគមអតីតយុទ្ធជនខេត្ត ដែលបានខិតខំលះបង់វិស័យសុខុមាលមនុស្សចាស់ វិស័យយុវនីតិសម្បទា វិស័យសុខុមាលភាពសង្គម វិស័យសុខុមាលភាពកុមារបានយ៉ាងល្អ ហើយការបង្កើតសមាគមអតីតយុទ្ធជនកម្ពុជា បង្កើតឡើង វាមានសារៈសំខាន់ណាស់ក្នុងវិស័យមនុស្សធម៌សម្រាប់ឆ្លើយតបសង្គ្រោះបន្ទាន់ដល់គ្រប់គ្រួសាររងគ្រោះដោយគ្រោះមហន្តរាយផ្យេងៗដូចជា ជួយដល់គ្រួសារកងទ័ពក្រីក្រ ប្រជាពលរដ្ឋមានការខ្វះខាត ក្នុងគ្រាមានអាសន្ន ផលវិបាក នៃគ្រោះមហន្តរាយ អ្នកផ្ទុកមេរោគអេដស៍ ជនពិការ កុមារកំព្រា ចាស់ជរាឥតទីពឹងជាដើមផងដែរ៕