មេដឹកនាំគណបក្សប្រឆាំងវេណេហ្ស៊ូអេឡាលោកJuan Guaido បានអះអាងថា យោធាបានជួយគាត់ប្រឆាំងនឹងបម្រាមធ្វើដំណើររបស់រដ្ឋាភិបាលនៃលោកប្រធានាធិបតី Nicolas Maduro នៅពេលដែលគាត់បានចូលរួមជាមួយមនុស្សរាប់ពាន់នាក់លើព្រំដែនកូឡុំប៊ីកាលពីថ្ងៃសុក្រសម្រាប់ការប្រគំតន្ត្រីសប្បុរសធម៌មួយដើម្បីជំរុញការផ្តល់ជំនួយមនុស្សធម៌។
លោក Maduro កំពុងព្យាយាមទប់ស្កាត់អាហារនិងឱសថពីការចូលក្នុងប្រទេសខណៈភាពតានតឹងលើការផ្គត់ផ្គង់ជំនួយបានបណ្តាលឲ្យមានមនុស្សស្លាប់ហើយបង្កឲ្យមានការថ្កោលទោសទាំងកំហឹងពីសហរដ្ឋអាមេរិក។
លោក Guaido បានធ្វើឲ្យលោក Maduro ជួបឧបសគ្គខណៈពេលគាត់បង្ហាញខ្លួនដ៏ភ្ញាក់ផ្អើលក្នុងការប្រគុំតន្ត្រីមួយនៅទីក្រុងព្រំដែន Cucuta របស់ប្រទេសកូឡុំប៊ីដោយអះអាងថា កងកម្លាំងប្រដាប់អាវុធបានចូលរួមក្នុងដំណើរការនេះដើម្បីជួយគាត់ឲ្យយកឈ្នះលើបំរាមធ្វើដំណើររបស់គាត់។
ប៉ុន្មានម៉ោងក្រោយមក រដ្ឋាភិបាលក្រុង Caracas បាននិយាយថា ខ្លួនបានបិទច្រកព្រំដែនកូឡុំប៊ីនៅរដ្ឋ Tachira ដោយសំអាងលើការគំរាមកំហែងដល់សន្តិសុខរបស់វេណេហ្ស៊ូអេឡា។
អនុប្រធានាធិបតី Delcy Rodriguez បានបង្ហោះ Twitter ថា “ដោយសារតែការគំរាមកំហែងយ៉ាងធ្ងន់ធ្ងរនិងខុសច្បាប់ដែលប៉ុនប៉ងដោយរដ្ឋាភិបាលកូឡុំប៊ីប្រឆាំងនឹងសន្តិភាពនិងអធិបតេយ្យភាពនៅប្រទេសវេណេហ្ស៊ូអេឡា រដ្ឋាភិបាលវេណេហ្ស៊ូអេឡាបានសម្រេចចិត្តបិទជាបណ្តោះអាសន្ននៃស្ពានទាំងអស់ដែលបង្រួបបង្រួមប្រទេសទាំងពីរនៅរដ្ឋ Tachira”។
ការគាំទ្ររបស់យោធាដ៏មានឥទ្ធិពលគឺមានសារៈសំខាន់ខ្លាំងណាស់ចំពោះលទ្ធភាពជោគជ័យរបស់មេដឹកនាំសង្គមនិយមប៉ុន្តែការបោះបង់ចោលគាត់គឺនឹងពង្រឹងដល់លោក Guaido វិញ។
ការប្រឈមមុខដាក់គ្នាដ៏តានតឹងលើជំនួយបានឆក់យកជីវិតមនុស្សជាលើកដំបូងកាលពីថ្ងៃសុក្រនៅពេលដែលជនជាតិដើមភាគតិចពីរនាក់ត្រូវបានសម្លាប់ខណៈព្យាយាមរារាំងកងទ័ពពីការបិទផ្លូវក្រៅផ្លូវការដែលឆ្លងកាត់ព្រំដែនប្រេស៊ីល។
ក្រុមសិទិ្ធមនុស្សក្នុងស្រុកមួយឈ្មោះ Kape Kape បាននិយាយថា “ស្ត្រីជនជាតិដើមភាគតិចនិងប្តីរបស់នាងត្រូវបានសម្លាប់ហើយមនុស្សយ៉ាងតិច១៥នាក់ផ្សេងទៀតនៃសហគមន៍ជនជាតិដើម Pemon បានរងរបួស”។
គួរបញ្ជាក់ថា អំពើហិង្សានេះ បានកើតឡើងនៅរដ្ឋ Bolivar ភាគអាគ្នេយ៍ជិតព្រំដែនប្រទេសប្រេស៊ីលដែលលោក Maduro បានបញ្ជាឲ្យបិទកាលពីថ្ងៃព្រហស្បតិ៍៕ AFP
Source: Kampuchea Thmey Daily
0 Comments