រដ្ឋាភិបាល​យេ​មែន​និង​ក្រុម​ឧទ្ទាម Huthi ព្រមព្រៀង​ដក​កងកម្លាំង

រដ្ឋាភិបាល​យេ​មែន​ និង​ក្រុម​ឧទ្ទាម Huthi បាន​ព្រមព្រៀងគ្នា​ក្នុងដំណាក់កាល​ដំបូង​នៃ​ការដក​កងកម្លាំង​ចេញពី​ទីក្រុង Hodeida ដ៏​សំខាន់​នៅក្នុង​កិច្ចព្រមព្រៀង​មួយ​ដែល​អង្គការសហប្រជាជាតិ​ពណ៌នា​កាលពី​ថ្ងៃអាទិត្យ​ថា​ជា​វឌ្ឍនភាព​ដ៏​សំខាន់។

ការដាក់​ពង្រាយ​ឡើងវិញ​ពី​ទីក្រុង Hodeida គឺជា​ផ្នែក​ដ៏​សំខាន់​មួយ​នៃ​កិច្ចព្រមព្រៀង​បទ​ឈប់​បាញ់​មួយ​ដែល​បាន​ឈានដល់​កាលពី​ខែធ្នូ​នៅក្នុង​ប្រទេស​ស៊ុយ​អ៊ែត​ដែល​អំពាវនាវ​ដល់​រដ្ឋាភិបាល​និង​ក្រុម Huthi ឲ្យ​ដក​កងកម្លាំង​ចេញពី​ទីក្រុង​កំពង់ផែ​និង​ផ្នែក​ខ្លះ​នៃ​ទីក្រុង​នេះ​។​

កិច្ចព្រមព្រៀង​ឈប់​បាញ់​ដ៏​ផុយស្រួយ​នេះ​គឺជា​ជំហាន​ដំបូង​ឆ្ពោះទៅរក​ការបញ្ចប់​សង្គ្រាម​ដ៏​បំផ្លិចបំផ្លាញ​មួយ​ដែល​បាន​រុញច្រាន​ប្រទេស​យេ​មែន​ឲ្យ​ធ្លាក់​ចូលទៅ​គែម​នៃ​គ្រោះ​ទុរ្ភិក្ស​។​

សេចក្តីថ្លែងការណ៍​រប​ស់​អង្គការសហប្រជាជាតិ​បាន​និយាយថា បន្ទាប់ពី​ការចរចា​រយៈពេល​ពីរ​ថ្ងៃ​នៅក្នុង​ទីក្រុង Hodeida រដ្ឋាភិបាល​និង​ក្រុម Huthi បានសម្រេច​កិច្ចព្រមព្រៀង​មួយ​លើ​ដំណាក់កាល​ដំបូង​នៃ​ការដកចេញ​ហើយ​ក៏បាន​ព្រមព្រៀង​លើ​គោលការណ៍​ស្តីពី​ដំណាក់កាល​ទី​ពីរ​ផងដែរ​។​

កិច្ចពិភាក្សា​នេះ​ត្រូវបាន​ដឹកនាំ​ដោយ​ឧ​ត្ត​ម​សេនីយ៍​ដា​ណឺ​ម៉ា​កលោក Michael Lollesgaard ក្នុងនាម​ជា​ប្រធាន​នៃ​គណៈកម្មាធិការ​សម្របសម្រួល​ដាក់ពង្រាយ​ឡើងវិញ (RCC) ដែល​រួមបញ្ចូល​ទាំង​រដ្ឋាភិបាល​និង​ក្រុម Huthi ផងដែរ​។​

សេចក្តីថ្លែងការណ៍​រប​ស់​អង្គការសហប្រជាជាតិ​បាន​និយាយថា “​បន្ទាប់ពី​កិច្ចពិភាក្សា​ដ៏​យូរ​ប៉ុន្តែ​ប្រកបដោយ​ផ្លែផ្កា​ដែល​សម្របសម្រួល​ដោយ​ប្រធាន RCC, ភាគី​ទាំង​ពីរបាន​ឈានដល់​កិច្ចព្រមព្រៀង​មួយ​ស្តីពី​ដំណាក់កាល​ទី​១​នៃ​ការដាក់​ពង្រាយ​កងកម្លាំង​ជាថ្មី​ទៅវិញទៅមក​”​។​

ភាគី​ទាំងពីរ​បាន​បង្កើត​វឌ្ឍនភាព​សំខាន់ៗ​លើ​ផែនការ​សម្រាប់​ការពង្រាយ​កងកម្លាំង​ឡើងវិញ​ប៉ុន្តែ​មិនមាន​កាលបរិច្ឆេទ​ត្រូវបាន​គេ​បញ្ជាក់​ដើម្បី​ចាប់ផ្ដើម​ការកាត់បន្ថយ​យោធា​នោះទេ​។​
​ដំណាក់កាល​ដំបូង​បាន​ផ្តល់នូវ​ការ​ដកទ័ព​ចេញពី​កំពង់ផែ Hodeida, Saleef, Ras Issa និង​ពី​ផ្នែក​ខ្លះ​នៃ​ទីក្រុង​ដែលមាន​កន្លែង​មនុស្សធម៌​។​

ក្រោម​កិច្ចព្រមព្រៀង​ទីក្រុង Stockholm, ការ​ដកទ័ព​ត្រូវបាន​គេ​សន្ម​ត់​ថា​នឹងធ្វើ​ឡើង​ពីរ​សប្តាហ៍​បន្ទាប់​ពីបទ​ឈប់​បាញ់​បាន​ចូល​ជាធរ​មាននៅ​ថ្ងៃទី​១៨​ខែធ្នូ​ប៉ុន្តែ​កាលបរិច្ឆេទ​កំណត់​ត្រូវ​ខកខាន​៕ AFP

​

Source: Kampuchea Thmey Daily