នៅក្នុងបទសម្ភាសន៍មួយដែលចាក់ផ្សាយកាលពីថ្ងៃចន្ទ ប្រធានាធិបតីប្រទេសវេណេហ្ស៊ូអេឡាលោក Nicolas Maduro បានចោទប្រកាន់រដ្ឋាភិបាលអាមេរិកថា កំពុងប្រឌិតវិបត្តិមួយក្នុងការប៉ុនប៉ងដើម្បីចាប់ផ្តើមសង្គ្រាមនៅក្នុងប្រទេសអាមេរិកខាងត្បូងមួយនេះ។
លោក Maduro បាននិយាយប្រាប់បណ្តាញផ្សព្វផ្សាយអាមេរិក ABC News ពីវិមានប្រធានាធិបតីនៅក្នុងទីក្រុង Caracas ថា “អ្វីៗគ្រប់យ៉ាងដែលរដ្ឋាភិបាលអាមេរិកធ្វើគឺបានបរាជ័យហើយ។ ពួកគេកំពុងព្យាយាមប្រឌិតវិបត្តិមួយដើម្បីបង្កើនភាពតានតឹងផ្នែកនយោបាយនិងអន្តរាគមន៍យោធានៅវេណេហ្ស៊ូអេឡាដើម្បីនាំសង្គ្រាមមកកាន់ប្រទេសអាមេរិកខាងត្បូងមួយនេះ”។
នៅព្រឹកថ្ងៃនោះ អនុប្រធានាធិបតីអាមេរិកលោក Mike Pence បានប្រកាសផ្តល់ជំនួយជាទឹកប្រាក់ចំនួន៥៦លានដុល្លារដល់ពលរដ្ឋវេណេហ្ស៊ូអេឡានិងទណ្ឌកម្មអាមេរិកកាន់តែតឹងរ៉ឹងជាងមុននៅពេលលោកចូលរួមក្នុងកិច្ចប្រជុំ Lima Group នៃបណ្តាប្រទេសអាមេរិកឡាទីនបូកប្រទេសកាណាដាដែលក៏ត្រូវបានចូលរួមដោយមេដឹកនាំបក្សប្រឆាំងលោក Juan Guaido ផងដែរ។
លោក Maduro បានរិះគន់កិច្ចពិភាក្សានៅទីក្រុង Bogota ថាជានយោបាយដើម្បីព្យាយាមបង្កើតរដ្ឋាភិបាលស្របគ្នានៅប្រទេសវេណេហ្ស៊ូអេឡា។
លោកបាននិយាយថា រដ្ឋាភិបាលក្រុងវ៉ាស៊ីនតោនចង់បានប្រេងរបស់វេណេហ្ស៊ូអេឡាហើយមានឆន្ទៈក្នុងការធ្វើសង្គ្រាមសម្រាប់ប្រេងនោះ។
លោក Maduro បាននិយាយថា “រដ្ឋាភិបាលជ្រុលនិយមដែលលោក Donald Trump ដឹកនាំគឺចង់បានសង្គ្រាមមួយលើប្រេងនិងលើសពីប្រេងនេះទៀត”។ ប៉ុន្តែលោកក៏បាននិយាយផងដែរថាលោកត្រៀមខ្លួនចូលរួមក្នុងកិច្ចសន្ទនាដោយផ្ទាល់ជាមួយរដ្ឋបាលរបស់លោក Trump ។
នៅពេលសួរថាតើគាត់នឹងអនុញ្ញាតឲ្យលោក Guaido វិលត្រឡប់មកកាន់ប្រទេសវិញដែរឬអត់នោះ? លោក Maduro បាននិយាយថា “គាត់ត្រូវតែគោរពច្បាប់”។
លោកបានអះអាងថា លោក Guaido អាចចាកចេញហើយត្រលប់មកវិញហើយនឹងត្រូវប្រឈមមុខនឹងយុត្តិធម៌ពីព្រោះយុត្តិធម៌បានហាមគាត់មិនឲ្យគាត់ចាកចេញពីប្រទេស៕ AFP
Source: Kampuchea Thmey Daily
0 Comments