កាលពីព្រលឹមថ្ងៃព្រហស្បតិ៍ សិស្សនិស្សិត ឪពុកម្តាយនិងអ្នកនយោបាយបានប្រារព្ធខួបលើកទី១នៃការបាញ់ប្រហារចំថ្ងៃទិវានៃក្តីស្រឡាញ់នៅឯវិទ្យាល័យរដ្ឋ Florida ដោយអ្នកខ្លះបានយំខ្សឹកខ្សួល អធិស្ឋាននិងអំពាវនាវឲ្យមានសកម្មភាព។
វិទ្យាល័យ Marjory Stoneman Douglas ដែលជាកន្លែងអតីតសិស្សម្នាក់បានសម្លាប់សិស្សចំនួន១៤នាក់និងបុគ្គលិកបីនាក់កាលពីឆ្នាំមុនបានផ្អាកការសិក្សាពេញមួយថ្ងៃនិងផ្តល់សេវាលួងលោមជំនួសវិញ។
ការស្មឹងស្មាធមួយភ្លែតបានធ្វើឡើងនៅម៉ោង១០:១៥នាទីដោយសិស្សមួយចំនួននៅសាលាក្នុងទីក្រុង Parkland នៃរដ្ឋ Florida។
កញ្ញា Victoria Gonzalez អាយុ១៨ឆ្នាំដែលឈរនៅជាប់សួនផ្កាបាននិយាយថា “វាជាថ្ងៃដ៏ពិបាក”។ នាង Gonzalez បាននិយាយអំពី Joaquin Oliver អាយុ១៨ឆ្នាំដែលស្ថិតក្នុងចំណោមអ្នកត្រូវបានសម្លាប់ដោយអតីតសិស្សសាលា Stoneman Douglas ថា “ខ្ញុំបានបាត់បង់មិត្តល្អរបស់ខ្ញុំ”។
ក្រោយមក មនុស្សរាប់ពាន់នាក់បានប្រមូលផ្តុំគ្នានៅឧទ្យាន Pine Trails Park សម្រាប់ពិធីសាសនាដ៏ខ្លីមួយដែលក្នុងនោះឈ្មោះរបស់ជនរងគ្រោះត្រូវបានគេអាន។
មានមនុស្សជាច្រើនបានពាក់អាវពណ៌ក្រហមរបស់សាលា Marjory Stoneman Douglas ខណៈដែលអ្នកផ្សេងទៀតបានពាក់អាវយឺតដែលមានឈ្មោះអ្នកស្លាប់នៅក្នុងការបាញ់ប្រហារនោះ។
កញ្ញា Julia Brighton អាយុ១៦ឆ្នាំដែលជាអ្នករស់រានមានជីវិតម្នាក់ប៉ុន្តែបានបាត់បង់មិត្តភក្តិនិងអ្នកជិតខាងដ៏ល្អបំផុតរបស់នាងក្នុងការវាយប្រហារនោះបាននិយាយថា “ការមើលឃើញមនុស្សទាំងអស់ចេញមកហើយយកចិត្តទុកដាក់គឺមានន័យណាស់”។
សិស្សសាលា Stoneman Douglas បានក្លាយទៅជាអ្នកប្រឆាំងនឹងអំពើហិង្សាដោយកាំភ្លើងនៅក្រោមផ្ទាំងបដា “ដើរដើម្បីជីវិតរបស់យើង” ដោយពួកគេបានបញ្ចុះបញ្ចូលឲ្យមានច្បាប់កាំភ្លើងតឹងរ៉ឹងជាងមុនហើយបានរៀបចំការតវ៉ានិងការប្រមូលផ្តុំគ្នា។
ប៉ុន្តែលោកស្រី Emma Gonzalez ដែលជាមេដឹកនាំម្នាក់ក្នុងចលនា “ដើរដើម្បីជីវិតរបស់យើង” នេះបាននិយាយថា ចលនានេះនឹងមិនដំណើរការទេហើយនៅស្ងៀមចាប់ពីថ្ងៃព្រហស្បតិ៍រហូតដល់ចុងសប្តាហ៍៕ AFP
Source: Kampuchea Thmey Daily
0 Comments