ការលាលែងពីតំណែងភ្លាមៗរបស់រដ្ឋមន្ត្រីកាណាដាមួយរូបកាលពីថ្ងៃអង្គារ បានបង្វែរការចោទប្រកាន់មិនច្បាស់លាស់អំពីការជ្រៀតជ្រែកក្នុងការកាត់ទោសព្រហ្មទណ្ឌលើក្រុមហ៊ុនវិស្វកម្មយក្សមួយឲ្យក្លាយទៅជាវិបត្តិនយោបាយកាន់តែជ្រាលជ្រៅសម្រាប់គណបក្សសេរីនិយមរបស់លោកនាយករដ្ឋមន្ត្រី Justin Trudeau។
ការលាលែងពីតំណែងរបស់លោកស្រី Jody Wilson-Raybould បានកើតឡើងក្រោយមានការទាមទារឲ្យរដ្ឋាភិបាលបញ្ជាក់ពីភាពស្អាតស្អំថាតើការិយាល័យរបស់លោក Trudeau បានដាក់សម្ពាធឲ្យលោកស្រីធ្វើអន្តរាគមន៍នៅក្នុងការកាត់ទោសក្រុមហ៊ុន SNC-Lavalin មែនឬក៏អត់។
ក្រុមហ៊ុនដែលមានមូលដ្ឋាននៅទីក្រុង Montreal មួយនេះត្រូវបានគេចោទប្រកាន់ពីបទប្រព្រឹត្តអំពើពុករលួយក្នុងឆ្នាំ២០១៥សម្រាប់ការសូកប៉ាន់ក្រុមមន្ត្រីនៅប្រទេសលីប៊ីក្នុងចន្លោះឆ្នាំ២០០១ដល់ឆ្នាំ២០១១ដើម្បីធានាបានកិច្ចសន្យារបស់រដ្ឋាភិបាលក្នុងអំឡុងពេលនៃការកាន់អំណាចរបស់អតីតបុរសខ្លាំង Moamer Kadhafi។
លោកស្រី Jody Wilson-Raybould ដែលជាអគ្គរាជអាជ្ញាជនជាតិដើមភាគតិចដំបូងគេនិងជារដ្ឋមន្ត្រីក្រសួងយុត្តិធម៌របស់ប្រទេសកាណាដាមុនពេលត្រូវបានប្តូរទៅកាន់តំណែងផ្សេងកាលពីខែមុនបានប្រកាសនៅលើបណ្តាញសង្គម Twitter ថា ដោយមានការព្រួយបារម្ភ លោកស្រីបានចាកចេញពីគណៈរដ្ឋមន្ត្រី។
ទន្ទឹមនោះ លោក Trudeau បាននិយាយថា គាត់មានការភ្ញាក់ផ្អើលនិងខកចិត្ត។ លោកនិយាយថា “រដ្ឋាភិបាលរបស់យើងបានធ្វើការងារយ៉ាងត្រឹមត្រូវនិងយោងតាមច្បាប់ទាំងអស់”។
ក្រុមហ៊ុន SNC-Lavalin បានបញ្ចុះបញ្ចូលរដ្ឋាភិបាលរួមទាំងមន្ត្រីជាន់ខ្ពស់នៅក្នុងការិយាល័យរបស់លោក Trudeau ផងដែរសម្រាប់ការដោះស្រាយក្រៅតុលាការ។
យោងតាមប្រភពមិនបញ្ចេញឈ្មោះដែលបានលើកឡើងដោយកាសែត Globe and Mail បានឲ្យដឹងថា លោកស្រី Wilson-Raybould បានបដិសេធស្នើសុំឲ្យព្រះរាជអាជ្ញាដោះស្រាយជាមួយក្រុមហ៊ុននេះ។
លោក Trudeau បានបដិសេធការចោទប្រកាន់ទាំងនេះដោយនិយាយថា “ខ្ញុំឬការិយាល័យរបស់ខ្ញុំមិនបានណែនាំឲ្យអគ្គរាជអាជ្ញាបច្ចុប្បន្នឬពេលមុនធ្វើការសម្រេចចិត្តជាក់លាក់ណាមួយនៅក្នុងបញ្ហានេះទេ”។
ហើយកាលពីថ្ងៃចន្ទ ស្នងការជនជាតិភាគតិចឯករាជ្យបានបើកការស៊ើបអង្កេតមួយដែលជាលើកទីពីរចូលទៅក្នុងនាយករដ្ឋមន្ត្រីដែលបានជាប់ឆ្នោតជាលើកដំបូងនៅឆ្នាំ២០១៥រូបនេះលើការសន្យាបោសសម្អាតអំពើពុករលួយខណៈការបោះឆ្នោតលើកក្រោយនៅសល់រយៈពេលត្រឹមតែប្រាំបីខែទៀតប៉ុណ្ណោះ៕ AFP
Source: Kampuchea Thmey Daily
0 Comments