ស្រែប្រាំងប្រជាពលរដ្ឋជាង700 ហិកតា នៅក្នុងឃុំដា និងឃុំសំរោងសែន ត្រូវបានអាជ្ញាធរខេត្ត និងមន្ទីរធនធានទឹកជួយសង្គ្រោះបាន៨០ភាគរយហើយ

កំពង់ឆ្នាំង ៖ កន្លងមកជាងកន្លះខែមុននេះ ស្រែប្រាំងប្រជាពលរដ្ឋ នៅក្នុងឃុំសំរោងសែន និងឃុំដារ ស្រុកកំពង់លែង បានខ្វះខាតទឹកជាង700 ហិកតា ប៉ុន្តែមកដល់ថ្ងៃទី១០ ខែមីនានេះ មន្ទីរធនធានទឹកនិងអាជ្ញាធរខេត្ត ជួយផ្តល់ម៉ាស៊ីនបូមទឹក ជួយផ្តល់ប្រេង ជួយសង្គ្រោះស្រូវស្រែខ្វះទឹកបាន 80 ភាគរយហើយ គឺនៅសល់ ២០ ភាគរយទៀត កំពុងបន្តជួយសង្គ្រោះរហូតដល់ប្រមូលផលរួចរាល់។

លោក ផៃ ភុន មេឃុំដារស្រុកកំពង់លែង នៅរសៀលថ្ងៃទី១០ ខែមីនានេះ ក្នុងពេលចុះពិនិត្យម៉ា ស៊ីនបូមទឹកជាមួយអាជ្ញាធរស្រុក និងមន្ទីរធនធានទឹក នៅស្ទឹងសំរោងសែន ក្នុងឃុំសំរោងសែន បាននិយាយឲ្យដឹងថា ៖ ស្រែប្រាំងនៅក្នុងឃុំដាសរុបមានចំនួន 2020 ហិកតា ក្នុងនោះកាលពីកន្លះខែមុននេះបានខ្វះទឹក 700 ហិកតា។ ប៉ុន្តែក្រោយពីអាជ្ញាធរឃុំបានរាយការណ៍ទៅថ្នាក់លើមក ក្រុមការងារថ្នាក់កណ្តាលរបស់ខេត្ត បានជួយប្រេង៧៥០លីត្រ មន្ទីរធនធានទឹកបានជួយប្រេង១០០០លីត្រ លោក អៀង វុធ អភិបាលរងខេត្ត បានជួយថវិកា២លានរៀល ទិញម៉ាស៊ីនបូមទឹក១គ្រឿង ក្នុងនោះដែរសមាគមក្នុងឃុំដា បានសហការជួយដាក់ម៉ាស៊ីនបូមទឹក៥គ្រឿងទៀត ដើម្បីបូមទឹកពីស្ទឹងសំរោងសែន ដែលមានប្រភពពីស្ទឹងជីនិត បូមបញ្ចូលក្នុងស្ទឹងរដ្ឋ ទើបប្រជាពលរដ្ឋម្ចាស់ស្រែដាក់ម៉ាស៊ីនបូមទឹកតាមគ្រួសារ បូមពីស្ទឹងរដ្ឋដាក់តាមស្រែរបស់គាត់បន្តទៀត ដែលគិតមកដល់ត្រឹមថ្ងៃទី១០ ខែមីនានេះ បូមទឹកសង្គ្រោះស្រូវស្រែបាន៨០ភាគរយហើយ នៅ២០ភាគរយទៀត កំពុងបន្តបូមទឹកជួយសង្គ្រោះបន្ថែមទៀត។

ទាក់ទងបញ្ហានេះ លោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្ត ក្នុងពេលចុះទៅពិនិត្យម៉ាស៊ីនបូមទឹកនៅឃុំសំរោងសែន នៅរសៀលថ្ងៃទី 10 ខែមីនា នេះបានអោយដឹងថា៖ កន្លងមកមន្ទីរធនធានទឹក បានផ្ដល់ប្រេងចំនួន 1000 លីត្ររួចហើយ នៅថ្ងៃនេះ មន្ទីរនឹងជួយផ្តល់ប្រេងបន្ថែមចំនួន១០០លីត្រ ដើម្បីសង្គ្រោះស្រូវប្រាំងខ្វះទឹកនៅក្នុងភូមិជ្រលង ចំនួន២០០ហិកតាទៀត ដែលនៅឆ្ងាយ និងដែលទឹកបានបូមដាក់ប្រឡាយមេមិនទាន់ហូរទៅដល់។

លោកប្រធានមន្ទីរធនធានទឹក បានបញ្ជាក់អោយដឹងទៀតថា ៖ ការពិតដីស្រែជាង២០០ហិកតា នៅក្នុងភូមិជ្រលង ឃុំដា ជាដីស្រែគាស់រានពង្រីកថ្មីរបស់ប្រជាពលរដ្ឋ ដែលគ្មានប្រភពទឹកគ្រប់គ្រាន់ គួបផ្សំនឹង រដូវប្រាំងនេះធាតុអាកាសក្តៅហួតហែង គ្មានភ្លៀងកក់ខែផងនោះ ធ្វើអោយប្រភពទឹកមួយចំនួនរីងស្ងួតអស់ ទើបធ្វើឱ្យស្រូវស្រែជាង២០០ហិកតាខាងលើខ្វះទឹក។ ប៉ុន្តែទោះបីយ៉ាងណា មន្ទីរធនធានទឹកនៅតែបន្តជួយផ្តល់ប្រេងចាក់ម៉ាស៊ីនចំនួន៥គ្រឿងបន្តទៀត និងជួយគ្រប់រូបភាពដែលអាចធ្វើបាន ដើម្បីជួយសង្គ្រោះដីស្រែទាំងអស់នោះអោយបាន។ ដូច្នេះបើខ្វះប្រេងបូមទឹក ស្នើលោកឃុំធ្វើលិខិតសុំប្រេងពីមន្ទីរធនធានទឹកជាបន្តទៀត៕