ឡុង ណងសៅ អ្នកប្រដាល់វ័យក្មេងមកពីក្លឹបសាលវ័ន្ដកីឡា និង គួន សុវណ្ណអ្នកប្រដាល់ក្លិបយុវវាលស្បូវខណ្ឌច្បារអំពៅ បានកក់កៅអីសម្រាប់ឡើងទៅប្រកួតបន្តនៅជុំទី២ សម្រាប់ព្រឹត្តិការណ៍ TV5 Boxing Knock-Out Series by K-Cement បន្ទាប់ពីពួកគេទាំងពីរឈ្នះលើដៃគូក្នុងការប្រកួតជម្រុះជុំទី១ កាលពីយប់ថ្ងៃទី៩ ខែមីនា ឆ្នាំ២០១៩ នៅសង្វៀនTV5 ព្រែកកំពឹសនោះ។
អ្នកប្រដាល់វ័យក្មេង ឡុង ណងសៅ ប្រើពេលមិនដល់មួយទឹកផងបានផ្ដួលអ្នកប្រដាល់វ័យក្មេងដូចគ្នា គឺប្រាក់ ស៊ីណាត ក្លិបតាឯកដំបងដែកមានរិទ្ធ ឲ្យសន្លប់។ ណង សៅ បានប្រើជើងទាត់ធ្វើឲ្យស៊ីណាត ដួលសន្លប់មុនស្នូរជួងបញ្ចប់ទឹកទី១។
ស៊ីណាត បានខ្ទាតចេញពីការប្រកួតយ៉ាងរហ័សបំផុត ក្នុងខណៈដែលឡុង ណងសៅ ត្រូវបន្តឡើងទៅប្រកួតនៅជុំទី២ទៀតនោះ។
អ្នកប្រដាល់ គួន សុវណ្ណ បានយកឈ្នះអ្នកប្រដាល់ សួ ចាន់រាជ មកពីក្លិបតាព្រហ្មមានជ័យបានដោយពិន្ទុមិនឯកច្ឆន្ទ។
ក្នុងការប្រកួតដែលមានតែ៣ទឹកនោះ សុវណ្ណ មានប្រៀបលើចាន់រាជទាំង៣ទឹកតែម្ដង។ ចាន់រាជបានខ្ទាតចេញពីការប្រកួត ក្នុងខណៈដែលសុវណ្ណកក់កៅអីសម្រាប់ឡើងទៅប្រកួតជម្រុះនៅជុំទី២ទៀតនោះ។
សូមបញ្ជាក់ថា ក្នុងចំណោមចៅក្រម៥រូបនោះ មាន៤រូបហើយដែលផ្ដល់ពិន្ទុឲ្យសុវណ្ណឈ្នះ និងមានតែមួយរូបប៉ុណ្ណោះ ដែលផ្ដល់ពិន្ទុឲ្យ ចាន់ រាជ ឈ្នះ។
ចំពោះ ការប្រកួតជាមិត្តភាពជាមួយអ្នកប្រដាល់ថៃវិញនោះ អ្នកប្រដាល់ជើងខ្លាំងអេលីត សាន់ ត្រូវអ្នកប្រដាល់វ័យចំណាស់របស់ថៃ រ៉េ ដា (Re Da)ទាត់ឲ្យខូចជើងនៅទឹកទី៤។
អេលីត សាន់ ដែលចូលចិត្តស៊ីជើងគូប្រកួតនោះ ពេលជួបជាមួយរ៉េ ដា គេបែរជាខូចជើងដោយសាររ៉េ ដា ទៅវិញ។ អេលីត សាន់ ដែលជាអ្នកនាំអាទិ៍វាយប្រហារជើងក្រោមមុននោះ ត្រូវរ៉េ ដា វាយប្រហារសងវិញ ធ្វើឲ្យអ្នកប្រដាល់កម្ពុជារូបនេះលើកទង់ជ័យ ស សុំចុះចាញ់មុនស្នូរជួងបញ្ចប់ទឹកទី៤តែម្ដង។
ការប្រកួតក្រៅព្រឹត្តិការណ៍ពានរង្វាន់រវាងអ្នកប្រដាល់រួមជាតិវិញនោះ ណាក់ សុខា មកពីក្លិបយុវវាលស្បូវ ត្រូវអ្នកប្រដាល់ចាន់ វិបុល ក្លិបតាព្រហ្មមានជ័យ ប្រើកែងវាយឲ្យសន្លប់ទឹកទី២។
នៅទឹកទី ១ ណាក់ សុខា ត្រូវអាជ្ញាកណ្ដាលរាប់៨មួយលើក ហើយបន្ទាប់ពីត្រូវមួយកណ្ដាប់ដៃរបស់វិបុល នោះ។ និយាយរួម ណាក់ សុខា ត្រូវអាជ្ញាកណ្ដាលព្រមានឲ្យវាយ តែមើល សុខា ហាក់ដូចញញើតកណ្ដាប់ដៃរបស់វិបុល ទើបគេមិនសូវហ៊ានប្រថុយ។ យ៉ាងណា មកដល់ទឹកទី២ សុខា សន្លប់ ដោយកែងរបស់ វិបុល៕
Source: Kampuchea Thmey Daily
0 Comments