គូស្នេហ៍ចំនួន៦គូរត្រូវបានវាយនឹងរំពាត់ជាសាធារណៈនៅក្នុងខេត្តអភិរក្ស Aceh របស់ប្រទេសឥណ្ឌូនេស៊ីកាលពីថ្ងៃចន្ទសម្រាប់ទំនាក់ទំនងក្រៅអាពាហ៍ពិពាហ៍ដោយក្នុងនោះមានស្ត្រីយ៉ាងតិចពីរនាក់មិនអាចដើរបានបន្ទាប់ពីការដាក់ទណ្ឌកម្មដ៏ឈឺចាប់នេះ។
ការវាយនឹងរំពាត់គឺជារឿងធម្មតាសម្រាប់បទល្មើសជាច្រើនក្នុងតំបន់នៅចុងកោះស៊ូម៉ាត្រាមួយនេះដែលរួមមានដូចជាការលេងល្បែង ការសេពគ្រឿងស្រវឹងនិងការរួមភេទជាមួយមនុស្សស្រលាញ់ភេទដូចគ្នា។
វាគឺជាខេត្តតែមួយគត់នៅក្នុងប្រទេសកាន់សាសនាឥស្លាមធំជាងគេបំផុតលើពិភពលោកមួយនេះដែលដាក់ច្បាប់ឥស្លាម។
មនុស្សចំនួន១២នាក់ដែលត្រូវបានវាយកាលពីថ្ងៃចន្ទគឺត្រូវបានគេចាប់ខ្លួនកាលពីចុងឆ្នាំមុនក្នុងអំឡុងពេលនៃការវាយឆ្មក់លើសណ្ឋាគារមួយនៅក្នុងទីក្រុង Banda Aceh របស់ខេត្តនេះ។ មនុស្សចំនួនបួននាក់ត្រូវបានវាយនឹងរំពាត់ចំនួនប្រាំពីរដងបន្ទាប់ពីត្រូវបានគេរកឃើញនៅជាមួយនឹងសមាជិកភេទផ្ទុយគ្នាដែលមិនមែនជាទំនាក់ទំនង។
មន្ត្រីមួយរូបបាននិយាយថា អ្នកផ្សេងទៀតត្រូវបានវាយនឹងរំពាត់ចាប់ពី១៧ទៅ២៥ដងដោយសារតែមានទំនាក់ទំនងជិតស្និតខាងក្រៅអាពាហ៍ពិពាហ៍។ អ្នកទាំង១២ក៏ត្រូវជាប់ពន្ធនាគារជាច្រើនខែផងដែរមុនពេលការដាក់ទណ្ឌកម្មជាសាធារណៈ។
ស្ត្រីមួយចំនួនបានស្រែកដោយក្តីឈឺចាប់ខណៈក្រុមមន្ដ្រី Sharia ដែលបិទមុខបានវាយពួកគេហើយយ៉ាងតិចមានមនុស្សពីរនាក់ត្រូវបាននាំចេញពីកន្លែងកើតហេតុដោយក្រុមមន្ត្រី Sharia។
អ្នកទស្សនានិងអ្នកកាសែតរាប់សិបនាក់បានមើលដោយស្ងាត់ស្ងៀម។ អ្នកខ្លះធ្លាប់បានប្រើទូរស័ព្ទស្មាតហ្វូននិងថេប្លេតដើម្បីថតឈុតឆាកនេះ។
ក្រុមសិទ្ធិមនុស្សបានរិះគន់ការវាយនឹងរំពាត់ជាសាធារណៈថាជាអំពើឃោរឃៅហើយប្រធានាធិបតីឥណ្ឌូនេស៊ីលោក Joko Widodo បានអំពាវនាវឲ្យបញ្ចប់ការប្រព្រឹត្តបែបនេះ។ ប៉ុន្តែការអនុវត្តបែបនេះមានការគាំទ្រយ៉ាងទូលំទូលាយក្នុងចំណោមប្រជាជនមូស្លីមរបស់ខេត្ត Aceh ដែលប្រហែល៩៨ភាគរយក្នុងចំណោមប្រជាជនប្រាំលាននាក់របស់ខ្លួនគឺកាន់សាសនាឥស្លាម។
កាលពីខែធ្នូ បុរសពីរនាក់ដែលបានរួមភេទជាមួយក្មេងស្រីមិនទាន់គ្រប់អាយុត្រូវបានគេវាយចំនួន១០០ដង៕ AFP
Source: Kampuchea Thmey Daily
0 Comments