ប៉ូលិស​ហូ​ឡង់​ចាប់ខ្លួន​ជនសង្ស័យ​ថ្មី​ពាក់ព័ន្ធ​ការវាយប្រហារ​លើ​រថភ្លើង​ដឹក​អ្នកដំណើរ​

ប៉ូលិស​ហូ​ឡង់​បាន​និយាយថា ពួកគេ​កំពុង​ស៊ើបអង្កេត​លើ​ហេតុផល​ជំរុញ​អំពើ​ភេរវកម្ម​សម្រាប់​សម្រាប់​ការវាយប្រហារ​លើ​រថភ្លើង​ដឹក​អ្នកដំណើរ​ក្នុង​ទីក្រុង Utrecht ខណៈដែល​ពួកគេ​បាន​ចាប់ខ្លួន​ជនសង្ស័យ​ថ្មី​ម្នាក់​កាលពី​ថ្ងៃ​អង្គារ​ពាក់ព័ន្ធ​ការបាញ់សម្លាប់​នេះ។

អាជ្ញាធរ​បាន​និយាយថា ពួកគេ​បាន​រកឃើញ​លិខិត​ដ៏​គួរ​ឲ្យ​សង្ស័យ​មួយ​នៅក្នុង​រថយន្ត​ដែល​ប្រើប្រាស់​ដោយ​ជនសង្ស័យ​ដើមកំណើត​ទួរគី​ឈ្មោះ Gokmen Tanis អាយុ​៣៧​ឆ្នាំ​ដែលជា​ហេតុ​ធ្វើ​ឲ្យ​ពួកគេ​ចាត់ទុកថា អំពើ​ភេរវកម្ម​នេះ​អាចពាក់ព័ន្ធ​នឹង​ការបំផ្លិចបំផ្លាញ​កាលពី​ថ្ងៃ​ចន្ទ​ដែល​ក្នុងនោះ​មនុស្ស​ចំនួន​៣​នាក់​ត្រូវបាន​សម្លាប់​និង​៧​នាក់​រងរបួស​។​

ព្រះរាជអាជ្ញា​បាន​និយាយថា មន្ដ្រី​ប្រឆាំង​ភេរវកម្ម​ប្រដាប់អាវុធ​បាន​ចាប់ខ្លួន​ជនសង្ស័យ​ថ្មី​ម្នាក់​ដែលមាន​អាយុ​៤០​ឆ្នាំ​នៅក្នុង​ទីក្រុង Utrecht ដែល​ត្រូវបាន​គេ​សង្ស័យថា​ជាប់​ពាក់ព័ន្ធ​ក្នុង​ឧបទ្ទវហេតុ​បាញ់ប្រហារ​នេះ​។ ព្រះរាជអាជ្ញា​បន្ថែមថា តួនាទី​របស់គាត់​កំពុង​ត្រូវបាន​ស៊ើបអង្កេត​បន្ថែមទៀត​។​

ព្រះរាជអាជ្ញា​បាន​បន្ថែមទៀតថា បុរស​ពីរ​នាក់​ផ្សេងទៀត​ដែល​ត្រូវបាន​ចាប់ខ្លួន​កាលពី​ថ្ងៃ​ចន្ទ​ទាក់ទង​នឹង​ការបាញ់ប្រហារ​នោះ​គឺ​ត្រូវបាន​ដោះលែង​។​

ប៉ូលិស​និង​ព្រះរាជអាជ្ញា​របស់​ប្រទេស​ហូ​ឡង់​បាន​និយាយ​នៅក្នុង​សេចក្តីថ្លែងការណ៍​រួមមួយ​ថា “​រហូតមកដល់​ពេលនេះ ហេតុផល​ជំរុញ​សម្រាប់​អំពើ​ភេរវកម្ម​នេះ​កំពុង​ត្រូវបាន​គេ​យកចិត្តទុកដាក់​យ៉ាងខ្លាំង​ក្លា​។ នេះ​អាស្រ័យ​លើ​លិខិត​មួយ​ដែល​រកឃើញ​នៅក្នុង​រថយន្ត​”​។​

ដោយ​ច្រានចោល​របាយការណ៍​ដែលថា​ការបាញ់ប្រហារ​នេះ​គឺ​ដោយសារតែ​ជម្លោះ​គ្រួសារ​នោះ សេចក្តីថ្លែងការណ៍​នេះ​បាន​បន្ថែមថា “​ការស៊ើបអង្កេត​របស់​យើង​បាន​បង្ហាញថា គ្មាន​ទំនាក់ទំនង​រវាង​ជនសង្ស័យ​និង​ជនរងគ្រោះ​ទេ​”​។​

ប៉ូលិស​ប្រដាប់អាវុធ​បាន​ចាប់ខ្លួន​លោក Tanis បន្ទាប់ពី​ការតាមប្រមាញ់​រយៈពេល​ប្រាំបី​ម៉ោង​ដែល​ស្ទើរតែ​បាន​បិទ​ទីក្រុង​ធំ​បំផុត​លំដាប់​ទី​បួន​របស់​ប្រទេស​ហូ​ឡង់​មួយ​នេះហើយ​ធ្វើ​ឲ្យ​សន្តិសុខ​ត្រូវ​រឹតបន្តឹង​នៅតាម​ព្រលានយន្តហោះ​និង​កន្លែង​សំខាន់ៗ​នៅ​ទូទាំងប្រទេស​។​

លោក Tanis ត្រូវបាន​គេ​រំពឹងថា​នឹង​បង្ហាញខ្លួន​នៅ​ចំពោះមុខ​ចៅក្រម​ក្នុង​សប្តាហ៍​នេះ​៕ AFP

​

Source: Kampuchea Thmey Daily