កណ្ដាល ៖ ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និង លោកបណ្ឌិត ម៉ៅ ភិរុណ អភិបាលនៃគណៈអភិបាលខេត្ត កណ្តាល បានអញ្ជើញសម្ពោធដាក់ឲ្យប្រើប្រាស់ជាផ្លូវការនូវទីស្នាក់ការគយ និងរដ្ឋាករក្អមសំណ រួមនឹងអគារស្នាក់នៅរបស់មន្ត្រីគយនៅទីនេះ កាលពីព្រឹកថ្ងៃទី៧ ខែមីនា ឆ្នាំ២០១៩នេះ។
ក្នុងឱកាសនេះ ឯកឧត្តមអគ្គបណ្ឌិតសភាចារ្យឧបនាយករដ្ឋមន្ត្រី បានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងប្រកបដោយស្មារតីទទួលខុសត្រូវរបស់មន្ត្រីគយ និងរដ្ឋាករគ្រប់រូប ព្រមទាំងបានផ្តល់ការណែនាំដល់មន្ត្រីគយ ដោយសង្កត់ធ្ងន់លើក្រមសីលធម៌វិជ្ជាជីវៈរបស់មន្ត្រីគយ និងរដ្ឋាករ និងត្រូវប្រកាន់ខ្ជាប់អភិក្រម៥ប្រការ របស់ សម្ដេចតេជោ នាយករដ្ឋមន្ត្រី គឺ ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់។
ឯកឧត្តមឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន ក៏បានណែនាំឲ្យមន្ត្រីគយដែលឈរជើងនៅតាមច្រកព្រំដែនទាំងអស់ បន្តយកចិត្តទុកដាក់ទៅលើការទប់ស្កាត់ការរត់ពន្ធខុសច្បាប់ ដែលជាហេតុនាំឲ្យបាត់បង់ចំណូល ហើយចំពោះទីស្នាក់ការគយក្អមសំណ ដែលបានសម្ពោធដាក់ឲ្យប្រើប្រាស់ រួមនឹងអគារស្នាក់នៅរបស់មន្ត្រីគយនៅទីនេះផងនោះ គឺអាចឆ្លើយតបយ៉ាងមានប្រសិទ្ធភាពជាងមុននៅលើការបំពេញការងារប្រចាំថ្ងៃរបស់មន្ត្រីគយ ដែលការធ្វើឲ្យមានប្រសិទ្ធភាព និងស័ក្ដិសិទ្ធិភាព ក្នុងការបំពេញការងាររបស់អស់លោក លោកស្រី គឺជារឿងដែលត្រូវធ្វើជាចាំបាច់ ក្នុងនាមយើង ជាអ្នករាជការ ជាសេនាធិការរបស់រាជរដ្ឋាភិបាល ដែលបានផ្តល់នូវសេចក្តីទុកចិត្តមកលើ លោក លោកស្រី។
ឯកឧត្ដមបានគូសបញ្ជាក់ថា បើយើងធ្វើឲ្យបាត់ចំណូលពន្ធដោយ ការធ្វេសប្រហែសបណ្ដោយឲ្យមានការរត់ពន្ធឆ្លងកាត់ព្រំដែននោះ មានន័យថា យើងនឹងមានការខាតបង់ថវិកាជាច្រើនក្នុង១ឆ្នាំៗជាក់ជាមិនខានឡើយ។
គួររំលឹកថា តាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជាបានឲ្យដឹង ថា ការប្រមូលពន្ធគយមានការកើនឡើងជាបន្តបន្ទាប់ គឺពុំមានការថយចុះទេ ដោយកាលពី ឆ្នាំ២០១៨ កន្លងទៅនេះចំណូលសរុបមានប្រមាណប្រមាណ២.៥០០លានដុល្លារអាមេរិក កើនឡើងជាង៣២% ធៀបនឹងឆ្នាំ២០១៧៕
Source: Kampuchea Thmey Daily
0 Comments