ក្នុងមួយយប់ នៅអាណាចក្រខណ្ឌទួលគោកមានរថយន្ត២គ្រឿងបើកបុកទ្រូងផ្លូវ របាំងថ្មពុះចែកទ្រូងផ្លូវក៏បាក់ ឯរថយន្តក៏រួញអស់ផ្នែកខាងមុខទាំង២គ្រឿង

Cambodia News March 08, 2019

ភ្នំពេញ ៖ រថយន្តចំនួន២ គ្រឿងបានទទួលរងការខូចខាតផ្នែកខាងមុខយ៉ាងធ្ងន់ធ្ងរ ខណៈដែលរថយន្តទាំង២ គ្រឿងនេះ បើកបរយ៉ាងលឿន ដូចព្យុះ ហើយបានជ្រុលចង្កូតទៅបុករបាំងថ្មបែងចែកទ្រូងផ្លូវនៅទីតាំងផ្សេងគ្នាយ៉ាងពេញទំហឹងនោះ។

ហេតុការណ៍គ្រោះថ្នាក់ចរាចរណ៍ខាងលើនេះ បានកើតឡើង២ករណីផ្សេងគ្នា ប៉ុន្តែស្ថិតនៅក្នុងមូលដ្ឋានខណ្ឌទួលគោកតែមួយ ហើយក៏ស្ថិតក្នុងរាត្រីជាមួយគ្នាផងដែរ។

មន្ត្រីប៉ូលិសខណ្ឌទួលគោកបានឱ្យដឹងថា នៅថ្ងៃព្រហស្បតិ៍២កើតខែផល្គុនឆ្នាំចសំរឹទ្ធិស័កព-ស២៥៦២ ត្រូវនឹងថ្ងៃទី០៧ខែមីនា ឆ្នាំ២០១៩ មានករណីគ្រោះថ្នាក់ ចរាចរណ៍ចំនួន២លើក។ ក្នុងនោះលើកទី១ នៅវេលាម៉ោង ២២និង១០នាទី នៅត្រង់ចំណុចផ្លូវ២៨៩កែងផ្លូវ៦១៤ក្នុងសង្កាត់បឹងកក់ទី២ ខណ្ឌទួលគោក រវាងរថយន្តម៉ាក Lexus 400h ពណ៍ស ពាក់ស្លាកលេខភ្នំពេញ២AV ៤៧២៩បានបុកជាមួយទ្រូងផ្លូវបាក់មួយកង់បណ្តាលអោយក្បាលនាគពុះចែកទ្រូងផ្លូវខូច ០១ កង់រថយន្តខូចធ្ងន់១គ្រឿង។

ចំណែកករណីលើកទី២ បានកើតឡើងកាលពីវេលាម៉ោង ០២និង៣០នាទីរំលងអធ្រាតត្រង់ចំណុចស្តុបពេទ្យលោកសង្ឃ(ប២) ផ្លូវ៥៩៨កែង១១០ ភូមិ១៦ ក្នុងសង្កាត់ទឹកល្អក់ទី១ ខណ្ឌទួលគោក រវាងរថយន្តម៉ាក Pruise ពណ៌ក្រហមពាក់ស្លាកលេខភ្នំពេញ២AM៣៩៥៧ បានបុកជាមួយទ្រូងផ្លូវបាក់មួយកង់ដូចគ្នា បណ្តាលអោយ ក្បាលនាគពុះចែកទ្រូងផ្លូវខូច ០១ កង់ រថយន្តខូចធ្ងន់១គ្រឿង។

ក្រោយការវាស់វែងរួចរថយន្តទាំង២គ្រឿងត្រូវបានសមត្ថកិច្ចប៉ូលិសចរាចរណ៍ខណ្ឌទួលគោកប្រគល់ទៅឱ្យប៉ូលិសការិយាល័យចរាចរណ៍ជើងគោករាជធានីភ្នំពេញដើម្បីចាត់ការទៅតាមច្បាប់៕