កំពង់ឆ្នាំង ៖ បុរសជាអ្នកឡើងត្នោតម្នាក់ ត្រូវក្មេងឃ្វាលគោប្រទះឃើញដេកស្លាប់នៅក្រោមដើមត្នោត ដោយសារតែគាត់បានធ្លាក់ពីលើដើមត្នោត គ្មានអ្នកណាដឹង។ ការប្រទះឃើញនេះ បានកើតឡើងនៅម៉ោង២និង២៨នាទី រសៀលថ្ងៃទី១៩ ខែមីនា ឆ្នាំ២០១៩ នៅចំណុចដើមត្នោតមួយដើមដែលនៅខាងកើតសាលាបឋមសិក្សាវត្តភ្នំ ស្ថិតនៅក្នុងឃុំត្រងិល ស្រុកកំពង់លែង។
សមត្ថកិច្ចនគរបាលមូលដ្ឋានបានឲ្យដឹងថា បុរសរងគ្រោះមាន ឈ្មោះ សេក សាវ៉ាត ហៅ(ឆក) អាយុ៤៣ឆ្នាំ រស់នៅក្នុងភូមិ/ឃុំ កើតហេតុខាងលើ មុខរបរធ្វើស្រែចម្ការ និងឡើងត្នោតជាប្រចាំ។
ដោយឡែក នៅថ្ងៃកើតហេតុ ក្រោយបាយថ្ងៃត្រង់រួច បុរសរងគ្រោះបានចេញទៅឡើងត្នោតដូចរាល់ថ្ងៃ តែមិនដឹងជាយ៉ាងម៉េច ទើបបុរសរងគ្រោះធ្លាក់ពីលើដើមត្នោត បណ្ដាលឲ្យស្លាប់តែម្នាក់ឯងដោយគ្មានអ្នកដឹង។ រហូតដល់ម៉ោង២និង២៨នាទី ថ្ងៃដដែល ទើបមានក្មេងឃ្វាលគោទៅម្តុំនោះ ក៏បានប្រទះឃើញបុរសរងគ្រោះដេកស្លាប់នៅក្រោមដើមត្នោត ដោយមិនដឹងថា ស្លាប់តាំងពីពេលណាមកនោះទេ។
ក្រោយពីសមត្ថកិច្ចនគរបាលមូលដ្ឋានបានពិនិត្យសពតាមនីតិវិធីហើយបានឲ្យដឹងថា ជនរងគ្រោះពិតជាស្លាប់ដោយគ្រោះថ្នាក់ឆ្លាក់ពីលើដើមត្នោតពិតប្រាកដមែន ហើយក៏បានប្រគល់សពឲ្យក្រុមគ្រួសារយកទៅធ្វើបុណ្យទានតាមប្រពៃណីនៅក្នុងលំនៅដ្ឋានផងដែរ៕
Source: Kampuchea Thmey Daily
0 Comments