ភ្នំពេញ ៖ ក្រុមយុវជនស្រី/ប្រុសចំនួន៥នាក់ ត្រូវបានសមត្ថកិច្ចនគរបាលខណ្ឌសែនសុខ ចាប់ឃាត់ ខ្លួន ខណៈពួកគេកំពុងតែជួបជុំគ្នាសេព និងជួញដូរថ្នាំញៀន ដោយខុសច្បាប់ នៅចំណុចបន្ទប់ផ្ទះ ជួលមួយកន្លែង ស្ថិតនៅក្នុងភូមិគោកឃ្លាង សង្កាត់គោកឃ្លាង ខណ្ឌសែនសុខ កាលពីវេលាម៉ោង៤រសៀល ថ្ងៃទី២០ ខែមីនា ឆ្នាំ២០១៩។
តាមរបាយការណ៍ផ្លូវការរបស់សមត្ថកិច្ចបានឲ្យដឹងថា ៖ ក្រុមជនជាប់សង្ស័យទាំង៥នាក់ខាងលើនោះ ១.ឈ្មោះ ស្រី ខេម៉ា ភេទប្រុស អាយុ៣២ឆ្នាំ ជនជាតិខ្មែរ មុខរបរជាងដែក ស្នាក់នៅបន្ទប់ជួលភូមិគោកឃ្លាង សង្កាត់គោកឃ្លាង ខណ្ឌសែនសុខ។ ២.ឈ្មោះ មុនី តារា ភេទប្រុស អាយុ៣០ឆ្នាំ ជនជាតិខ្មែរ មុខរបរជាងដែក ស្នាក់នៅបន្ទប់ជួលភូមិត្រពាំងក្រសាំងសង្កាត់កាកាប ខណ្ឌពោធិ៍សែនជ័យ។ ៣.ឈ្មោះ ឈៀង រិទ្ធ ភេទប្រុស អាយុ២៥ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅបន្ទប់ជួល ភូមិដំណាក់ សង្កាត់គោកឃ្លាង ខណ្ឌសែនសុខ។ ៤.ឈ្មោះ គឹម បូឌី ភេទស្រី អាយុ២៥ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅបន្ទប់ជួល ភូមិដំណាក់ សង្កាត់គោកឃ្លាង ខណ្ឌសែនសុខ។ ៥.ឈ្មោះ ថុន ស៊ីណា ភេទស្រី អាយុ២២ឆ្នាំ ជនជាតិខ្មែរ មុខរបរកម្មកររោងចក្រ ស្នាក់នៅបន្ទប់ជួលភូមិត្រពាំងក្រសាំង សង្កាត់កាកាប ខណ្ឌពោធិ៍សែនជ័យ។
នៅក្នុងការបង្ក្រាបនោះ ប៉ូលិស បានដកហូតសម្ភារៈពាក់ព័ន្ធបទល្មើសមួយចំនួនដូចជា ថ្នាំក្រាមពណ៌សថ្លាចំនួន២កូនថង់តូច , ម៉ូតូ១គ្រឿង ម៉ាកសេ១២៥ ពណ៌ខៀវ ផលិតឆ្នាំ២០១៦ ពាក់ស្លាកលេខភ្នំពេញ 1CS-8405 និងទូរស័ព្ទដៃចំនួន៥គ្រឿង។
ពាក់ព័ន្ធការឃាត់ខ្លួននេះ សមត្ថកិច្ចនិយាយថា មុនពេលកើតហេតុកម្លាំងនគរបាល ប៉ុស្តិ៍គោកឃ្លាងបានចុះធ្វើការត្រួតពិនិត្យរដ្ឋបាលនៅចំណុចខាងលើ ក៏ឃើញក្រុមជនសង្ស័យទាំង៥នាក់ខាងលើកំពុងតែនាំគ្នាជក់(សេព)ថ្នាំញៀន នៅក្នុងបន្ទប់ជួលដែលនៅទីនោះ សមត្ថកិច្ចបានឆែកឆេររកឃើញមានថ្នាំញៀន និងឧបករណ៍សម្រាប់ជក់ផង។ ដោយមានវត្ថុតាងបទល្មើសគ្រប់គ្រាន់ បន្ទាប់មកសមត្ថកិច្ច ក៏បានឃាត់ខ្លួនជនសង្ស័យទាំង៥នាក់ រួមទាំងវត្ថុតាង យកមកធ្វើការសាកសួរ នៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី៕
Source: Kampuchea Thmey Daily
0 Comments