បំពាក់កន្សែង ដល់ក្រុមយុវជនស្ម័គ្រចិត្ត កាកបាទក្រហម

បន្ទាយមានជ័យ ៖ យុវជនស្ម័គ្រចិត្តកាកបាទក្រហម នៃសាលាវិទ្យាល័យអូរអំបិល,សម្ដេចឪ,សិរីសោភ័ណ ខេត្តបន្ទាយមានជ័យ ដែលបានចូលរួមវគ្គបណ្ដុះបណ្ដាល ចំណេះដឹងជាមូលដ្ឋាន ស្ដីពីចលនា កាកបាទក្រហម និងវិជ្ជាសង្គ្រោះបឋម ដែលបានសិក្សាអស់រយៈពេល២ថ្ងៃ ត្រូវបានធ្វើពិធីបិទវគ្គបណ្ដុះបណ្ដាល និងធ្វើពិធីបំពាក់កន្សែងសរុប១៥០នាក់ កាលពីថ្ងៃទី០៤ ខែមីនា ឆ្នាំ២០១៩។

លោក សាន ឃិត នាយកប្រតិបត្តិសាខាកាកបាទក្រហមខេត្តបន្ទាយមានជ័យ បានសំដែងនូវអំណរគុណ និងកោតសរសើរដល់ក្រុមយុវជនទាំងពីរភេទ ដែលបានលះបង់ ពេលវេលាដ៏មានតម្លៃមកចូលរួមជាមួយ ការងារមនុស្សធម៌របស់កាកបាទក្រហមកម្ពុជា ដែលជាស្ថាប័នមនុស្សធម៌ធំជាងគេក្នុងប្រទេសកម្ពុជា ហើយគោលនយោបាយរបស់ក្រុមយុវជនស្ម័គ្រចិត្តកាកបាទក្រហមនេះ បញ្ជាក់ពីការទទួលស្គាល់តួនាទីដ៏មានសារៈសំខាន់ របស់យុវជន និងគុណតម្លៃ នៅក្នុងការចូលរួម ចំណែកជាមួយអ្នកមានវ័យចម្រុះមកពីគ្រប់មជ្ឈដ្ឋាន ខិតខំប្រឹងប្រែងរួមគ្នា ពុះពារដោះស្រាយ រាល់បញ្ហាប្រឈមនានា ជូនប្រជាពលរដ្ឋងាយរងគ្រោះ។

លោក លី សារី ប្រធានគណៈកម្មាធិការសាខាកាកបាទក្រហមខេត្តបន្ទាយមានជ័យ មានប្រសាសន៍ថា វគ្គបណ្ដុះបណ្ដាលនេះ ត្រូវបានផ្តោតយ៉ាងសំខាន់លើការកសាងសមត្ថភាព ក្នុងការអនុវត្តន៍សកម្មភាពរបស់ខ្លួន ដើម្បីរួមចំណែកក្នុងការកាត់បន្ថយ ភាពងាយរងគ្រោះ របស់ប្រជាពលរដ្ឋ ដែលរស់នៅក្នុងតំបន់មួយចំនួន ដែលងាយរងគ្រោះច្រើនជាងគេ វគ្គបណ្ដុះបណ្ដាលនេះ អាចផ្តល់ឱកាស‌ឲ្យយុវជនទទួលបានការអប់រំ បង្កើតសមត្ថភាព ក្នុងគុណតម្លៃមនុស្សធម៌ និងគោលការណ៍គ្រឹះរបស់ចលនាកាកបាទក្រហម រួមទាំងជំនាញបំណិនផ្សេងៗ ដែលជាតម្រូវការចាំបាច់ ក្នុងការងារស្ម័គ្រចិត្តផ្តល់សេវាកម្មមនុស្សធម៌ឲ្យបានកាន់តែប្រសើរ។

លោក លី សារី បានមានប្រសាសន៍ផ្ដាំផ្ញើដល់ក្រុមយុវជនស្ម័គ្រចិត្តទាំង១៥០នាក់ អំពីទិសដៅ នៃចលនាកាកបាទក្រហមនេះ ត្រូវប្រកាន់ភ្ជាប់ គឺ លើកកម្ពស់ស្មារតី នៃវប្បធម៌ចែករំលែក មិត្តអប់រំមិត្ត មិត្តជួយមិត្ត ធ្វើជាគំរូក្នុងចំណោមយុវជន កៀរគរប្រមូលផ្តុំគ្នាទៅជាកម្លាំងចលករ កសាងភាពធន់មាំរបស់សហគមន៍ និងជាកម្លាំងចូលរួមដោះស្រាយបញ្ហាប្រឈមនានា ដើម្បីប្រជាពលរដ្ឋងាយរងគ្រោះ និងបន្តអភិវឌ្ឍន៍សមាគមជាតិប្រកបដោយចិរភាព។

ជាចុងក្រោយ លោក លី សារី ក៏បានធ្វើការផ្ដាំផ្ញើដល់ក្រុមយុវជនទាំងអស់ ខិតខំរៀនសូត្រ ដើម្បីតបស្នងសងគុណឪពុកម្ដាយ ចូលរួមបម្រើសង្គមជាតិ ចូរគោរពច្បាប់ចរាចរណ៍ ជិះម៉ូតូត្រូវពាក់មួកសុវត្ថិភាព ជៀសវាងឲ្យឆ្ងាយ ពីគ្រឿងញៀន ទាំងការជួញដូរ ទាំងប្រើប្រាស់ គ្មានក្មេងទំនើង បងធំបងតូចនោះឡើយ៕