កណ្ដាល ៖ មន្ត្រីកងរាជអាវុធហត្ថលើផ្ទៃប្រទេសម្នាក់ រងរបួសត្រង់ក្រោមដោះខាងស្តាំ ត្រូវបានបញ្ជូនទៅកាន់មន្ទីរពេទ្យរាជធានីភ្នំពេញ ក្រោយប៉ុនប៉ងបាញ់សម្លាប់ប្រពន្ធ ហើយត្រូវឪពុកក្មេកឃើញស្ទុះទៅរាំងចាប់យកកាំភ្លើងបណ្តាលអោយគ្រាប់ផ្ទុះឡើងត្រូវខ្លួនឯងដោយសារតែការប្រចណ្ឌមិនមានហេតុផល។
ហេតុការណ៍នេះ បានកើតឡើងនៅថ្ងៃ ចន្ទ ១៣ រោច ខែ មាឃ ឆ្នាំ ច សំរឹទ្ធិស័ក ព.ស ២៥៦២ត្រូវនឹងថ្ងៃទី០៤ ខែមីនា ឆ្នាំ ២០១៩វេលាម៉ោង ១១និង៤០ នាទីចំណុចភូមិសំរោងក្អែរ៣ ឃុំ សំរោងធំ ស្រុក កៀនស្វាយ ខេត្ត កណ្តាល។
នគរបាលស្រុកកៀនស្វាយបានអោយដឹងថា ជនរងគ្រោះចំនួន០២នាក់ ទី០១ឈ្មោះ ឈួន ជេស ភេទប្រុស អាយុ៥៣ ឆ្នាំ ជនជាតិខ្មែរ មុខរបរកសិករ មានទីលំនៅភូមិ សំរោងក្អែរ៣ ឃុំសំរោងធំ ស្រុក កៀនស្វាយ ខេត្តកណ្តាល (ឪពុកក្មេកជនសង្ស័យ)។ ទី០២ឈ្មោះ ឈួន រ៉ានី ភេទស្រី អាយុ២៥ឆ្នាំ ស្នាក់នៅសង្កាត់ផ្សារដើមថ្កូវ ខណ្ឌមានជ័យ រាជធានីភ្នំពេញ (ប្រពន្ធជនសង្ស័យ)។
ជនសង្ស័យមានឈ្មោះ គង់ ចាន់ថន ភេទប្រុស អាយុ៣៨ ឆ្នាំ ជនជាតិខ្មែរ មុខរបរកងរាជអាវុធហត្ថលើផ្ទៃប្រទេស ឋានន្តរសក្ដិវរសេនីយ៍ត្រីមានទីលំនៅភូមិ លេខ៨ សង្កាត់កំពង់លាវ ក្រុង ព្រៃវែង ខេត្ត ព្រៃវែង រងរបួសសម្រាកនៅមន្ទីរពេទ្យព្រះកេតុមាលា។
នគរបាលបានអោយដឹងថា ជនសង្ស័យ និងប្រពន្ធឈ្មោះ ឈួន រ៉ានី ភេទស្រី អាយុ ២៥ ឆ្នាំ បច្ចុប្បន្ន ស្នាក់នៅសង្កាត់ផ្សារដើមថ្កូវ ខណ្ឌមានជ័យ រាជធានីភ្នំពេញ។ នៅថ្ងៃទី០៤ ខែមីនា ឆ្នាំ២០១៩ វេលាម៉ោង ១១និងង៣០នាទី ប្រពន្ធជនសង្ស័យបានជិះឡានឈ្នួលពីភ្នំពេញមកផ្ទះឪពុកស្ថិតក្នុងភូមិ សំរោងក្អែរ៣ ឃុំសំរោងធំ ស្រុក កៀនស្វាយ ខេត្ត កណ្តាល រួចក៏ឲ្យបងស្រីឈ្មោះ ឈួន រ៉ាឌី ជូនទៅរកគ្រូទស្សន៍ទាយ។ ពេលនោះជនសង្ស័យក៏បានជិះម៉ូតូ០១ គ្រឿងម៉ាក C125 ពណ៌ខ្មៅ មកដល់ផ្ទះដែរ រួចសួរឪពុកក្មេកថាប៉ាមានឃើញប្រពន្ធខ្ញុំទេ ពេលនោះឪពុកក្មេកបានឆ្លើយប្រាប់ថា ៖ អត់ឃើញទេ ស្របពេលនោះឈ្មោះឈួន រ៉ាឌីបានឌុបប្រពន្ធជនសង្ស័យមកដល់ស្រាប់ តែជនសង្ស័យបានជេរប្រពន្ធថា ៖ មីចោរសំផឹងទើបមកពីឲ្យប្រុស ជេរ រួចជនសង្ស័យក៏ដកកាំភ្លើងបាញ់ប្រពន្ធតែត្រូវឪពុកក្មេកស្ទុះទៅចាប់ដៃជ្រោងឡើងទៅលើនិងបានប្រតាយប្រតប់ជាមួយឪពុកក្មេក។ ពេលនោះក៏ឮស្នូរផ្ទុះអាវុធមួយគ្រាប់ត្រូវចំក្រោមដោះខាងស្តាំជនសង្ស័យ។ បន្ទាប់មកឪពុកក្មេកជនសង្ស័យបានតេទូរស័ព្ទមកប្តឹងកម្លាំងប៉ុស្តិ៍រដ្ឋបាលសំរោងធំ ចុះជួយអន្តរាគមន៍។ ពេលទទួលបានព័ត៌មានកម្លាំងប៉ុស្តិ៍ បានចុះទៅដល់កន្លែងកើតហេតុឲ្យប្រពន្ធជនសង្ស័យបញ្ជូនជនសង្ស័យទៅមន្ទីរពេទ្យព្រះកេតុមាលាជាមួយកម្លាំងប៉ុស្តិ៍០២នាក់ ។
ករណីនេះ កម្លាំងជំនាញបានសហការជាមួយកម្លាំងនគរបាលបាលប៉ុស្តិ៍ចុះទៅដល់កន្លែងកើតហេតុ និងមន្ទីរពេទ្យព្រះកេតុមាលា ហើយបន្តចាត់ការតាមនីតិវិធី៕
Source: Kampuchea Thmey Daily
0 Comments