លោក ហៅ សុជាតិ គ្រូបង្គោលក្លិបបាល់ទាត់បឹងកេត សមាជិកពានរង្វាន់លីគកំពូលកម្ពុជា (Metfone Cambodian League) បានយល់ឃើញថា កូនក្រុមមានចំណុចខ្វះខាតច្រើនដែលត្រូវកែតម្រូវទៀត ទោះបីជាប្រកួតបើកឆាកកាលពីពេលថ្មី អាចយកឈ្នះលើក្រុមជើងឯក៦សម័យកាលភ្នំពេញក្រោន ៣ទល់២ ក៏ដោយ។
គ្រូបង្វឹកក្រុមជើងឯករងឆ្នាំចាស់រូបនេះ បានបញ្ជាក់ថា ក្រុមទាំងអស់មានទាំងការពង្រឹងធនធានកីឡាករ របៀបហ្វឹកហាត់ និង គ្រូបង្វឹកថ្មីពូកែៗផងដែរ។ លោកថា «និយាយទៅយើងទទួលបាន៣ពិន្ទុ យើងលេងបានល្អមែនប៉ុន្តែ យើងអត់ទាន់ដល់កម្រិតនៃការប្រជែងជើងឯកនោះទេ ដោយសារយើងអត់ទាន់ល្អគ្រប់គ្រាន់នៅឡើយ ដោយសារយើងមើលឃើញកង្វះខ្វះខាតជាច្រើន និយាយទៅទាំងការសហការគ្នាលេង ទាំងពេលយើងការពារ គឺយើងបញ្ហា»។
លោក ហៅ សុជាតិ បានបញ្ជាក់ថា ក្លិបបឹងកេតនាពេលបច្ចុប្បន្នក៏កំពុងព្យាយាមរៀបចំឲ្យបានល្អកាន់តែខ្លាំងដើម្បីប្រកួតទាំងក្នុងលីគកំពូល និង ពានសម្ដេចតេជោ ហ៊ុន សែន រដូវកាលឆ្នាំ២០១៩នេះ។ បែបណាក្ដី លោកក៏បានបង្ហាញក្ដីបារម្ភមួយចំនួន ពាក់ព័ន្ធភាពយល់ចិត្តគ្នាលើទីលាន ដ្បិតមានកីឡាករថ្មីៗទាំងខ្មែរនិងបរទេសមានច្រើន។ សម្រាប់ប្រកួតបន្ទាប់ប្រចាំសប្ដាហ៍ទី២ ក្រុមបឹងកេត ត្រូវប៉ះក្រុមម្ចាស់ផ្ទះអគ្គិសនីកម្ពុជានៅវេលាម៉ោង៣រសៀលលើទីលានកីឡដ្ឋានអគ្គិសនីកម្ពុជា ក្នុងរាជធានីភ្នំពេញ នៅថ្ងៃអាទិត្យ ទី៣១ ខែមីនា ឆ្នាំ២០១៩។
សូមរំលឹកថា ក្រុមបឹងកេត កាលពីរដូវកាលឆ្នាំ២០១៨ កន្លងទៅបានបញ្ចប់ក្នុងចំណាត់ថ្នាក់លេខ២ Metfone Cambodian League មាន៤៩ពិន្ទុ ក្រោយឈ្នះបាន១៥ លើក ហើយស្មើគ្នាបាន៤ លើកនិង ចាញ់៣ប្រកួត។ ចំណែកក្នុងពានរង្វាន់សម្តេចតេជោ ហ៊ុន សែន វិញក្រុមបឹងកេត បានធ្លាក់ចេញត្រឹមវគ្គ៨ក្រុមចុងក្រោយ ក្រោយចាញ់ក្រុមណាហ្គាវើល៕
Source: Kampuchea Thmey Daily
0 Comments