ភ្នំពេញ ៖ លោក កិត្តិបណ្ឌិត ពេជ្រ ប៊ុនធិន រដ្ឋមន្ត្រីក្រសួងមុខងារសាធារណៈបានជំរុញឲ្យក្រសួងស្ថាប័នដែលនៅមិនទាន់បានផ្ញើរបាយការណ៍មន្ត្រីជាប់កិច្ចសន្យាត្រូវរួសរាន់ធ្វើមកកាន់ក្រសួងឲ្យបានទាន់ពេលវេលាដើម្បីឲ្យក្រសួងបើកប្រាក់បៀវត្សរ៍ជូនដល់មន្ត្រីជាប់កិច្ចសន្យាឲ្យបានមុនចូលឆ្នាំប្រពៃណីជាតិ ដែលនឹងឈានចូលមកដល់នៅពាក់កណ្តាលខែមេសាខាងមុខនេះ។
ថ្លែងនៅក្នុងពិធីបិទសន្និបាតបូកសរុបការងារប្រចាំឆ្នាំ២០១៨ និង លើកទិសដៅការងារបន្តសម្រាប់ឆ្នាំ២០១៩ របស់ក្រសួងមុខងារសាធារណៈកាលពីព្រឹកថ្ងៃទី២៧ ខែមីនា ឆ្នាំ២០១៩ នៅភោជនីយដ្ឋានទន្លេបាសាក់២ លោក កិត្តិបណ្ឌិត ពេ ជ្រ ប៊ុនធិន បានមានប្រសាសន៍ថា រហូតមកដល់ពេលនេះមានក្រសួងស្ថាប័នចំនួន២៨ប៉ុណ្ណោះ បានធ្វើរបាយការណ៍មកកាន់ក្រសួងខណៈនៅសល់៤ក្រសួងស្ថាប័នទៀតនៅមិនទាន់ធ្វើនៅឡើយដែលធ្វើឲ្យការបើកប្រាក់បៀវត្សរ៍ដល់មន្ត្រីជាប់កិច្ចសន្យាមានការយឺតយ៉ាវ។
លោករដ្ឋមន្ត្រីបានបន្តថា ចំណែកខាងក្រសួងមុខងារសាធារណៈបានបើកប្រព័ន្ធបញ្ចូលលុយចំហទុកសម្រាប់បើកប្រាក់ជូនដល់មន្ត្រីជាប់កិច្ចសន្យារួចរាល់ហើយរង់ចាំតែក្រសួងស្ថាប័នដែលនៅសល់ធ្វើមកឲ្យបានគ្រប់តែប៉ុណ្ណោះ។
ទន្ទឹមនឹងនេះ លោក រដ្ឋមន្ត្រីបានស្នើឲ្យមន្ត្រីរាជការមុខងារសាធារណៈដែលកាន់ការងារពាក់ព័ន្ធប្រាក់បៀវត្សផ្ទាល់នេះត្រូវខិតខំធ្វើការទាំងយប់ទាំងមិនត្រូវគិតថ្ងៃសៅរ៍ ឬ ថ្ងៃអាទិត្យឡើយសំដៅធ្វើយ៉ាងណារៀបចំបញ្ចូលឈ្មោះមន្ត្រីជាប់កិច្ចសន្យាដែលក្រសួងស្ថាប័នសេសសល់បញ្ជូនមកឲ្យបានលឿននិងទាន់ពេលវេលា។
លោករដ្ឋមន្ត្រីបានបន្ថែមទៀតថា ក្នុងករណីក្រសួងស្ថាប័នណាដែលមិនទាន់បានធ្វើរបាយការណ៍ផ្ញើមកក្រសួងត្រូវតេសួរនាំដើម្បីឲ្យក្រសួងស្ថាប័ននោះប្រញាប់ផ្ញើមកកាន់ក្រសួងជាបន្ទាន់ ព្រោះថានៅសល់១២ថ្ងៃទៀតទេ ដែលមន្ត្រីរាជការជាប់កិច្ចសន្យាត្រូវបើកលុយដើម្បីយកទៅធ្វើបុណ្យនិងចូលរួមពិធីបុណ្យចូលឆ្នាំខ្មែរនាពេលខាងមុខ។
លោក កិត្តិបណ្ឌិត ពេជ្រ ប៊ុនធិន បានបញ្ជាក់ថា ប្រសិនបើយើងមិនបានបើកប្រាក់បៀវត្សរ៍ដល់មន្ត្រីរាជការជាប់កិច្ចសន្យាឲ្យបានមុនចូលឆ្នាំខ្មែរខាងមុខនេះទេ ក្រសួងស្ថាប័នដែលមិនទាន់បានផ្ញើរបាយកាណ៍ទាំងនោះនឹងទទួលរងនូវការរិះគន់និងមិនពេញចិត្តពួកគាត់យ៉ាងខ្លាំងពិសេសតាមប្រព័ន្ធបណ្តាញហ្វេប៊ុក។
លោក យក់ ប៊ុនណា រដ្ឋលេខាធិការក្រសួងមុខងារសាធារណៈបានឲ្យដឹងថា បច្ចុប្បន្ននេះមានមន្ត្រីរាជការជាប់កិច្ចសន្យា ឬ មន្ត្រីបណ្តែតដែលកំពុងបម្រើការងារនៅតាមក្រសួងស្ថាប័នទាំងអស់ប្រមាណ២ម៉ឺននាក់ ដែលពួកគេនៅមិនទាន់បានបើកប្រាក់បៀវត្សរ៍នៅឡើយទេចាប់តាំងពីថ្ងៃទី១ ខែមករា ឆ្នាំ២០១៩ រហូតមកដល់ពេលនេះ៕
Source: Kampuchea Thmey Daily
0 Comments