បាត់ដំបង ៖ មុខសញ្ញាសង្ស័យម្នាក់ ក្នុងចំណោមបក្ខពួកចំនួន២នាក់ ត្រូវអស់លក្ខណ៍ ដោយសារកម្លាំងអធិការដ្ឋាននគរបាលក្រុងបាត់ដំបង តាមប្រមាញ់រហូតចាប់ខ្លួនបាន បន្ទាប់ពីជនសង្ស័យរូបនេះ បានធ្វើសកម្មភាពឆក់កាបូបរបស់ជនបរទេស នៅចំកណ្តាលក្រុងបាត់ដំបងរួចមក។
គួរបញ្ជាក់ដែរថា កន្លងមក សកម្មភាពចោរឆក់កាបូបជនបរទេស គឺមានការកើនឡើង ហើយក៏មិនសូវមានការបង្ក្រាបដែរ កាលពីអតីតអធិការមុនៗ។
ថ្មីៗនេះ បន្ទាប់ពីមានការផ្លាស់ប្ដូរអធិការរួចមក គឺការបំបែកសំណុំរឿងចោរកម្ម ក៏ដូចជាមុខសញ្ញាជួញដូរគ្រឿងញៀនផងដែរ គឺចាប់ខ្លួនបានជាបន្តបន្ទាប់។
ជាក់ស្ដែង នៅថ្ងៃទី១៥ ខែមីនា ឆ្នាំ២០១៩ វេលាម៉ោង៣និង៣០នាទីរសៀល មានករណីអំពើលួចមានស្ថានទម្ងន់ទោស(ឆក់)មួយ បានកើតឡើងបង្កដោយជនសង្ស័យមិនស្គាល់អត្តសញ្ញាណ បានឆក់កាបូបជនបរទេស ឈ្មោះ JULIA GREBENSTIN ភេទស្រី អាយុ30ឆ្នាំ ជាជនជាតិអាល្លឺម៉ង់។
លោកវរសេនីយ៍ឯក ឆាង វណ្ណឆៃ បានបញ្ជាក់ថា ក្រោយពីទទួលបណ្ដឹងរួចមក សមត្ថកិច្ច នៃអធិការនគរបាលក្រុងបាត់ដំបង បានសហការជាមួយកម្លាំងការិយាល័យព្រហ្មទណ្ឌកម្រិតស្រាល បានធ្វើការស៊ើបអង្កេត ស្រាវជ្រាវលុះ ដល់ថ្ងៃទី២៥ ខែមីនា ឆ្នាំ២០១៩ វេលាម៉ោង១១និង២០នាទី ថ្ងៃត្រង់ កម្លាំងបានធ្វើការឃាត់ខ្លួនជនសង្ស័យម្នាក់ ឈ្មោះ សេង វិចិត្រ ភេទប្រុស អាយុ២២ឆ្នាំ មានទីលំនៅភូមិចំការសំរោង២ សង្កាត់ចំការសំរោង ក្រុងបាត់ដំបង មកកាន់អធិការនគរបាលក្រុងបាត់ដំបង ដើម្បីធ្វើការសាកសួរ។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួន និងបក្សពួកម្នាក់ទៀត ឈ្មោះ ហ៊ន សុគន្ធិន ភេទប្រុស អាយុ៣៣ឆ្នាំ មានទីលំនៅភូមិអង់ សង្កាត់អូចារ ក្រងបាត់ដំបង(រត់គេចខ្លួន) ពិតជាបានធ្វើសកម្មភាពឆក់កាបូបរបស់ជនបរទេសពិតប្រាកដមែន។
លោកអធិការបានបន្តថា នៅក្នុងកិច្ចប្រតិបត្តិការនេះ សមត្ថកិច្ចបានដកហូតវត្ថុតាងរួមមាន ម៉ូតូម៉ាកហុងដាធុនសេ125 ពណ៌ខ្មៅ ស៊េរីឆ្នាំ015 ចំនួន១គ្រឿង ពាក់ស្លាក បាត់ដំបង លេខ1V-4842 រួមនឹងកាបូបស្ពាយរបស់ជនបរទេស ដែលក្នុងនោះមានកាមេរ៉ា វីសា និងសម្ភារៈមួយចំនួន ត្រូវប្រមូលបានមកវិញទាំងអស់។
បច្ចុប្បន្ន សមត្ថកិច្ចក្រុង កំពុងកសាងសំណុំរឿង ដើម្បីបញ្ជូនទៅកាន់ការិយាល័យជំនាញ នៃស្នងការដ្ឋាន នគរបាលខេត្ត ក្នុងការចាត់វិធានការតាមផ្លូវច្បាប់ ដែលមួយរយៈនេះការខិតខំបំបែកសំណុំរឿងរបស់លោកអធិការក្រុង ពិតជាមានការកោតសរសើរពីសំណាក់ប្រជាពលរដ្ឋមែន ពាក់ព័ន្ធនឹងគោលនយោបាយភូមិ/ឃុំមានសុវត្ថិភាព៕
Source: Kampuchea Thmey Daily
0 Comments