សេចក្តីរាយការណ៍ ​៖​ គណបក្ស​ស្តាំនិយម​អូស្ត្រាលី​ស្វែងរក​ការបរិច្ចាគ​ពី NRA

យោងតាម​ការស៊ើបអង្កេត​របស់ Al Jazeera បាន​ឲ្យ​ដឹងថា គណបក្ស​ស្តាំនិយម One Nation របស់​ប្រទេស​អូស្ត្រាលី ​ត្រូវបាន​គេ​ចោទប្រកាន់​ពីបទ​ស្វែងរក​ការ​បរិច្ចាគ​ពី​ក្រុម​បញ្ចុះបញ្ចូល​អាវុធ​របស់​អាមេរិក National Rifle Association (NRA) មុន​ការបោះឆ្នោត​ទូទៅ​មួយ។

ខ្សែអាត់​សំឡេង​សម្ងាត់​ដែល​ផ្សាយ​ដោយ​ប្រព័ន្ធ​ផ្សព្វផ្សាយ​មាន​មូលដ្ឋាន​នៅ​ប្រទេស​កាតា​មួយ​នេះ​បាន​បង្ហាញថា សមាជិក​នៃ​គណបក្ស​របស់លោក​ស្រី Pauline Hanson មួយ​នេះ​បាន​ស្វែងរក​ប្រាក់​ពី​១០​ទៅ​២០​លាន​ដុល្លារ​ក្នុងការ​បរិច្ចាគ​ពី NRA ដែល​នេះ​ជា​ទង្វើ​ជាក់ស្តែង​មួយ​នៃ​ការព្យាយាម​បន្ធូរបន្ថយ​ច្បាប់​កាំភ្លើង​ដ៏​តឹងរ៉ឹង​របស់​ប្រទេស​អូស្ត្រាលី​។​

អ្នកស៊ើប​អង្កេត​ម្នាក់រ​បស់ Al Jazeera បាន​លើកឡើងថា មាន​អ្នក​បញ្ចុះបញ្ចូល​កាំភ្លើង​ម្នាក់​បាន​ជួយ​សម្រួល​ដល់​កិច្ចប្រជុំ​រវាង​ប្រធាន​បុគ្គលិក​របស់លោក​ស្រី Hanson ឈ្មោះ James Ashby ដែលជា​មេដឹកនាំ​គណបក្ស​នៅក្នុង​រដ្ឋ Queensland និង NRA នៅក្នុង​ទីក្រុង Washington ដែល​កិច្ចប្រជុំ​នេះ​ក្រោយមក​ត្រូវបាន​គេ​ថត​សំឡេង​ទុក​។​

លោក Ashby ត្រូវបាន​គេ​ថត​សំឡេង​ដោយ​និយាយថា គាត់​ចង់បាន​ការគាំទ្រ​ផ្នែក​នយោបាយ​ពី​កម្មវិធី​របស់ NRA ដើម្បី​ជួយ​កំណត់​គោលដៅ​អ្នកបោះឆ្នោត​និង​ជួយ​ក្នុងការ​បរិច្ចាគ​។​

លោក Ashby បាន​និយាយ​ក្នុង​កិច្ចប្រជុំ​មួយ​មុនពេល​ជួប​ជាមួយ​ក្រុម NRA ថា “​ប្រសិនបើ NRA ចង់​ទទួលបាន​ការគាំទ្រ​នៅក្នុង​ប្រទេស​អូស្ត្រាលី វា​គឺជា​ការចាប់ផ្តើម​មួយ​។ ខ្ញុំ​ចង់​ទទួលយក​កម្មវិធី​រប​ស់​ពួកគេ​។ ប្រសិនបើ​ពួកគេ​អាចជួយ​យើង​ក្នុងការ​បរិច្ចាគ​នេះ វា​ជា​រឿង​ល្អ​បំផុត​”​។​

លោក Ashby ត្រូវបាន​គេ​ឮ​និយាយថា ការបរិច្ចាគ​ប្រាក់​១០​លាន​ដុល្លារ​នឹង​អនុញ្ញាត​ឲ្យ​គណបក្ស One Nation ឈ្នះ​អាសនៈ​ចំនួន​ប្រាំបី​នៅក្នុង​ព្រឹទ្ធសភា​ដោយ​ផ្តល់​អំណាច​ដល់​បក្ស​ឲ្យ​មាន​ឥទ្ធិពល​លើ​ច្បាប់​។​

គណបក្ស One Nation មាន​អាសនៈ​ចំនួន​ពីរ​នៅក្នុង​ព្រឹទ្ធសភា​ដែល​ជិត​ផុត​អាណត្តិ​ដែល​មួយ​ក្នុងចំណោម​នោះ​គឺ​ត្រូវបាន​កាន់កាប់​ដោយ​ស្ថាបនិក​គណបក្ស​គឺ​លោកស្រី Pauline Hanson​។​

ក្រោយមក​មន្ត្រី​របស់ NRA ឈ្មោះ Lars Dalseide បានផ្តល់​ដំបូន្មាន​ដល់​ក្រុម​នេះ​អំពី​របៀប​ឆ្លើយតប​នឹង​ការបាញ់ប្រហារ​សម្លាប់រ​ង្គា​លតា​ម​មធ្យោបាយ​មួយ​ដែល​អាច​បញ្ចៀស​ការ​រឹតបន្តឹង​កាំភ្លើង​បាន​។​

របាយការណ៍​របស់ Al Jazeera បាន​ជំរុញ​ឲ្យ​មានការ​អំពាវនាវ​សម្រាប់​ការស៊ើបអង្កេត​មួយ​ចូលទៅក្នុង​ថា​តើ​ក្រុមមន្ត្រី​គណបក្ស One Nation បាន​រំលោភ​លើ​ច្បាប់​ប្រឆាំងនឹង​ការជ្រៀតជ្រែក​ពី​បរទេស​នៅក្នុង​ការបោះឆ្នោត​អូស្ត្រាលី​ដែរឬទេ​៕ AFP
​
​

Source: Kampuchea Thmey Daily