បាត់ដំបង ៖ ជនសង្ស័យម្នាក់ ដែលជាមុខសញ្ញាចែកចាយថ្នាំញៀនយ៉ាងសកម្ម ក្នុងសង្កាត់ចំការសំរោង ដែលកន្លងមកសមត្ថកិច្ចតែតែប្រមាញ់ជាប់ជាប្រចាំ ត្រូវបានចូលអន្ទាក់ របស់សមត្ថកិច្ច ខណៈដែលមុខសញ្ញារូបនេះ កំពុងធ្វើសកម្មភាព ជាក់ស្តែងនៅក្នុងមូលដ្ឋាន។
ជុំវិញកិច្ចប្រតិបត្តិការបង្ក្រាបករណីចែកចាយថ្នាំញៀននេះ លោកវរសេនីយ៍ឯក ឆាង វណ្ណឆៃ អធិការនគរបាលក្រុងបាត់ដំបង បានលើកឡើងថា បន្ទាប់ពីទទួលបាននូវសេចក្ដីរាយការណ៍រួចមក នៅថ្ងៃទី១៩ ខែមីនា ឆ្នាំ២០១៩ វេលាម៉ោង៣និង៤៥នាទីរសៀល បានចាត់កម្លាំងជំនាញប្រឆាំងគ្រឿងញៀន សហការជាមួយកម្លាំង នគរបាលប៉ុស្តិ៍ ចំការសំរោង ចុះប្រតិបត្តិការបង្ក្រាបករណី រក្សាទុកដោយខុសច្បាប់នូវសារធាតុញៀន១ករណី (បទល្មើសជាក់ស្ដែង) នៅចំណុចភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង។
លោកអធិការបានបន្តថា ជនសង្ស័យដែលត្រូវសមត្ថកិច្ចឃាត់ខ្លួនមាន ឈ្មោះ គុយ សុងហាក់ ភេទប្រុស អាយុ៣៨ឆ្នាំ មានទីលំនៅក្នុងភូមិ/ឃុំកើតហេតុខាងលើ ដោយកម្លាំងបានដកហូតវត្ថុតាងរួមមាន ថ្នាំញៀនប្រភេទម៉ាទឹកកកចំនួន០១ថង់ ទម្ងន់២,៥០ក្រាម ទូរស័ព្ទដៃចំនួន០១គ្រឿង និង សម្ភារៈសម្រាប់វេចខ្ចប់មួយចំនួនថែមទៀត។ បច្ចុប្បន្នជនសង្ស័យរូបនេះ រួមជាមួយនឹងវត្ថុតាងត្រូវបានកម្លាំងជំនាញចាត់បញ្ជូនទៅកាន់ស្នងការដ្ឋាន នគរបាលខេត្តហើយ៕
Source: Kampuchea Thmey Daily
0 Comments