ភ្នំពេញ ៖ បុរសម្នាក់ ទើបចេញពីស្រវឹងធ្លាក់ភ្នែក បើកបររថយន្ត LEXUS RX400H មួយគ្រឿងយ៉ាងលឿន ទៅបុករបាំងថ្ម ពុះចែកផ្លូវ បណ្ដាលឲ្យរថយន្តរងការខូចខាតខាងមុខផ្នែកខាងឆ្វេង បើកទៅមុខលែងរួច ហើយក៏ត្រូវបានប្រពលរដ្ឋធ្វើដំណើរឆ្លងកាត់ឃើញពីហេតុការណ៍រាយការណ៍ ប្រាប់ឲ្យសមត្ថកិច្ចចុះមកពិនិត្យមើលជាក់ស្ដែង កាលពីវេលា៣និង០៥នាទីទៀបភ្លឺ ថ្ងៃសុក្រ ទី៨ ខែមីនា ឆ្នាំ២០១៩នេះ នៅតាមបណ្ដោយមហាវិថីសហព័ន្ធរុស្ស៊ី នៅត្រង់ចំណុចស្តុបសួនច្បារក្ដាន់២ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។
ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញមាន រថយន្ត ម៉ាក LEXUS RX400h មួយគ្រឿង ពណ៌ស្ករ ពាក់ស្លាកលេខ ភ្នំពេញ 2AG-3186 បើកបរដោយបុរសម្នាក់ ក្នុងស្ថានភាពស្រវឹងជោកជាំ ធ្វើដំណើរតាមបណ្ដោយផ្លូវសហព័ន្ធរុស្ស៊ីយ៉ាងលឿន ទិសដៅពីកើតទៅលិច លុះមកដល់ចំណុចកើតហេតុ ក៏ស្រាប់តែជ្រុលទៅបុករបាំងថ្ម ពុះចែកផ្លូវ លាន់ដូចរន្ទះ បណ្ដាលឲ្យរថយន្តរងការខូចខាតផ្នែកឆ្វេង និងផ្ទុះកង់មុខខាងឆ្វេង បើកទៅមុខលែងរួច ចំណែកអ្នកបើកបររថយន្ត មិនមានរបួសនោះទេ ហើយត្រូវបានប្រជាពលរដ្ឋធ្វើដំណើរឆ្លងកាត់ រាយការណ៍ ប្រាប់ឲ្យសមត្ថកិច្ចមូលដ្ឋានចុះមកពិនិត្យមើលជាក់ស្ដែងតែម្តង។
ប្រភពព័ត៌មានបានបន្តទៀតថា ក្រោយពេលកើតហេតុ សមត្ថកិច្ចមូលដ្ឋានប៉ុស្តិ៍នគរបាលស្រះចក បានចុះមកដល់កន្លែងកើតហេតុ រួចរាយការណ៍ប្រាប់សមត្ថកិច្ចផ្នែកវាស់វែង នៃអធិការដ្ឋាននគរបាលខណ្ឌដូនពេញ ចុះមកពិនិត្យមើលជាក់ស្ដែង និងរាយការណ៍បន្តប្រាប់សមត្ថកិច្ចជំនាញ ចុះធ្វើការវាស់វែង និងស្ទូចយករថយន្តបង្ក ទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលរាជធានីភ្នំពេញ រង់ចាំដោះស្រាយ សងការខូចខាត តាមផ្លូវច្បាប់។
គួរបញ្ជាក់ថា របាំងថ្មពុះចែកទ្រូងផ្លូវនោះ បានក្លាយទៅជាកន្លែងគ្រោះថ្នាក់ញឹកញាប់ សម្រាប់អ្នកស្រវឹង ដែលបើកបរមិនប្រយ័ត្នពេលដែលមកដល់កន្លែងនោះ តែងតែបុកគ្រោះថ្នាក់មិនត្រឹមតែខូចខាតយានយន្តប៉ុណ្ណោះទេ គឺមានទាំងអ្នកគ្រោះថ្នាក់រហូតបាត់បង់ជីវិតទៀតផង គឺនៅកន្លែងរបាំងពុះចែកទ្រូងផ្លូវនោះតែម្តង។ តែខាងមន្ទីរជំនាញវិញ បានត្រឹមតែទារសំណងសម្រាប់អ្នកបង្កបញ្ហាប៉ុណ្ណោះ ចំណែកការដាក់របាំងថ្មបែបនេះ តែងតែបង្កគ្រោះស្ទើរតែរាល់យប់វិញ គ្មានអ្នកយកភ្នែកមើលឡើយ ថាហេតុអ្វីបានអ្នកដំណើរតែងតែគ្រោះថ្នាក់ញឹកញាប់បែបនេះគឺមកពីគេដាក់របាំងថ្មពុះចែកទ្រូងផ្លូវនោះ ត្រូវគេច្រៀកទ្រូងផ្លូវតូច និងម្ខាងធំ ទើបបណ្តាលឲ្យអ្នកដំណើរដែលគាត់កំពុងបើកបរពីទិសដៅពីកើតមកលិច ក្នុងល្បឿនលឿនមិននឹកស្មានថា មានឧបសគ្គដូច្នេះ ក៏តែងតែបុកទ្រូងផ្លូវកន្លែងដដែលនោះស្ទើរតែរាល់យប់ដូច្នេះតែម្តង៕
Source: Kampuchea Thmey Daily
0 Comments