នៅថ្ងៃទី១៦ ខែមីនា ឆ្នាំ២០១៩ ខាងមុខនេះ MYTV និងក្រុមហ៊ុនGanzberg សហការជាមួយសហព័ន្ធកីឡាបាល់ទាត់កម្ពុជា នឹងបើកការប្រកួតបាល់ទាត់ហ្វុតសាល (Futsal) ដែលមានឈ្មោះថា” អធិរាជវាលស្មៅGanzbergCup2019” រដូវកាលទី៤។
ព្រឹត្តិការណ៍ប្រកួតកីឡាបាល់ទាត់លើទីលានខ្នាតតូចនេះ បង្កើតឡើងដោយការសហការគ្នាពីក្រុមហ៊ុនស្រាបៀរGanzberg ជាមួយក្រុមហ៊ុនCBS ដែលគ្រប់គ្រងស្ថានីយ៍ទូរទស្សន៍ចំនួន៣ គឺMY-TV CNC និង CTN ហើយព្រឹត្តិការណ៍នេះនឹងផ្សាយផ្ទាល់ពី MY-TV ។
ថ្លែងក្នុងសន្និសីទកាសែត នាព្រឹកថ្ងៃទី០៨មីនា លោកស៊ីថូ ណាថាន់ ដែលជាប្រធានផ្នែកក្រុមហ៊ុនបណ្ដាញផ្សព្វផ្សាយកម្ពុជាCBS បានបញ្ជាក់ឲ្យដឹងថា ការប្រកួតឆ្នាំនេះ កាន់តែអស្ចារ្យជាងកាលពីឆ្នាំកន្លងមក។
ដោយមានការប្រកួតជម្រុះចំនួន៥ភូមិភាគនោះ ក្នុងមួយភូមិភាគយក២ក្រុម ដែលនៅកំពូលតារាងមកចូលរួម គឺមាន១០ក្រុមមកពី៥ភូមិភាគ។ សម្រាប់នៅរាជធានីភ្នំពេញ ដែលមានក្រុមច្រើនចូលរួមប្រកួតជម្រុះនោះ គឺជ្រើសរើសយក១៨ក្រុមចូលរួម និង៤ក្រុមដែលលេងដល់វគ្គពាក់កណ្ដាលផ្ដាច់ព្រ័ត្រកាលពីឆ្នាំចាស់នោះបានឡើងលេងក្នុងវគ្គ៣២ក្រុម ដោយស្វ័យប្រវត្តិ។
៣២ក្រុម ដែលឡើងមកលេងនៅរាជធានីភ្នំពេញនេះ គឺលេងតាមរូបមន្តជួបគ្នា២ដង។ បន្ទាប់ពីជួបគ្នា២ដង ក្រុមដែលចាញ់ គឺហាលអាវ។ ក្នុងករណីដែលជួបគ្នា២ដង នៅតែស្មើគ្នានោះ គឺត្រូវកាត់សេចក្ដីដោយការទាត់បាល់ប៉េណាល់ទី ដើម្បីសម្រេចលទ្ធផលតែម្ដង។
ការប្រកួតនឹងធ្វើនៅទីលានT-Soccerរៀងរាល់យប់ថ្ងៃសៅរ៍។ ការប្រកួតនេះ មិនមានវគ្គពាក់កណ្ដាលផ្ដាច់ព្រ័ត្រឡើយ គឺមានតែការប្រកួតផ្ដាច់ព្រ័ត្រប៉ុណ្ណោះ។ ក្រុមដែលលើកពាន នឹងទទួលបានរង្វាន់អមចំនួន១៥.០០០ដុល្លារឯណោះ។
លោកBrune ដែលជាតំណាងក្រុមហ៊ុនស្រាបៀរហ្គេនស្ប៊ើក ដែលជាអ្នកឧបត្ថម្ភព្រឹត្តិការណ៍នេះទាំងស្រុងនោះ បានចាត់ទុកព្រឹត្តិការណ៍នេះថា ជាពេលវេលាដ៏វិសេសវិសាលបំផុតក្នុងអាណាចក្របាល់ទាត់ហ្គេនស្ប៊ើក។ លោកកោតសរសើរនិងស្ញប់ស្ញែងនូវឆន្ទៈដ៏អង់អាចរបស់ក្រុមទាំង៣២ដែលចូលរួម។
សូមបញ្ជាក់ថា សម្រាប់ព្រឹត្តិការណ៍កាលពីរដូវកាលទី១ ក្រុមដានីញែល(Daniel)ជាក្រុមលើកពានដំបូងគេ បន្ទាប់មករដូវកាលទី២ក្រុមស្រ៊ីជី(3G)តែឆ្នាំនេះក្រុមដានីញែលបាត់បង់ឱកាសដោយសារតែធ្លាក់ក្នុងការប្រកួតជម្រុះ និងរដូវកាលទី៣ ក្រុមកណ្ដុរ ស។ សម្រាប់រដូវកាលទី៤នេះ មិនទាន់ដឹងនៅឡើយទេ៕
Source: Kampuchea Thmey Daily
0 Comments