លោក Paul Manafort ដែលជាអតីតប្រធានយុទ្ធនាការរបស់លោកប្រធានាធិបតីអាមេរិក Donald Trump ត្រូវបានកាត់ទោសឲ្យជាប់ពន្ធនាគាររយៈពេល៤៧ខែកាលពីថ្ងៃព្រហស្បតិ៍ពីបទឧក្រិដ្ឋកម្មពន្ធនិងការក្លែងបន្លំធនាគារនៅក្នុងករណីខ្ពស់បំផុតដែលកើតចេញពីការស៊ើបអង្កេតលើបញ្ហារុស្ស៊ីរបស់រដ្ឋអាជ្ញាពិសេសលោក Robert Mueller។
វាជាការកាត់ទោសជាប់ពន្ធនាគារដ៏តឹងរ៉ឹងបំផុតចំពោះសហការីម្នាក់របស់ប្រធានាធិបតីក្នុងការស៊ើបអង្កេតរបស់លោក Mueller ចូលក្នុងការជ្រៀតជ្រែករបស់រុស្ស៊ីនៅក្នុងការបោះឆ្នោតឆ្នាំ២០១៦ប៉ុន្តែវាស្រាលជាងការរំពឹងទុក។
ចៅក្រម T.S. Ellis បាននិយាយថា លោក Manafort អាយុ៦៩បានប្រព្រឹត្តបទល្មើសធ្ងន់ធ្ងរខ្លាំងណាស់ប៉ុន្ដែលោកបានច្រានចោលការជំទាស់របស់រដ្ឋអាជ្ញាពីការិយាល័យរបស់រដ្ឋអាជ្ញាពិសេសសម្រាប់ការកាត់ទោសយូរជាងនេះ។
លោក Manafort ត្រូវបានផ្តន្ទាទោសកាលពីខែសីហាចំនួនប្រាំករណីលើការដាក់ឯកសារបញ្ជាក់ពន្ធលើប្រាក់ចំណូលក្លែងក្លាយ ការក្លែងបន្លំធនាគារចំនួនពីរករណីនិងការខកខានមិនបានរាយការណ៍ពីគណនីធនាគារបរទេសចំនួនមួយករណី។
រដ្ឋអាជ្ញាបានចោទប្រកាន់ថាលោក Manafort បានប្រើប្រាស់គណនីធនាគារនៅឈូងសមុទ្រក្នុងប្រទេសសាយព្រើសនិងប្រទេសដទៃទៀតដើម្បីលាក់ប្រាក់ជាង៥៥លានដុល្លារដែលគាត់រកបានពីសេវាកម្មពិគ្រោះយោបល់នយោបាយដែលគាត់ផ្តល់ទៅឲ្យអ្នកនយោបាយអ៊ុយក្រែន។
ប្រាក់នេះត្រូវបានប្រើដើម្បីទ្រទ្រង់ជីវភាពដ៏ហ៊ឺហារដូចជាការទិញផ្ទះប្រណីតនិងរថយន្តប្រណីតនិងកម្រាលព្រំបុរាណរួមទាំងអាវធំធ្វើពីស្បែកពស់ថ្លាន់មួយតម្លៃ១៨,៥០០ដុល្លារផងដែរ។
លោក Manafort នៅតែប្រឈមមុខនឹងការកាត់ទោសនៅក្នុងករណីទីពីរក្នុងទីក្រុងវ៉ាស៊ីនតោននៅសប្តាហ៍ក្រោយដែលការពិន័យជាអតិបរមាគឺជាប់ពន្ធនាគាររយៈពេល១០ឆ្នាំ។
គួរបញ្ជាក់ថា លោក Manafort គឺជាមនុស្សម្នាក់ក្នុងចំណោមទីប្រឹក្សាកំពូលនិងសហការីចំនួនប្រាំមួយនាក់នៃយុទ្ធនាការបោះឆ្នោតប្រធានាធិបតីរបស់លោក Trump ឆ្នាំ២០១៦ដែលត្រូវបានចោទប្រកាន់នៅក្នុងការស៊ើបអង្កេតរបស់លោក Mueller៕ AFP
Source: Kampuchea Thmey Daily
0 Comments