បិទការប្រកួតកីឡាចម្រុះ សិស្សបឋមសិក្សា និងមធ្យមសិក្សា ជ្រើសរើសជើងឯកថ្នាក់ខេត្តប្រចាំឆ្នាំ២០១៨ និង២០១៩

បន្ទាយមានជ័យ ៖ អស់រយៈពេល១៤ថ្ងៃពេញ ការប្រកួតកីឡាចម្រុះ មាន បាល់ទះ បាល់ទាត់ បាល់បោះ និងអត្តពលកម្ម សិស្សបឋមសិក្សា និងមធ្យមសិក្សា បានរកឃើញក្រុមកីឡាជាប់ចំណាត់ថ្នាក់ លេខ ១ ,២ ,៣ហើយ។

ការប្រកួតនេះ ប្រព្រឹត្តិទៅ នៅសួនសិប្បនិមិត្តអេកូស្ព័ត ស្ថិតនៅក្នុងភូមិ១ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ រួចធ្វើកម្មវិធីបិទ ដោយមានការចូលរួម លោក សួនបវរ អភិបាលខេត្តបន្ទាយមានជ័យ លោក ឈើយ ចាន់ណា សមាជិកព្រឹទ្ធសភាមណ្ឌលខេត្តបន្ទាយមានជ័យ លោក ហ៊ឹល រ៉ាយ៉ា អភិបាលក្រុងសិរីសោភ័ណ លោក ឈូ ប៊ុនរឿង ប្រធានមន្ទីរអប់រំខេត្ត និងមន្ត្រីអ្នកមុខអ្នកការជាច្រើននាក់ទៀត នៅល្ងាច ថ្ងៃទី៧ ខែកុម្ភៈ ឆ្នាំ២០១៩។

ក្នុងពិធីបិតការប្រកួតកីឡាចម្រុះសិស្សបឋមសិក្សា និងមធ្យមសិក្សាជ្រើសរើសជើងឯកថ្នាក់ខេត្តប្រចាំឆ្នាំ២០១៨ និង២០១៩នេះ លោក ឈូ ប៊ុនរឿង បានមានប្រសាសន៍ថា ឆ្លងតាមការប្រកួតយ៉ាងសកម្ម និងស្វិតស្វាញ អស់រយៈពេល១៤ថ្ងៃនេះ ឃើញថា កាយវិការរបស់ក្រុមកីឡាបានអនុវត្តការប្រកួតនេះ ពិតជាឈរលើស្មារតី គោរពវិន័យ បទបញ្ជាបច្ចេកទេស និងចេះស្រឡាញ់គ្នា យោគយល់គ្នា អធ្យាស្រ័យគ្នា និងគ្នាទៀតផង នេះបានបង្ហាញឲ្យឃើញថា កីឡាករទាំងអស់ បានផ្សារភ្ជាប់យ៉ាងជិតស្និទ្ធនូវចំណងសាមគ្គីភាព ភារតភាព និងការយោគយល់គ្នា ដែលជាគំរូមួយដ៏ល្អសម្រាប់អនាគតប្រទេសជាតិ។

ក្នុងនោះ លោក សួន បវរ បានមានប្រសាសន៍ថា ពិតណាស់វិស័យកីឡានៅខេត្តបន្ទាយមានជ័យមិនសូវមានការរីកចម្រើនក៏ពិតមែន តែរយៈពេលប៉ុន្មានឆ្នាំចុងក្រោយនេះ ប្រមុខរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្តេចបានយកចិត្តទុកដាក់លើកស្ទួយវិស័យកីឡា សម្តេចតែងតែផ្តល់ការលើកទឹកចិត្តដល់លើកីឡាករ ដើម្បីឲ្យវិស័យមួយនេះមានភាពរីកចម្រើនទៅមុខជាលំដាប់។

ដោយឡែក សម្រាប់ខេត្តបន្ទាយមានជ័យ បាននិងកំពុងខិតខំប្រឹងប្រែង និងយកចិត្តទុកដាក់ពីបណ្តាស្ថាប័នពាក់ព័ន្ធ សង្គមស៊ីវិល និងវិស័យឯកជនមួយចំនួន ក្នុងការកសាងគ្រូបង្វឹក ក្រុមកីឡាករ ថែមទាំងបានចូលរួមក្នុងការប្រកួតជម្រើសជាតិផងដែរ។

លោក សួន បវរ បានបន្តទៀតថា សម្រាប់ការប្រកួតនេះ ការចាញ់ ឈ្នះវាមិនសំខាន់នោះទេ តែអ្វីដែលសំខាន់ គឺ ស្មារតី នៃការរាប់អាន និងមានសាមគ្គីភាព រវាងកីឡាករ និងកីឡាករតែប៉ុណ្ណោះ។

បញ្ចប់នៅកម្មវិធី លោក សួន បវរ បានធ្វើការផ្តល់រង្វាន់ដល់ក្រុមកីឡាករជាប់លេខ១ បានរង្វាន់១,៨០០,០០០រៀល លេខ២បានរង្វាន់១,៤៤០,០០០រៀល និងលេខ៣បានរង្វាន់១,០៨០,០០០រៀល និងពាន១ ទង់ជ័យលាភី១ និងបាល់ផងដែរ៕