មន្ទីរបញ្ចកោណបាននិយាយកាលពីថ្ងៃព្រហស្បតិ៍ថា រដ្ឋបាលរបស់លោកប្រធានាធិបតីអាមេរិក Donald Trump បានស្នើសុំឲ្យក្រសួងការពារជាតិត្រៀមរៀបចំដើម្បីទទួលជនអន្តោប្រវេសន៍ជាកុមារមិនមានអាណាព្យាបាលចំនួន៥ពាន់នាក់ ស្របពេលមានអ្វីដែលខ្លួនហៅថាវិបត្តិកាន់តែខ្លាំងឡើងនៅព្រំដែនអាមេរិក-ម៉ិកស៊ិក។
អ្នកនាំពាក្យមន្ទីរបញ្ចកោណលោកវរសេនីយ៍ឯក Jamie Davis បាននិយាយថា ក្រសួងសុខាភិបាលនិងសេវាមនុស្ស (HHS) បានស្នើសុំឲ្យក្រសួងការពារជាតិជួយរកកន្លែងទំនេរដើម្បីដាក់កុមារមិនមានអាណាព្យាបាលរហូតដល់ទៅ៥,០០០នាក់នៅតាមទីតាំងរបស់ក្រសួងការពារជាតិប្រសិនបើចាំបាច់រហូតដល់ថ្ងៃទី៣០ខែកញ្ញាឆ្នាំ២០១៩។
យ៉ាងណាក្តី សំណើសម្រាប់ទីតាំងជ្រកកោននេះគឺគ្រាន់តែជាការការពារប៉ុណ្ណោះ។
ប៉ុន្តែវាបានកើតឡើងចំពេលមានការកើនឡើងនៃចំនួនគ្រួសារនិងកុមារមិនមានអាណាព្យាបាលឆ្លងកាត់ព្រំដែនសហរដ្ឋអាមេរិកមកពីប្រទេសម៉ិកស៊ិកដោយខុសច្បាប់ដែលភាគច្រើននៃពួកគេគឺបានរត់ចេញពីភាពក្រីក្រនិងអំពើហិង្សាក្នុងតំបន់អាមេរិកកណ្តាល។
យោងតាមទីភ្នាក់ងារគយនិងការពារព្រំដែន (CBP) បានឲ្យដឹងថា ចំនួនអនីតិជនដែលត្រូវបានចាប់ខ្លួនបន្ទាប់ពីចូលប្រទេសដោយខុសច្បាប់ដោយគ្មានក្រុមគ្រួសារកាលពីខែកុម្ភៈបានកើនឡើងដល់៦,៨២៥នាក់ពោលគឺកើនឡើងពី៥,១១៩នាក់ក្នុងខែមករានិង៤,៩៦៨នាក់ក្នុងខែតុលា។
CBP បានប្រគល់កុមារទាំងនោះទៅឲ្យរដ្ឋបាលកុមារនិងគ្រួសាររបស់ HHS ដែលព្យាយាមដាក់ពួកគេជាមួយញាតិសន្តានឬគ្រួសារផ្សេងទៀតនៅសហរដ្ឋអាមេរិក ខណៈដែលសំណើរបស់ពួកគេសុំបន្តស្នាក់នៅក្នុងប្រទេសត្រូវបានគេពិនិត្យដែលអាចចំណាយពេលពីរឆ្នាំ។
រដ្ឋបាលសម្រាប់កុមារនិងគ្រួសារបាននិយាយកាលពីថ្ងៃព្រហស្បតិ៍ថា បច្ចុប្បន្នពួកគេមានកុមារប្រមាណ១១,៥០០នាក់នៅក្នុងមន្ទីរឃុំឃាំង។
ពួកគេបាននិយាយថា តួលេខបានប្រែប្រួលជារៀងរាល់ថ្ងៃដោយសារតែការបញ្ជូនថ្មីមកពីក្រសួងសន្តិសុខមាតុភូមិនិងបញ្ចេញកុមារទៅឲ្យអ្នកឧបត្ថម្ភ។
លោក Kevin McAleenan ស្នងការគយនិងល្បាតព្រំដែនបាននិយាយកាលពីថ្ងៃអង្គារថា ការធ្វើអន្តោប្រវេសន៍ខុសច្បាប់នៅក្នុងខែកុម្ភៈបានកើនឡើងដល់កម្រិតខ្ពស់បំផុតក្នុងរយៈពេលប៉ុន្មានឆ្នាំចុងក្រោយនេះដោយមានមនុស្ស៧៦,០០០នាក់ត្រូវបានបញ្ឈប់ឬចាប់ខ្លួន៕ AFP
Source: Kampuchea Thmey Daily
0 Comments