នូ​វែ​ល​ហ្សេ​ឡង់​ហាមឃាត់​កាំភ្លើង​វែង​បន្ទាប់ពី​ការសម្លាប់​រង្គាល​កាលពី​សប្តាហ៍​មុន

លោកស្រី​នាយករដ្ឋមន្ត្រី Jacinda Ardern បាន​និយាយ​កាលពី​ថ្ងៃ​ព្រហស្បតិ៍​ថា ប្រទេស​នូ​វែ​ល​ហ្សេ​ឡង់​កំពុង​ហាមឃាត់​ការលក់​កាំភ្លើង​វែង​និង​អាវុធ​ពាក់កណ្តាល​ស្វ័យប្រវត្តិ​ដែល​នេះ​ជាការ​អនុវត្ត​ភ្លាមៗ​ដ៏​ល្អ​លើ​ការសន្យា​មួយ​ដើម្បី​រឹតបណ្តឹង​ច្បាប់​កាំភ្លើង​របស់​ប្រទេស​នេះ។

ការហាមឃាត់​នេះ​បាន​កើតឡើង​ក្នុង​រយៈពេល​តិចជាង​មួយ​សប្តាហ៍​បន្ទាប់ពី​ខ្មាន់កាំភ្លើង​ម្នាក់​បើក​ការវាយប្រហារ​លើ​វិហារ​ឥស្លាម​ចំនួន​ពីរ​ដោយបាន​សម្លាប់​មនុស្ស​ចំនួន​៥០​នាក់​នៅពេល​ពួកគេ​បួងសួង​ដែលជា​ហេតុ​បង្ក​ឲ្យ​មាន​ភាព​ស្អប់ខ្ពើម​ជា​សកល​និង​កំហឹង​ទូទាំងប្រទេស​។​

លោកស្រី Ardern បាន​ប្រាប់​សន្និសីទ​សារព័ត៌មាន​មួយ​ថា “​គ្រប់​អាវុធ​ពាក់កណ្តាល​ស្វ័យប្រវត្តិ​ដែល​ត្រូវបាន​ប្រើប្រាស់​នៅក្នុង​ការវាយប្រហារ​ភេរវកម្ម​កាលពី​ថ្ងៃ​សុក្រ​នឹង​ត្រូវបាន​ហាមឃាត់​នៅក្នុង​ប្រទេស​នេះ​”​។ លោកស្រី Ardern បាន​បន្ថែមថា ឡត​ដែល​ដាក់​គ្រាប់កាំភ្លើង​បាន​ច្រើន​និង​ឧបករណ៍​ដែល​ស្រដៀង​ទៅនឹង​ឧបករណ៍​ដែល​អាចធ្វើ​ឲ្យ​កាំភ្លើង​បាញ់​បាន​លឿន​ក៏​នឹងត្រូវ​បានដាក់​ឲ្យ​នៅក្រៅ​ច្បាប់​ផងដែរ​។​

ច្បាប់​ដែល​អនុម័ត​ការដាក់​កម្រិត​នេះ​នឹងត្រូវ​បាន​ណែនាំ​ក្នុង​សភា​នៅពេល​កោះប្រជុំ​នៅ​ដើមខែ​មេសា​ប៉ុន្តែ​វិធានការ​បណ្តោះអាសន្ន​មួយ​ដើម្បី​ហាមឃាត់​ការទិញ​ថ្មី​គឺ​អនុម័ត​រួចទៅហើយ​។​
​
ប្រតិកម្ម​អំពី​ការហាមឃាត់​នៅក្នុង​ប្រទេស​នេះ​គឺមាន​ភាព​វិជ្ជមាន​។​
​លោក Kawthar Abulaban អាយុ​៥៤​ឆ្នាំ​ដែល​រួច​រស់​ជីវិត​ពី​ការបាញ់ប្រហារ​នៅ​វិហារ​ឥស្លាម Al Noor បាន​ប្រាប់ AFP ថា “​វា​ជា​រឿង​ល្អ ហេតុអ្វី​យើង​ត្រូវការ​កាំភ្លើង​ដូចនេះ​នៅក្នុង​ផ្ទះ​របស់​យើង​? ”​។​
​
ទំហំ​នៃ​ការវាយប្រហារ​នេះ​បាន​បណ្តាល​ឲ្យ​មានការ​ប្រឆាំង​យ៉ាងខ្លាំង​នៅ​ទូទាំង​ពិភពលោក​ដោយសារតែ​ខ្មានកាំភ្លើង​ឈ្មោះ Brenton Tarrant បាន​ប្រើប្រាស់​ប្រព័ន្ធ​ផ្សព្វផ្សាយ​សង្គម​ដើម្បី​ផ្សាយ​ផ្ទាល់​អំពី​ការវាយប្រហារ​នេះ​។​
​
សម្រាប់​ថ្ងៃទី​ពីរ​ជាប់​គ្នា អ្នក​កាន់ទុក្ខ​រាប់រយ​នាក់​បាន​ប្រមូល​ផ្តុំគ្នា​នៅក្រោម​មេឃ​ស្រទុំ​ក្នុង​ទីក្រុង​ដើម្បី​អធិស្ឋាន​ដល់​អ្នកស្លាប់​៕ AFP

​

Source: Kampuchea Thmey Daily