ខឹងជនរងគ្រោះមិនឲ្យជក់ថ្នាំញៀន ផ្លោះរបងចូលមកវាយកូនតូចៗ៣នាក់ រួចចាក់ម្តាយ១កាំបិតបាក់ជាប់ក្នុងពោះ រងរបួសធ្ងន់

ភ្នំពេញ ៖ ជនសង្ស័យម្នាក់ ខឹងម្តាយក្មេងដេញមិនឲ្យជក់ថ្នាំញៀនក្នុងផ្ទះរបស់ខ្លួន ផ្លោះរបងចូលវាយកូនស្រី អាយុ១១ឆ្នាំ បណ្តាលឲ្យរងរបួសជាំមុខ ខណៈម្ដាយ និងប្អូនតូចៗ២នាក់ទៀត មកទាន់ត្រូវស្ត្រីជាម្តាយចាក់ជនសង្ស័យមួយកាំបិត រួចជនសង្ស័យ ចាប់កាំបិតបាន ចាក់ទៅលើស្ត្រីជាម្តាយបាក់កាំបិតជាប់ពោះ របួសធ្ងន់ និងវាយកូនប្រុស/ស្រី៣នាក់ របួសស្រាល។

ហេតុការណ៍នេះ បានកើតឡើង កាលពីវេលាម៉ោង២និង២០នាទីរសៀល ថ្ងៃទី២០ ខែមីនា ឆ្នាំ២០១៩ នៅក្នុងបរិវេណវត្តប្រជុំសាគរ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។

ស្ត្រីដែលរងរបួសធ្ងន់ ឈ្មោះ សៅ យឿន អាយុ២៥ឆ្នាំ មុខរបរនៅផ្ទះ មានប្តី ឈ្មោះ ឈួន សម្បត្តិអាយុ៣៧ឆ្នាំ មុខរបរសន្តិសុខឯកជន មានកូនប្រុស/ស្រី ក្នុងបន្ទុក៣នាក់ កូនស្រីបងគេមានអាយុ១១ឆ្នាំ ជាកូនរងគ្រោះ ជាំមុខ។

បើតាមប្រភពព័ត៌មានពីស្ត្រីរងគ្រោះ បានឲ្យដឹងថា នៅពេលកើតហេតុ មានជនសង្ស័យមួយក្រុមបាននាំគ្នាប្រមូលផ្តុំគ្នាជក់ថ្នាំញៀននៅក្នុងផ្ទះរបស់គាត់ ឃើញដូចនោះ គាត់ក៏ដេញពួកវាចេញ ពេលនោះជនសង្ស័យ ក៏ផ្លោះរបងរត់ទៅជក់ក្នុងចេតិយ មួយសន្ទុះក្រោយ ខណៈគាត់មិននៅ ជនសង្ស័យ ក៏ផ្លោះរបងចូលមកវិញ ស្រាប់តែវាយកូនស្រីគាត់តែម្តង ឃើញដូច្នោះ ស្ត្រីជាម្តាយ ក៏ស្ទុះយកកាំបិតចុងស្រួចទៅចាក់ជនសង្ស័យ ត្រូវ២ ទៅ៣កាំបិត ហើយជនសង្ស័យ បានប្រតាយប្រតប់គ្នា ដណ្តើមបានកាំបិត ចាក់ស្ត្រីរងគ្រោះវិញ ត្រូវ១កាំបិតលិចបាក់ជាប់កាំបិតក្នុងពោះ របួសធ្ងន់ដោយកូនប្រុស/ស្រីតូចៗឲ្យ៣នាក់ទៀត បានរងរបួសទាំងអស់៤នាក់ បន្ទាប់មកត្រូវបានអ្នកជិតខាងដឹកទៅកាន់មន្ទីរពេទ្យកាល់ម៉ែត។

តាមសម្ដីបុរសជាប្ដី និងឪពុករបស់ជនរងគ្រោះបានឲ្យដឹងថា មុនពេលកើតហេតុ រូបគាត់ បានទៅធ្វើការសន្តិសុខឯកជន ហើយប្រពន្ធ និងកូនប្រុស/ស្រី៣នាក់ ស្នាក់នៅផ្ទះក្នុងបរិវេណវត្តខាងលើ។
ក្រោយមក ប្រពន្ធគាត់ខលប្រាប់ថា មានគ្រោះថ្នាក់ត្រូវគេចាក់រូបគាត់ និងវាយកូនតូចៗ បណ្ដាលឲ្យរបួសធ្ងន់ទាំង៤នាក់ កំពុងសម្រាកនៅមន្ទីរពេទ្យកាល់ម៉ែត។

បើតាមប្រភពវីដេអូកាមេរ៉ាសុវត្ថិភាពរបស់ប្រជាពលរដ្ឋអ្នកជិតខាង គេបានសង្កេតគេឃើញថា មុនពេលកើតហេតុមានបុរសម្នាក់ បានឡើងរបងផ្លោះចូលក្នុងបរិវេណវត្ត។ យ៉ាងណា សមត្ថកិច្ច ក៏បានដឹងហើយ ដោយប្រជាពលរដ្ឋបានរាយការណ៍ទៅសមត្ថកិច្ចមូលដ្ឋានឲ្យចុះមកពិនិត្យ និងធ្វើការស្រាវជ្រាវដើម្បីតាមចាប់ជនសង្ស័យមកផ្ដន្ទាទោសតាមច្បាប់៕