មន្ត្រីអាមេរិកជាន់ខ្ពស់មួយរូបបាននិយាយកាលពីថ្ងៃពុធថា សហរដ្ឋអាមេរិកនៅតែមានការព្រួយបារម្ភអំពីភាពតានតឹងរវាងឥណ្ឌានិងប៉ាគីស្ថាន ខណៈយោធារបស់ប្រទេសប្រដាប់អាវុធនុយក្លេអ៊ែរទាំងពីរនៅតែស្ថិតក្នុងការប្រុងប្រយ័ត្ន, ជិតបីសប្តាហ៍បន្ទាប់ពីការប្រឈមមុខដាក់គ្នាដ៏គ្រោះថ្នាក់បំផុតរបស់ពួកគេក្នុងរយៈពេលប៉ុន្មានទសវត្សរ៍មកនេះ។
មន្ត្រីដដែលក៏បានចង្អុលបង្ហាញផងដែរថា រដ្ឋបាលរបស់លោក Trump មិនគិតថា ប្រទេសប៉ាគីស្ថានបានបង្ក្រាបលើក្រុមជ្រុលនិយមឥស្លាមដែលអះអាងទទួលខុសត្រូវចំពោះការវាយប្រហារដោយគ្រាប់បែកទៅលើកងកម្លាំងសន្តិសុខឥណ្ឌាដែលបង្កឲ្យមានវិបត្តិកាលពីខែមុនទេ។
មន្ត្រីដែលបានប្រាប់អ្នកកាសែតក្នុងលក្ខខណ្ឌសុំមិនបញ្ចេញឈ្មោះបាននិយាយថា “ប្រសិនបើមានការវាយប្រហារដោយភេរវករបន្ថែមទៀតទាំងប៉ាគីស្ថានមិនបានខិតខំប្រឹងប្រែងដោយស្មោះស្ម័គ្រប្រឆាំងនឹងក្រុមទាំងនេះនោះ វានឹងមានបញ្ហាយ៉ាងខ្លាំងចំពោះប្រទេសប៉ាគីស្ថានហើយវានឹងបង្កឲ្យមានការកើនឡើងជាថ្មីនៃភាពតានតឹង”។
ការអត្ថាធិប្បាយរបស់មន្ត្រីរូបនេះបានគូសបញ្ជាក់អំពីទស្សនៈរបស់រដ្ឋបាលលោក Trump ដែលថា ការផ្តល់ទីជម្រកដល់ក្រុមជ្រុលនិយមដោយប្រទេសប៉ាគីស្ថានគឺស្ថិតនៅចំកណ្តាលនៃភាពតានតឹងចុងក្រោយបំផុតនេះ។
វិបត្តិនេះបានផ្ទុះឡើងដោយការបំផ្ទុះគ្រាប់បែកអត្តឃាតកាលពីថ្ងៃទី១៤ខែកុម្ភៈនៅខាងភាគីឥណ្ឌានៃតំបន់កាស្មៀរដែលបានសម្លាប់ទាហានប៉ារ៉ាចំនួន៤០នាក់ហើយត្រូវបានអះអាងទទួលខុសត្រូវដោយក្រុមសកម្មប្រយុទ្ធ Jaish-e-Mohammed ដែលជាក្រុមមួយត្រូវបានមន្ត្រីអាមេរិកចោទប្រកាន់ថា ត្រូវបានផ្តល់ទីជ្រកកោនដោយប្រទេសប៉ាគីស្ថាន។ ទោះបីជាយ៉ាងណាក៏ដោយ រដ្ឋាភិបាលក្រុងឥស្លាម៉ាបាដបានបដិសេធការចោទប្រកាន់នេះ។
នៅថ្ងៃទី២៦ខែកុម្ភៈ ប្រទេសឥណ្ឌាបានបើកការវាយប្រហារអាកាសលើកដំបូងដែលមិនធ្លាប់មានពីមុនមកលើជំរំហ្វឹកហាត់ជ្រុលនិយមមួយនៅក្នុងប្រទេសប៉ាគីស្ថាន។ នៅថ្ងៃបន្ទាប់ យន្តហោះប៉ាគីស្ថានបានសងសឹកវិញប្រឆាំងនឹងគោលដៅនានានៅតំបន់កាស្មៀរដែលគ្រប់គ្រងដោយប្រទេសឥណ្ឌាដែលជាហេតុបង្កឲ្យមានជម្លោះ។
នៅក្នុងការប៉ះទង្គិចគ្នាជាលើកដំបូងរបស់ពួកគេចាប់តាំងពីសង្គ្រាមឆ្នាំ១៩៧១មក, ប្រទេសប៉ាគីស្ថានបានបាញ់ទម្លាក់យន្តហោះឥណ្ឌាមួយគ្រឿងនិងបានចាប់យកភីឡុត។
រដ្ឋបាលលោក Trump ដែលត្រូវបានគាំទ្រដោយមហាអំណាចដទៃទៀតបានជំរុញឲ្យភាគីទាំងពីរបញ្ចៀសនូវអំពើហឹង្សាបន្ថែមទៀតចំពេលដែលមានការភ័យខ្លាចអំពីសង្គ្រាមនុយក្លេអ៊ែរ៕ REUTERS
Source: Kampuchea Thmey Daily
0 Comments